ქუთაისის მერის პირველმა მოადგილემ გიორგი ცხაკაიამ და რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდის აღმასრულებელმა დირექტორმა გიორგი შონიამ, ქუთაისში მიმდინარე მასშტაბური ინფრასტრუქტურული პროექტები ადგილზე დაათვალიერეს.

ქუთაისში, აქტიურად გრძელდება მოსწავლე-ახალგაზრდობის პარკის რეაბილიტაცია და აბაშიძის ქუჩაზე ახალი ბულვარის მოწყობა.

მოსწავლე-ახალგაზრდობის პარკის რეაბილიტაცია ტერიტორიის სრულ კეთილმოწყობას ითვალისწინებს. პროექტის ფარგლებში მოეწყობა საფეხმავლო და ველობილიკები, განახლდება განათების სისტემა, შეიქმნება ახალი გამწვანების ზოლები და განთავსდება მცირე არქიტექტურული ელემენტები. პარკში ასევე მოეწყობა საბავშვო და სპორტული ზონები, საპიკნიკე სივრცეები, ამფითეატრი და წყლის სარკეები.

აბაშიძის ქუჩაზე ახალი ბულვარი თანამედროვე ურბანულ და სარეკრეაციო სივრცედ ჩამოყალიბდება. პროექტი მოიცავს გამწვანებულ და დასასვენებელ ზონებს, ასევე მოსახლეობის საჭიროებებზე მორგებულ ინფრასტრუქტურას. ახალი ბულვარი ქალაქის ურბანულ გარემოს გააუმჯობესებს და ქუთაისს კიდევ ერთ თანამედროვე საზოგადოებრივ სივრცეს შესძენს.

შინაგან საქმეთა სამინისტროს იმერეთის პოლიციის დეპარტამენტის თანამშრომლებმა, დიდი ოდენობით თანხის თაღლითურად დაუფლების ბრალდებით, ქუთაისში ერთი პირი დააკავეს.

გამოძიებით დადგინდა, რომ ბრალდებულმა თურქეთის რესპუბლიკის მოქალაქე დაარწმუნა, თითქოს ბიზნესმენი 260 000 აშშ დოლარად ყიდულობდა მის კუთვნილ სახლს. მან მოტყუებით დაადებინა ნასყიდობის ხელშეკრულება, რის საფუძველზეც სახლი მამის სახელზე გადააფორმებინა და უძრავ ქონებას თაღლითურად დაეუფლა.

სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად, დანაშაულის ჩამდენი პირი ბრალდებულის სახით დააკავეს.

გამოძიება საქართველოს სისხლის სამართლის კოდექსის 180-ე მუხლის მე-3 ნაწილით მიმდინარეობს, რაც 9 წლამდე ვადით თავისუფლების აღკვეთას ითვალისწინებს.

სურსათის ეროვნული სააგენტოს იმერეთის დეპარტამენტის ინსპექტორებმა, ქუთაისში ინდივიდუალური მეწარმე რ. გ.-ის (მისამართი: ქუთაისი, ჭავჭავაძის გამზირი N 67 ) პესტიციდებისა და აგროქიმიკატების სარეალიზაციო ობიექტი არაგეგმურად შეამოწმეს და გამოვლენილი დარღვევბის გამო საქმიანობა შეუჩერეს.

ბიზნესოპერატორი პესტიციდებისა და აგროქიმიკატების რეალიზაციას რეგისტრაციისა და სააგენტოს შეასაბამისი აღიარების გარეშე ახდენდა. 

აღსანიშნავია, რომ სპეციალიზებული ობიექტის ფუნქციონირებისათვის სავალდებულოა სურსათის ეროვნული სააგენტოს მიერ დადგენილი წესით აღიარება, რაც გულისხმობს სანიტარიულ-ჰიგიენური მოთხოვნების და უსაფრთხოების წესების სრულად დაკმაყოფილებას. 

კანონმდებლობის შესაბამისად, ობიექტი დაჯარიმდა და შესაბამისი მოთხოვნების დაცვის გარეშე აგროქიმიკატებით ვაჭრობა აეკრძალა.

შინაგან საქმეთა სამინისტროს იმერეთის პოლიციის დეპარტამენტის თანამშრომლების მიერ, კომპლექსურად ჩატარებული ოპერატიული ღონისძიებებისა და საგამოძიებო მოქმედებების შედეგად, გამოვლენილია ნარკოდამნაშავეთა ორგანიზებული ჯგუფი და აღკვეთილია 40 კილოგრამამდე ნარკოტიკული საშუალებების რეალიზაციის ფაქტი. 

ამოღებული ნარკოტიკული საშუალებების სავარაუდო ღირებულება ე.წ. შავ ბაზარზე 14 მილიონ ლარს აღემატება.

