ზესტაფონში 2008 წლ8ს აგვისტოს რუსეთ-საქართველოს ომის გმირის, ზაზა ფერაძის ხსოვნას ადგილობრივი ხელისუფლების წევრებმა პატივი მიაგეს.

უფროსი სერჟანტი, ზაზა ფერაძე 2008 წლის აგვისტოს ომში, ფრონტის ხაზზე დაჭრილი თანამებრძოლების გადასარჩენად, სნაიპერის ტყვიამ იმსხვერპლა.

სამშობლოს წინაშე გაწეული ღვაწლისა და მამაცობისთვის, ზაზა ფერაძე სიკვდილის შემდეგ დაჯილდოვდა ვახტანგ გორგასლის მე - 3 ხარისხის ორდენით. 2015 წლიდან მისი სახელი თავდაცვის ძალების საწყისი საბრძოლო მომზადების ცენტრს მიენიჭა.

ხარაგაულის მუნიციპალიტეტში 2008 წლის რუსეთ-საქართველოს ომში დაღუპული გმირის, ზაზა გლუნჩაძის ხსოვნას პატივი მიაგეს.

„ამ დღეს ყოველთვის მოვდივართ ჩვენი გმირის, ზაზა გლუნჩაძის საფლავზე და პატივს მივაგებთ მის ხსოვნას. ეს ჩვენი ვალია გმირების ხსოვნის წინაშე. მათმა თავდადებამ და სამშობლოსთვის გაღებულმა სიცოცხლემ თითოეულ ჩვენგანს დაგვიტოვა პასუხისმგებლობა — არასოდეს დავივიწყოთ მათი გმირობა და მომავალ თაობებს გადავცეთ მათი სახელები“, — განაცხადა ხარაგაულის მერის მოადგილე ვარლამ ჭიპაშვილმა.

2008 წლის აგვისტოს ომში, ზაზა გლუნჩაძემ რვა დაჭრილი თანამებრძოლი სამშვიდობოს გამოიყვანა. მეცხრე დაჭრილის დასახმარებლად კვლავ ბრძოლის ველზე შესვლისას კი თავად დაიღუპა.

ზაზა გლუნჩაძე სიკვდილის შემდეგ ვახტანგ გორგასლის II ხარისხის ორდენით დაჯილდოვდა.

შინდისის ბრძოლაში დაღუპული ჭიათურელი  გმირის, შმაგი კუპატაძის მემორიალი და საფლავი დღე გვირგვინით  მუნიციპალიტეტის მერმა შეამკო.

“ პატივი მივაგეთ შინდისის გმირს შმაგი კუპატაძეს. მისი თავდადება ჩვენი ქვეყნის უახლესი ისტორიის ღირსეული მაგალითია. ქედს ვიხრი ყველა იმ გმირის ხსოვნის წინაშე, რომლებმაც საქართველოს ტერიტორიული მთლიანობისთვის საკუთარი სიცოცხლე შესწირეს“- განაცხადა ჭიათურის მერმა გივი მოდებაძემ.

ორი საჩხერელი მებრძოლი დაიღუპა აგვისტოს ომში-8 აგვისტოს  კაპრალი ირაკლი ბაზაძე და 11 აგვისტოს შინდისში  ილია შეყლაშვილი.

დღეს მათი გმირობა კიდევ ერთხელ გაიხსენეს.

,,აგვისტოს ომი გვიმძაფრებს ტკივილს იმ გმირი ბიჭების წინაშე, რომლებიც ამ ომს შეეწირენ. ირაკლი ბაზაძე და ილია შეყლაშვილი არიან ჩვენი დროის გმირები. მათ თავისი სიცოცხლე უყოყმანოდ შესწირეს სამშობლოს თავისუფლებისათვის ბრძოლას და დაგვიტოვეს დიდი მაგალითი სამშობლოს სიყვარულის, ვაჟკაცობისა და ქართველობისა”-განაცხადა ლევან ივანაშვილმა.

