- კულტურა
- გადასვლები: 84
იმერეთის 4 მუნიციპალიტეტის თეატრალურმა დასებმა კულტურის სამინისტროს მიერ გამოცხადებულ კონკურსში გაიმარჯვეს
საქართველოს კულტურის, სპორტისა და ახალგაზრდობის სამინისტრომ კონკურსის - „სამოყვარულო/მუნიციპალური/კერძო თეატრალური დასების საქმიანობის ხელშეწყობა“ - გამარჯვებული პროექტები გამოავლინა.
კონკურსისთვის გამოიყო 100 000 ლარი. სამინისტროს განცხადებით მომართა კონკურსში მონაწილეობის 14-მა მსურველმა.
კონკურსის მიზანია საქართველოში მოქმედი სამოყვარულო თეატრალური დასების პოპულარიზაციისა და შემოქმედებითი საქმიანობის ხელშეწყობა, თეატრალურ პროცესში სამოყვარულო დასების როლისა და მნიშვნელობის გაზრდა.
დაფინანსებული პროექტებია:
1. "პოლიკარპე კაკაბაძის დაბადების 130-ე წლისთავისადმი მიძღვნილი საიუბილეო სპექტაკლი „ყვარყვარე თუთაბერი“" (განმახორციელებელი ა(ა)იპ იპოლიტე ხვიჩიას სახელობის ხონის კულტურის ცენტრი);
2. "პაოლო იაშვილის სახელობის საჩხერის თეატრში განსახორციელებელი სპექტაკლის, ბერტოლტ ბრეხტის ,,მრგვალი და მახვილი თავების“, სადადგმო ხარჯი" (განმახორციელებელი ა(ა)იპ პაოლო იაშვილის სახელობის საჩხერის თეატრი);
3. "სპექტაკლ „ვალის“ დადგმა" (განმახორციელებელი ა(ა)იპ ვანის მუნიციპალიტეტის კულტურული ღონისძიებების ორგანიზებისა და მართვის ცენტრი);
4. "ლაგოდეხის დრამატული და თოჯინების თეატრის ტექნიკური აღჭურვა" (განმახორციელებელი ა(ა)იპ ლაგოდეხის მუნიციპალიტეტის კულტურის, სპორტისა და ახალგაზრდობის საქმეთა განვითარების ცენტრი);
5. "ბაღდათის სახალხო თეატრის მატერიალურ-ტექნიკური ბაზის აღჭურვა" (განმახორციელებელი ა(ა)იპ ბაღდათის ხელოვნებისა და კულტურის განვითარების ცენტრი).
2022 წელს ამავე სახელწოდებით გამოცხადებული კონკურსის ბიუჯეტი იყო 70 000 ლარი. კონკურსში მონაწილე 23 პროექტიდან დაფინანსდა სამი პროექტი.
