ქუთაისის მერვე მოწვევის საკრებულოს ოპოზიციონერი წევრი, ელეონორა არჩაია განცხადებას ავრცელებს. როგორც პარტია ,,გახარია საქართველოსთვის,, წარმომადგენელი წერს, მისთვის პატივი და დიდი პასუხისმგებლობაა ქალაქის საკრებულოში კიდევ ერთხელ წარმოადგენდეს ქუთაისელი მოსახლეობის ინტერესებს.
,,აქტიურად გავაგრძელებ თქვენი პრობლემების გაჟღერებას და მათი მოგვარებისთვის ბრძოლას, დავაყენებ ქალაქისთვის მნიშვნელოვან ინიციატივებს, მეტად კრიტიკული ვიქნები მერიის და საკრებულოს ზედამხედველობის მიმართულებით. შეგხვდებით და მოგისმენთ ყველას, ვისაც ამის სურვილი გექნებათ.
დიდი მადლობა მინდა გადაგიხადოთ თითოეულ ამომრჩეველს, რომლებიც მიუხედავად არასამართლიანი გარემოსა, მოხვედით და თქვენი პოზიცია დააფიქსირეთ ოცნების ხელისუფლების წინააღმდეგ! მადლობა “გახარია-საქართველოსთვის” ქუთაისის საუკეთესო გუნდს, რომელმაც დაუღალავი შრომა და ენერგია ჩადო საერთო საქმეში და არც ერთი წამით დაუხევია უკან!
ჩემი საქმიანობის მიზანი ყოველთვის ერთია - გულწრფელად და დაუღალავად ვემსახურო ჩვენს მოსახლეობას, და ჩემი წვლილი შევიტანო მათი ცხოვრების გაუმჯობესებაში.,,- წერს სოციალურ ქსელში ელეონორა არჩაია.
ელეონორა არჩაია საკრებულოს დღევანდელ სხდომას არ ესწრებოდა.
