ქართველმა ხალხმა საქართველოს პარლამენტს და საპარლამენტო უმრავლესობას მიანიჭა შესაბამისი ლეგიტიმაცია, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს ბაქოში განუცხადა.

პრემიერის თქმით, თუ ოპოზიცია უარს იტყვის იმ მანდატებზე, რომელიც მიანიჭა საზოგადოების შესაბამისმა ნაწილმა, ამით ისინი თავიანთ მხარდამჭერებს მიაყენებენ შეურაცხყოფას.

„პარლამენტს არ სჭირდება ოპოზიციის ლეგიტიმაცია, ეს შემიძლია გითხრათ ძალიან მკაფიოდ. პარლამენტს სჭირდება ქართველი ხალხის ლეგიტიმაცია. ქართველმა ხალხმა საქართველოს პარლამენტს და საპარლამენტო უმრავლესობას მიანიჭა შესაბამისი ლეგიტიმაცია. რაც შეეხება ოპოზიციას, თუ ოპოზიცია უარს იტყვის იმ მანდატებზე, რომელიც მას მიანიჭა საზოგადოების შესაბამისმა ნაწილმა, ამით ისინი მათ მხარდამჭერებს მიაყენებენ შეურაცხყოფას, თუმცა ეს მათი საქმეა. თქვენ ხედავთ, რომ დღითიდღე ოპოზიცია კიდევ უფრო მეტად იფუჭებს საკუთარ რეპუტაციას და მდგომარეობას. ამას აკეთებენ ისინი საკუთარი ხელით. რაც ჩვენ უნდა გაგვეკეთებინა, იმას აკეთებენ საკუთარი ხელით ოპოზიციის წარმომადგენლები“, - აღნიშნა პრემიერ-მინისტრმა.

საქართველოს პრეზიდენტი სალომე ზურაბიშვილი, 2024 წლის საპარლამენტო არჩევნების შესაძლო გაყალბებასთან დაკავშირებით გაკეთებულ განცხადებასთან დაკავშირებით, პროკურატურაშია დაბარებულია.

ამის შესახებ მთავარი პროკურატურის მიერ გავრცელებულ განცხადებაშია ნათქვამი.

„საქართველოს პროკურატურამ ცენტრალური საარჩევნო კომისიის 2024 წლის 30 ოქტომბრის მომართვის საფუძველზე, გამოძიება დაიწყო საპარლამენტო არჩევნების სავარაუდო გაყალბების ფაქტზე, საქართველოს სისხლის სამართლის კოდექსის 164³-ე მუხლით გათვალისწინებული დანაშაულის ნიშნებით.

ცესკო-ს განცხადებისა და საჯარო სივრცეში მასმედიის მეშვეობით გავრცელებული ინფორმაციის თანახმად, საქართველოს პრეზიდენტი, სალომე ზურაბიშვილი უნდა ფლობდეს მტკიცებულებებს 2024 წლის საპარლამენტო არჩევნების შესაძლო გაყალბებასთან დაკავშირებით, რის გამოც, კანონით დადგენილი წესით, საქართველოს პრეზიდენტი, მიმდინარე წლის 31 ოქტომბერს, გამოკითხვის მიზნით დაბარებულია საგამოძიებო უწყებაში. საქართველოს პროკურატურა ჩაატარებს ყველა საჭირო საგამოძიებო და საპროცესო მოქმედებას, როგორც ცესკო-ს მომართვაში მითითებული, ამავდროულად, საქართველოს პრეზიდენტის, ცალკეული პოლიტიკური პარტიებისა და სადამკვირვებლო მისიების წარმომადგენლების მიერ გაჟღერებული ფაქტების შესწავლის მიზნით. მათ შორის, გამოძიების ფარგლებში გამოიკითხება ყველა ის პირი, რომელიც შესაძლებელია, ფლობდეს ინფორმაციას სავარაუდო, დანაშაულებრივ ფაქტთან დაკავშირებით.