ირაკლი ბაზაძე სიკვდილის შემდეგ დაჯილდოებულია ვახტანგ გორგასლის I ხარისხის ორდენით და მედლით ,,სამშობლოსათვის თავდადებული“.

შინდისის გმირი ილია შეყლაშვილი სიკვდილის შემდეგ დაჯილდოებულია მედლით ,,მხედრული მამაცობისათვის“

ტყიბულში, რუსეთ-საქართველოს ომში დაღუპულ გმირებს პატივი მიაგეს

ტყიბულის მუნიციპალიტეტის მერმა და საკრებულოს თავმჯდომარემ, 2008 წლის აგვისტოს ომში დაღუპული გმირების — ნიკოლოზ ფორჩხიძისა და ფრიდონ ბრეგაძის საფლავები ყვავილებით შეამკო.

ტყიბულელი ჯარისკაცები სამშობლოს დასაცავად მტერთან უთანასწორო ბრძოლაში 11 აგვისტოს გმირულად დაიღუპნენ. 

მთავრობის განკარგულებით, საქართველოს აფხაზეთისა და ცხინვალის რეგიონების უკანონო ოკუპაციის მიზნით, რუსეთის მიერ საქართველოში განხორციელებული ფართომასშტაბიანი სამხედრო ინტერვენციის შედეგად დაღუპულთა ხსოვნის პატივსაცემად, საქართველოს მთელს ტერიტორიაზე, ადმინისტრაციული ორგანოების შენობებზე სახელმწიფო დროშები დაშვებულია.

ბაღდათის მუნიციპალიტეტში 2008 წლის რუსეთ-საქართველოს აგვისტოს ომის გმირებს პატივი მიაგეს. 

ბაღდათის მუნიციპალიტეტის მერის პირველმა მოადგილემ პაატა ბუცხრიკიძემ და მოადგილე რევაზ კიკნაველიძემ, საკრებულოს დეპუტატებთან და ადგილობრივი თვითმმართველობის წარმომადგენლებთან ერთად, 2008 წლის აგვისტოს ომში, შინდისში გმირულად დაღუპული ფელიქს კაკაურიძის და ზვიად კაცაძის ხსოვნას პატივი მიაგეს და მათი საფლავები ყვავილებით შეამკეს. 

დღესვე ყვავილებით შეამკეს, ქალაქ ბაღდათში და დიმში ტერიტორიული მთლიანობისთვის დაღუპულ გმირთა მემორიალები.

2008 წლის აგვისტოს ომიდან 18 წელი შესრულდა.

2008 წლის რუსეთ-საქართველოს აგვისტოს ომში დაღუპულების ხსოვნას ქუთაისში პატივი მიაგეს.

გმირთა მემორიალთან მხარისა და ქალაქის პირველი პირები შეიკრიბნენ.

ქუთათელ-გაენათელმა მიტროპოლიტმა, მეუფე იოანემ აგვისტოს ომში დაღუპულთა სულების მოსახსენიებელი პანაშვიდი გადაიხადა.

მემორიალთან იმყოფებოდნენ ომში დაღუპული გმირების ოჯახის წევრები. ღონისძიებაში მონაწილეობდნენ კადეტთა სამხედრო ლიცეუმის სტუდენტები.

 2008 წლის აგვისტოს ომში დაღუპულ გმირებს პატივი მიაგეს იმერეთის 12-ვე მუნიციპალიტეტში.

რუსეთ-საქართველოს ომში ქუთაისიდან 9 მებრძოლი დაიღუპა.

დაღუპულთა ხსოვნის პატივსაცემად, სახელმწიფო დროშები დაშვებულია ქვეყნის მთელ ტერიტორიაზე არსებულ ადმინისტრაციულ შენობებზე.

შინაგან საქმეთა სამინისტროს სამეგრელო-ზემო სვანეთისა და იმერეთის პოლიციის დეპარტამენტების თანამშრომლებმა, განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და რეალიზაციის ხელშეწყობის, ასევე ნარკოტიკული ნივთიერების შემცველი მცენარის დათესვა-მოყვანის ბრალდებით, სხვადასხვა დროს, 3 პირი დააკავეს.

