ბორკილებით არ იკარგება თავისუფლება , თავისუფლებას ვკარგავთ მაშინ როცა ვჩუმდებით.-ამის შესახებ „სტრატეგია აღმაშენებლის“ ლიდერმა, გიორგი ვაშაძემ განაცხადა, მას შემდეგ რაც პარლამენტის საგამოძიებო კომისიის სხდომაზე გამოუცხადებლობის გამო მოსამართლემ პატიმრობა მიუსაჯა.

„ჩვენ გვაკავებენ არა დანაშაულისთვის, არამედ სიმართლისთვის, სამშობლოს სიყვარულისთვის. მე ახლა გავდივარ იმ გზას, რომელიც ბევრმა ღირსეულმა ქართველმა გაიარა საქართველოს თავისუფლებისთვის.

მე მხოლოდ ერთი ქართველი ვარ იმ ათიათასებიდან, ვინც არ ნებდება.

ბორკილებით არ იკარგება თავისუფლება , თავისუფლებას ვკარგავთ მაშინ როცა ვჩუმდებით.

მარცხისთვის განწირული რეჟიმი ცდილობს გადარჩეს მაგრამ ეს ვერ უშველით. 

მე ვრჩები ქართველ ხალხთან!ვიბრძვით ღირსებით და ბოლომდე ,,-გიორგი ვაშაძე.

„სტრატეგია აღმაშენებლის“ ლიდერი, გიორგი ვაშაძე სასამართლომ პარლამენტის დროებით საგამოძიებო კომისიის მოთხოვნის შეუსრულებლობის ფაქტზე დამნაშავედ ცნო. მოსამართლე ნინო გალუსტაშვილის გადაწყვეტილებით, მას 7 თვით თავისუფლების აღკვეთა მიესაჯა. ამასთან, აეკრძალა თანამდებობის დაკავება 2 წლის ვადით

ქუთაისში მდებარე პარლამენტის ყოფილი შენობის მიმდებარე ტერიტორია ინფრასტრუქტურის მინისტრმა რევაზ სოხაძემ ადგილობრივი და ცენტრალური ხელისუფლების წარმომადგენლებთან ერთად მოინახულა,გაეცნო ტერიტორიის განვითარების პოტენციალს და გამ სამუშაო შეხვედრა გამართა.

შეხვედრაზე იმსჯელეს ტერიტორიის ეფექტიანად გამოყენების გზებზე და შესაძლო პროექტებზე, რაც ქალაქის განვითარებას და მოსახლეობისთვის ახალი ფუნქციური სივრცეების შექმნას შეუწყობს ხელს.

პარლამენტის შენობა ქუთაისში 2012 წლის 26 მაისს გაიხსნა. ,,ქართული ოცნების,, ხელისუფლებაში მოსვლის შემდეგ,2019 წლიდან პარლამენტი კვლავ თბილისში დაბრუნდა.2022 წლიდან ქუთაისის შენობაში ტექნოლოგიური ჰაბის გახსნა დაკანონდა,თუმცა შენობა ამ დრომდე უფუნქციოა.

ქუთაისის მუნიციპალიტეტის მერის მოადგილედ გიორგი ცხაკაია დაინიშნა.
ახალი მოადგილე ქუთაისის მერის მოვალეობის შემსრულებელმა დავით ერემეიშვილმა მერიის თანამშრომლებს წარუდგინა.

გიორგი ცხაკაია სხვადასხვა წლებში მუშაობდა: საქართველოს ფინანსთა სამინისტროს შემოსავლების სამსახურში , საქართველოს ფინანსთა სამინისტროს საგამოძიებო სამსახურში, საქართველოს განათლების სამინისტროში , ს.ს. „საქართველოს ბანკში".

დამთავრებული აქვს ქუთაისის აკაკი წერეთლის სახელობის სახელმწიფო უნივერსიტეტი (სამართლის ფაკულტეტი, ბაკალავრი) და თბილისის ეკონომიკურ ურთიერთობათა სახელმწიფო უნივერსიტეტი(სამართლის მაგისტრი).

გიორგი ცხაკაია ქუთაისის მუნიციპალიტეტის მერიაში ჯანდაცვის, სოციალურ და ტურიზმის სფეროს გაუწევს კურატორობას.

შინაგან საქმეთა მინისტრის პოსტზე ვახტანგ გომელაურს გელა გელაძე შეცვლის. გელაძე მინისტრის პოსტზე საქართველოს პრემიერ-მინისტრმა ირაკლი კობახიძემ მთავრობის ადმინისტაციაში გამართულ ბრიფინგზე წარადგინა. 

გელა გელაძე ამ დრომდე სახელმწიფო უსაფრთხოების სამსახურის უფროსის მოადგილის პოსტს იკავებდა.მანამდე კი, გელაძე ჯერ განათლების მინისტრის მოადგილე, შემდეგ კი თავდაცვის მინისტრის მოადგილე იყო.