გამოძიებით დადგინდა, რომ დაკავებული უცხო ქვეყნის ორი მოქალაქე, ნარკოტიკული საშუალებების გასაღების სქემაში იყო ჩართული. ისინი ნარკოტიკებს საქართველოს რამდენიმე რეგიონში, წინასწარ შერჩეულ ადგილებზე ათავსებდნენ, რის შემდეგაც შესაბამის კოორდინატებსა და ადგილმდებარეობის ამსახველ ფოტოებს დაინტერესებულ პირებს უგზავნიდნენ.

სამართალდამცველებმა ბრალდებულების პირადი ჩხრეკისა და მათ მიერ მითითებული ადგილების შემოწმების შედეგად ნივთმტკიცებად ამოიღეს 117 შეკვრად დაფასოებული, 12 კილოგრამამდე „მეთადონი“ და 267 შეკვრად დაფასოებული, 28 კილოგრამამდე „ჰაშიში“.

გამოძიება სისხლის სამართლის კოდექსის 260-ე და 260-ე კვარტა მუხლებით მიმდინარეობს. დანაშაულები სასჯელის სახით 20 წლამდე ან უვადო თავისუფლების აღკვეთას ითვალისწინებს.

შინაგან საქმეთა სამინისტროს თანამშრომლები ნარკოტიკული საშუალებების უკანონო ბრუნვის, გავრცელებისა და რეალიზაციის წინააღმდეგ ბრძოლას ქვეყნის მასშტაბით აქტიურად განაგრძობენ.

აკაკი წერეთლის  სახელმწიფო უნივერსიტეტში მეცნიერების რეგიონული ფესტივალი იმართება.

მისი მიზანია რეგიონებში მეცნიერების, ტექნოლოგიების,ინოვაციებისა და კვლევითი საქმიანობის პოპულარიზაცია .

ფესტივალის ფარგლებში სამეცნიერო კონფერენცია გაიმართა,უნივერსიტეტის ეზოში ,,მეცნიერთა ქალაქია,, მოწყობილი ,დღის ბოლოს კი ღონისძიების შეჯამება,დაჯილდოება და მუსუკალური პროგრამაა დაგეგმილი.

რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი ქალაქ ქუთაისის N7 საჯარო სკოლის სრულ რეაბილიტაციას ახორციელებს.

 სარეაბილიტაციო სამუშაოების მიმდინარეობას ადგილზე ფონდის აღმასრულებელი დირექტორი გიორგი შონია და ქუთაისის მერის პირველი მოადგილე გიორგი ცხაკაია გაეცნენ.

სამშენებლო ობიექტის ადგილზე შემოწმება წინასწარი შეტყობინების გარეშე განხორციელდა, რაც მიმდინარე სამუშაოების ფაქტობრივი მდგომარეობის, ტემპისა და ხარისხის ადგილზე შეფასებას ემსახურება.

პროექტის ფარგლებში მიმდინარეობს სკოლის შენობის სრული განახლება თანამედროვე საგანმანათლებლო სტანდარტების შესაბამისად. სარეაბილიტაციო სამუშაოები ითვალისწინებს სასწავლო სივრცეების მოწესრიგებას, შესაბამისი ინფრასტრუქტურის განახლებას, მოსწავლეებისა და პედაგოგებისთვის უსაფრთხო, თანამედროვე და კომფორტული გარემოს შექმნას.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, უკანონო ტყითსარგებლობასთან ბრძოლის ფარგლებში, 2026 წლის 1 იანვრიდან 30 სექტემბრის ჩათვლით, უკანონო ტყითსარგებლობის 1203 ფაქტი გამოავლინეს. მათგან 145 სისხლის სამართლის დანაშაულის ნიშნებს შეიცავს და მასალები, შემდგომი რეაგირების მიზნით, შესაბამის უწყებებში გადაიგზავნა. 

გამოვლენილი სამართალდარღვევებიდან 850 ფაქტი ეხება ხე-ტყის უკანონო მოპოვება-ტრანსპორტირებას, ხოლო 353 - სახერხი საამქროების მიერ ტექნიკური რეგლამენტის დარღვევასა და არალეგალური საქმიანობის შემთხვევებს.  

2026 წლის 9 თვეში დალუქულია 51 არარეგისტრირებული სახერხი საამქრო.  

 რეგიონების მიხედვით, ყველაზე მეტი - 285 ფაქტი დაფიქსირდა აჭარაში. სამეგრელო-ზემო სვანეთში - 220, კახეთში - 193, იმერეთში - 166, სამცხე-ჯავახეთში - 89, გურიაში - 57, ქვემო ქართლში - 56, რაჭა-ლეჩხუმი-ქვემო სვანეთში - 50, შიდა ქართლში - 42, მცხეთა-მთიანეთში კი - 38. 

 7 სამართალდარღვევა დაფიქსირდა დედაქალაქშიც - გარემოსდაცვითი პატრულირებისა და სწრაფი რეაგირების თანამშრომლებმა, თბილისში, 8 თვეში გამოავლინეს 3 უკანონო სახერხი საამქრო, ასევე სახერხი საამქროს ტექნიკური რეგლამენტის დარღვევის 3 და ხე-ტყის უკანონო ტრანსპორტირების 1 ფაქტი.