საქართველოს პროფკავშირების გაერთიანების ინფორმაციით, ჭიათურის მაღაროებში დასაქმებულებს,რომლებიც რამდენიმე თვეა უსამსახუროდ არიან დარჩენილები, სააღდგომოდ ერთი თვის ხელფასის 60% დაერიცხებათ.რაც შეეხება იმ მაღაროელებს,რომლებსაც ,,ლიბერთი ბანკმა,, სესხის პროცენტის სანაცვლოდ დარიცხული ხელფასები სრულად ჩამოაჭრა,პროფკავშირების წარმომადგენლის, თამთა მუზაშვილის ინფორმაციით,  ასეთმა ადამიანებმა ჭიათურის პროფკავშირების ოფისს უნდა მიაკითხონ.მისი თქმით,პრობლემის მოსაგვარებლად ბანკთან მოლაპარაკებები მიმდინარეობს 

,,ჭიათურის მაღაროებში დასაქმებული თანამშრომლებისთვის ხელფასის 60%-ის დარიცხვა 4 აპრილს დაიწყო და 7 აპრილს დასრულდება. ამ საკითხთან დაკავშირებით, დღეს ჭიათურაში დასაქმებულებთან სამუშაო შეხვედრა გაიმართება. 

აქვე, დამატებით გაცნობებთ, რომ მიღწეულია შეთანხმება, სააღდგომოდ კიდევ ერთი თვის ხელფასის 60%-ის დარიცხვასთან დაკავშირებით.  

იმ თანამშრომლებს, რომლებიც მოცდენის პერიოდში აგრძელებდნენ მუშაობას, სრულად დაერიცხებათ ხელფასის 100%, ისევე როგორც ხელფასის დარიცხვის პირველ შემთხვევაში. 

აქვე, გვინდა აღვნიშნოთ, რომ 8 აპრილიდან 3600 თანამშრომელს პროფკავშირების სახელით დაურიგდება სპეციალური ვაუჩერი, რომლის მეშვეობითაც მაღაროელები მიიღებენ პირველადი მოხმარების საკვები პროდუქტების ნაკრებს. 

სამმხრივი კომისიის მუშაობის შედეგად უკვე გამოიკვეთა კონტურები მაღაროების შენარჩუნებასთან დაკავშირებით. მნიშვნელოვანია, რომ სამმხრივ კომისიასთან არსებული სამუშაო ჯგუფის ფარგლებში შესწავლილი იქნება ყველა შესაძლებლობა, რაც უკავშირდება მიწისქვეშა სამუშაოების განახლებას. 

პროცესში ჩართულნი არიან ექსპერტები, რომლებიც ადგილობრივ სპეციალისტებთან და საკითხით დაინტერესებულ ჯგუფებთან კომუნიკაციის შედეგად, ჭიათურაში ადგილზე შეისწავლიან მაღაროების გახსნის შესაძლებლობას. 

აღსანიშნავია, რომ ერთ-ერთი მნიშვნელოვან შემაფერხებელ ფაქტორებს შორისაა შუქრუთის საკითხი, რომელიც ფუნდამენტურ გადაწყვეტას საჭიროებს, რაც გულისხმობს იმას, რომ შუქრუთის მაღაროს გახსნის გარეშე წარმოების განახლება შეუძლებელია.

პროფკავშირები ყოველთვის იქ ვართ, სადაც ჩვენი ხმაა საჭირო — მშრომელების გვერდით!

დღევანდელი გამოწვევების მიუხედავად, ვაგრძელებთ ბრძოლას დასაქმებულთა ღირსეული შრომითი პირობებისა და სოციალური გარანტიების უზრუნველსაყოფად. ჩვენმა ძალისხმევამ უკვე კონკრეტულ შედეგს მიაღწია. ამის მაგალითია, ის შეთანხმება, რომლის მეშვეობითაც მაღაროელები, იძულებითი მოცდენის მიუხედავად, ხელფასის 60%-ს მიიღებენ.

ეს მნიშვნელოვანი ნაბიჯია, რომელიც ადასტურებს, რომ ერთიანობა და თანმიმდევრული მოქმედება შედეგს იძლევა.

ჩვენ ბოლომდე ვიქნებით მაღაროელების გვერდით, ყველა გადაწყვეტილებასა და მოლაპარაკებაში. ჭიათურელი მშრომელებისთვის ღირსეული პირობების შექმნა ჩვენთვის მნიშვნელოვანია, სწორედ ამიტომ ვაგრძელებთ ბრძოლას მშრომელთა ინტერესების დასაცავად,,-საქართველოს პროფკავშირების გაერთიანება.

ჭიათურაში მოშიმშილე მაღაროელების შიმშილობა შეწყვიტეს. როგორც გვერდი ,,მაღაროელი,, წერს, მოშიმშილეება ჭიათურისა და საჩხერის მიტროპოლიტის , მეუფე დანიელის თხოვნა გაითვალისწინეს და შიმშილობა  შეწყვიტეს.

მერაბ სარალიძემ და სიმონ მიქაცაძემ შიმშილობა 4 აპრილს დაიწყეს. 