აქვე, საზოგადოებას ვაცნობებთ, რომ წინასაარჩევნო პერიოდსა და არჩევნების დღეს გამოვლენილი ცალკეული სამართალდარღვევების შესწავლის მიზნით, სამართალდამცავი უწყებები აქტიურად აწარმოებენ გამოძიებას არაერთ სისხლის სამართლის საქმეზე. გამოძიების შედეგების შესახებ პროკურატურა პერიოდულად მოახდენს საზოგადოების ინფორმირებას“, - ნათქვამია განცხადებაში.

ცესკო-ს წინასწარი შედეგების მიხედვით, საპარლამენტო არჩევნებში “ქართული ოცნება - დემოკრატიული საქართველო“ 54.086%-ით (1 117 480 ხმა) ლიდერობს.

როგორც გიორგი კალანდარიშვილმა დღეს გამართულ ბრიფინგზე აღნიშნა, 3111 უბნიდან, ამ დროისთვის დათვლილია 3100 უბანი, რაც უბნების რაოდენობის 99.646%-ს შეადგენს.

„ამ დროისთვის 3111 საარჩევნო უბნიდან დათვლილია 3100 საარჩევნო უბნის შედეგი. დარჩენილი 11-იდან 9 უცხოეთის საარჩევნო უბანია, საიდანაც ველოდებით შედეგების გამოგზავნას. ორი საარჩევნო უბნიდან, ერთი არის მარნეულის შემთხვევა, სადაც გაუქმდა პროცესი. მეორე კი დუშეთის შემთხვევა, საიდანაც ამ ეტაპისთვის არ არის ოქმი მიღებული“,- განაცხადა კალანდარიშვილმა.

რაც შეეხება სხვა პოლიტიკური სუბიექტების შედეგებს, შედეგების მიხედვით მეორე ადგილზეა „კოალიცია ცვლილებისთვის - გვარამია, მელია, გირჩი, დროა“, რომელმაც 10.923 % (225 680 ხმა) მიიღო.

„ერთიანობა - ნაციონალურმა მოძრაობამ“ - 10.122% (209 137 ხმა) მოიპოვა;

„ძლიერი საქართველო - ლელო, ხალხისთვის, თავისუფლებისთვის“ - 8.781 % (181 424 ხმა) აქვს; პარტიას „გახარია საქართველოსთვის“ კი - 7.761% (160 354 ხმა).

ქუთაისში, ისევე როგორც საქართველოში, საპარლამენტო არჩევნები დასრულდა,უბნები დაიხურა და ხმების დათვლა იწყება.

დღეს ქუთაისში ხმა  81 242-მა ადამიანმა მისცა,რაც ამომრჩეველთა 53,27 %-ია.წინა  არჩევნებში მონაწილეობა 74 236-მა ამომრჩეველმა მიიღო.წელს აქტივობა ბევრად მაღალია.ქუთაისის 59-ე საოლქო საარჩევნო კომისიაში 33 საჩივარი შევიდა,ყველა პროცედურულ დარღვევებზეა.

საპარლამენტო არჩევნები 2024 დასრულდა. საქართველოს მასშტაბით, კენჭისყრის პროცედურა უკვე დასრულდა. ამომრჩეველს ხმის მიცემის უფლება 20:00 საათამდე ჰქონდა.

ცენტრალური საარჩევნო კომისიის ინფორმაციით, 17:00 საათის მდგომარეობით, 2024 წლის საპარლამენტო არჩევნებზე ამომრჩევლის აქტივობამ 50.6% შეადგინა.

წელს ქვეყანაში პირველად ჩატარდა საპარლამენტო არჩევნები სრულად პროპორციული წესით. ამომრჩევლებს, საერთო ჯამში, 3 111 საარჩევნო უბანი ემსახურებოდა, ამომრჩეველთა ერთიან სიაში კი 3,495,789 ადამიანი იყო აღრიცხული.

5 საათის მონაცემებით ქუთაისში ხმა  45 %-ზე მეტმა მისცა, რაც 58 851 ამომრჩეველია.2020 წლის არჩევნებზე  აქტივობა  59 940 ამომრჩეველი იყო.

ქუთაისის 59-ე საოლქო საარჩევნო კომისიის თავმჯდომარის ინფორმაციით , დაწერილია 23 საჩივარი.

ქალაქში 152 506 ამომრჩეველია რეგისტრირებული.გახსნილია 72 უბანი,აქედან ერთი სპეცუბანია.