„მინდა გაცნობოთ, რომ საქართველოს შინაგან საქმეთა მინისტრის პოსტზე დღეს დაინიშნა გელა გელაძე. გელა გელაძე არის გამორჩეული კვალიფიკაციის მქონე იურისტი. მას აქვს შინაგან საქმეთა სამინისტროში მუშაობის მრავალწლიანი სტაჟი. გარდა ამისა, ის მუშაობდა საქართველოს პროკურატურაში, სახელმწიფოს დაცვის სპეციალურ სამსახურში, იუსტიციის სამინისტროში, სასჯელაღსრულებისა და პრობაციის სამინისტროში, განათლების, მეცნიერებისა და ახალგაზრდობის სამინისტროში სხვადასხვა საპასუხისმგებლო პოზიციაზე. ასევე, მუშაობდა კერძო სექტორში მაღალ მენეჯერულ პოზიციაზე. გასული რამდენიმე წლის განმავლობაში, გელა გელაძე იკავებდა ჯერ განათლების, მეცნიერების და ახალგაზრდობის მინისტრის მოადგილის თანამდებობას, მოგვიანებით, თავდაცვის მინისტრის მოადგილის თანამდებობას და დღემდე, ის იკავებდა სუს-ის უფროსის მოადგილის თანამდებობას. დღეიდან, ბატონი გელა უკვე შეასრულებს საქართველოს შინაგან საქმეთა მინისტრის მოვალეობას. მინდა, ბატონ გელას ვუსურვო დიდი წარმატება ამ თანამდებობაზე და თავის საქმიანობაში. დარწმუნებული ვარ, მისი ხელმძღვანელობით გაგრძელდება წინსვლა და განვითარება შინაგან საქმეთა სამინისტროში და გაგრძელდება ზრუნვა თითოეული პოლიციელის ინტერესებზე. დარწმუნებული ვარ, კიდევ უფრო გაძლიერდება ჩვენი სისტემა, შინაგან საქმეთა სამინისტროს სისტემა. კიდევ ერთხელ, მინდა, მას ამ ყველაფერში წარმატებები ვუსურვო“,- განაცხადა კობახიძემ.

შეგახსენებთ, რომ შინაგან საქმეთა მინისტრმა, ვახტანგ გომელაურმა თანამდებობის დატოვების შესახებ დღეს განაცხადა.

იმერეთში სახელმწიფო რწმუნებულის პირველ მოადგილედ მამუკა ხიმშიაშვილი დაინიშნა. სახელმწიფო რწმუნებულმა ლევან ზალკალიანმა ახალი მოადგილე თანამშრომლებს წარუდგინა და წარმატებები უსურვა. 

მამუკა ხიმშიაშვილი კურატორობას გაუწევს: ქონების პრივატიზებისა და სასარგებლო წიაღისეულის საკითხებს, სახელმწიფო შესყიდვებს, უხელმძღვანელებს სატენდერო კომისიას, ასევე განესაზღვრა კოორდინაცია სამინისტროებთან და მათ რეგიონულ დაწესებულებებთან. გარდა ამისა, ჩაიბარა საერთაშორისო ურთიერთობების მიმართულება. 

მამუკა ხიმშიაშვილს საჯარო სექტორში ასევე, პოლიტიკურ თანამდებობებზე მუშაობის დიდი გამოცდილება აქვს. დღემდე ის იყო ქუთაისის მერის მოადგილე, 2023-2024 წლებში ცაგერის მუნიციპალიტეტის მერის პირველი მოადგილე, 2021-2023 წლებში ამბროლაურის მუნიციპალიტეტის მერის მოადგილე. სხვადასხვა პერიოდში მუშაობდა საქართველოს დევნილთა, შრომის, ჯანმრთელობისა და სოციალური დაცვის, იუსტიციისა და საქართველოს შინაგან საქმეთა სამინისტროებში.

იმერეთში სახელმწიფო რწმუნებულის მოადგილედ გრიგოლ დალაქიშვილი დაინიშნა. ის კურატორობას გაუწევს ადგილობრივ თვითმმართველობის ორგანოებთან ურთიერთობის, ასევე იძულებით გადაადგილებულ პირთა საკითხებს, ჯანმრთელობისა და სოციალური დაცვის თემებს.

ასევე განესაზღვრა კულტურული და ისტორიული ძეგლების დაცვის, განათლების, მეცნიერების, სპორტისა და ახალგაზრდობის განვითარების ხელშეწყობის საკითხთა კოორდინაცია რეგიონში. 

გრიგოლ დალაქიშვილი იყო ქუთაისის მერის მოადგილე, ასევე 2017-2019 წლებში იმერეთში სახელმწიფო რწმუნებულის პირველი მოადგილის თანამდებობაზე მუშაობდა. ბოლო წლებში კი სსიპ ეროვნული სატყეო სააგენტოს იმერეთის სატყეო სამსახურის უფროსის თანამდებობას იკავებდა.