სამართალდამცველებმა, წალენჯიხის, ჭიათურისა და წყალტუბოს მუნიციპალიტეტებში, ბრალდებულების საცხოვრებელი სახლების ჩხრეკის შედეგად, ნივთმტკიცებად ამოიღეს განსაკუთრებით დიდი ოდენობით სხვადასხვა სახის ნარკოტიკი, მათ შორის: „მეთადონი“, „მარიხუანა“ და 33 კილოგრამამდე მცენარე „კანაფი“.

ერთ-ერთი დაკავებულის საცხოვრებელი ბინის ჩხრეკის შედეგად ნივთმტკიცებად, ასევე ამოღებულია ნარკოტიკული საშუალებების დაფასოებისთვის საჭირო მასალები და სავარაუდოდ ნარკოტიკების რეალიზაციის შედეგად მიღებული ფული.

გამოძიება სისხლის სამართლის კოდექსის 260-ე, 260-ე კვარტა და 265-ე პრიმა მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.

აგვისტოს 5-დღიანი ომიდან 18 წელი გავიდა. 2008 წლის აგვისტოს რუსეთ-საქართველოს ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა. დაჭრილი და დაშავებული სამოქალაქო და სამხედრო პირთა რაოდენობა სულ 2 232-ს შეადგენს, მათ შორის, 1045 პირი სამხედრო მოსამსახურეა. 

2008 წლის რუსეთ-საქართველოს ომი 7-12 აგვისტოს მიმდინარეობდა.შედეგად საქართველომ კონტროლი დაკარგა 189 სოფელზე, მათგან 125 დღემდე რუსეთის საოკუპაციო რეჟიმის ქვეშ რჩება. 

რუსეთის ფედერაცია კვლავაც განაგრძობს საქართველოს რეგიონების - აფხაზეთისა და ცხინვალის რეგიონის ოკუპაციასა და მილიტარიზაციას, რეგულარულად ატარებს უკანონო სამხედრო წვრთნებს ქვეყნის ტერიტორიაზე, ინტენსიურად ამაგრებს საოკუპაციო ხაზს მავთულხლართებით და სხვადასხვა ხელოვნურ ბარიერებით, აგრძელებს ადგილობრივი მშვიდობიანი მოსახლეობის უკანონო დაკავებისა და გატაცების პრაქტიკას, ზღუდავს კონფლიქტის შედეგად დაზარალებული მოსახლეობის თავისუფალ გადაადგილებას

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, 2026 წლის 1 ივლისიდან 31 ივლისის პერიოდში, უკანონო ტყითსარგებლობის 112 ფაქტი გამოავლინეს. 

გამოვლენილი სამართალდარღვევებიდან 67 ფაქტი ეხება ხე-ტყის უკანონო მოპოვება-ტრანსპორტირებას, ხოლო 45 - სახერხი საამქროების მიერ ტექნიკური რეგლამენტის დარღვევასა და არალეგალური საქმიანობის შემთხვევებს.

გამოვლენილი სამართალდარღვევებიდან 15 ფაქტი შეიცავს სისხლის სამართლის დანაშაულის ნიშნებს. მასალები, შემდგომი რეაგირების მიზნით, შესაბამის უწყებებში გადაიგზავნა.

2026 წლის ივლისში დალუქულია 5 არარეგისტრირებული სახერხი საამქრო. ჯამში ამოღებულია დაახლოებით 480 კუბური მეტრი მოცულობის უკანონოდ მოპოვებული ხე-ტყე.

რეგიონების მიხედვით, ყველაზე მეტი - 27 ფაქტი დაფიქსირდა აჭარაში, 20 - იმერეთში, 18 - სამეგრელო-ზემო სვანეთში, 15 – კახეთში, 9 - სამცხე-ჯავახეთში, 8 - რაჭა-ლეჩხუმი-ქვემო სვანეთში, 6 - ქვემო ქართლში, 5 - მცხეთა-მთიანეთში, 3 - გურიაში, 1 კი - შიდა ქართლში.