,,მეუფე დანიელი ლოცვითა და კურთხევით, ბიჭებმა შიმშილობა შეწყვიტეს. ქადაგებისას მეუფემ აღნიშნა, რომ ამ მარხვის პერიოდში და გაჭირვების ჟამს ქრისტეს არ უნდა მოვშორდეთ — პირიქით, უფრო მეტად უნდა დავუახლოვდეთ და ვილოცოთ ჩვენი სულის გადასარჩენად.” მეუფემ პირადად მოინახულა მოშიმშილეები და აღუთქვა დახმარების სურვილი , შესაძლებლობებიდან გამომდინარე. უფალმა დალოცოს მეუფე დანიელი და დედა ეკლესიის მღვდელთმსახურები.,,-წერს გვერდი ,,მაღაროელი,,

ჭიათურაში მაღაროელთა საპროტესტო აქცია თვეზე მეტია გრძელდება .მაღაროელების მითხოვნაა, სახელმწიფო ჩაერთოს მათი პრობლემების მოგვარებაში, კომპანია ,,ჯორჯიან მანგანეზმა,, დატოვოს ქალაქი და სრულად დაირიცხოს სახელფასო დავალიანება.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, უკანონო ტყითსარგებლობასთან ბრძოლის ფარგლებში, 2025 წლის 01 მარტიდან 31 მარტის ჩათვლით, უკანონო ტყითსარგებლობის 150 ფაქტი გამოავლინეს; მათ შორის, 123 ხე-ტყის უკანონო მოპოვება-ტრანსპორტირებას ეხება, 27 კი, სახერხი საამქროების მიერ ტექნიკური რეგლამენტის დარღვევისა და უკანონო სახერხი საამქროების ფაქტებია. სამართალდარღვევებიდან 19 ფაქტი სისხლის სამართლის დანაშაულის ნიშნებს შეიცავს.  

უკანონო ტყითსარგებლობის ყველაზე მეტი - 61 ფაქტი გამოვლენილია კახეთში. სამეგრელო-ზემო სვანეთში დაფიქსირდა 32 სამართალდარღვევა, იმერეთში - 19, ქვემო ქართლში - 15, აჭარაში - 8, გურიაში - 6, მცხეთა-მთიანეთში - 4, შიდა ქართლში - 3, სამცხე-ჯავახეთში კი, 1. 

სამართალდარღვევა გამოვლენილია დედაქალაქშიც; თბილისში ხე-ტყის უკანონო ტრანსპორტირების 1 ფაქტია გამოვლენილი. 

ჯამში ამოღებულია 91 კუბურ მეტრზე მეტი მოცულობის უკანონოდ მოპოვებული ხე-ტყე.

ამავე პერიოდში, ქვეყნის მასშტაბით, დალუქულია 9 ერთეული არარეგისტრირებული სახერხი საამქრო. 

მასალები, შემდგომი რეაგირების მიზნით, შესაბამის უწყებებში გადაიგზავნა.

უკანონო ტყითსარგებლობასთან ბრძოლა გარემოსდაცვითი ზედამხედველობის დეპარტამენტისთვის პრიორიტეტია. მიმდინარე წლის პირველ სამ თვეში, დეპარტამენტის თანამშრომლებმა, ქვეყნის მასშტაბით, უკანონო ტყითსარგებლობის 511 ფაქტი გამოავლინეს. დალუქულია 20 უკანონო სახერხი საამქრო.  

 უახლოეს დღეებში საქართველოს ზოგიერთ რაიონში მოსალოდნელია ხანმოკლე წვიმა და ელჭექი.

ქ. თბილისში შესაძლოა ხანმოკლე წვიმა ელჭექით აღინიშნოს. ჰაერის ტემპერატურა დღისით +20, +22 გრადუსი დაფიქსირდება. 

სანაპირო რაიონებში (ბათუმი, ქობულეთი, ანაკლია, ფოთი): ზოგან გაწვიმდება. ჰაერის ტემპერატურა დღისით +20, +22 გრადუსი დაფიქსირდება. 

დასავლეთ საქართველოს დაბლობ რაიონებში (ზესტაფონი, ქუთაისი, სამტრედია, ზუგდიდი, მარტვილი, ოზურგეთი) ზოგან გაწვიმდება. ჰაერის ტემპერატურა დღისით +21, +23 გრადუსი დაფიქსირდება. 

დასავლეთ საქართველოს მთიან რაიონებში (ამბროლაური, ონი, ცაგერი, შოვი, ჭიათურა, საჩხერე, ხულო, რიკოთის უღელტეხილი): ზოგან გაწვიმდება. ჰაერის ტემპერატურა დღისით +20, +22 გრადუსი დაფიქსირდება. 

დასავლეთ საქართველოს მაღალმთიან რაიონებში (მესტია, ბახმარო): ზოგან გაწვიმდება. ჰაერის ტემპერატურა დღისით +12, +14 გრადუსი დაფიქსირდება. 

ქართლში (რუსთავი, ბოლნისი, მარნეული, გარდაბანი, გორი, ცხინვალი): ზოგან ხანმოკლე წვიმა და ელჭექია მოსალოდნელი. ჰაერის ტემპერატურა დღისით +22, +24 გრადუსი დაფიქსირდება. 

კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო): ზოგან ხანმოკლე წვიმა და ელჭექია მოსალოდნელი. ჰაერის ტემპერატურა დღისით +21, +23 გრადუსი დაფიქსირდება. 

აღმოსავლეთ საქართველოს მთიან რაიონებში (ახალციხე, ბორჯომი, დუშეთი, თიანეთი, ფასანაური): ზოგან ხანმოკლე წვიმა და ელჭექია მოსალოდნელი. ჰაერის ტემპერატურა დღისით +15, +20 გრადუსი დაფიქსირდება. 

აღმოსავლეთ საქართველოს მაღალმთიან რაიონებში (ახალქალაქი, წალკა, ბაკურიანი, გუდაური, ომალო): ზოგან ხანმოკლე წვიმა და ელჭექია მოსალოდნელი. ჰაერის ტემპერატურა დღისით +8, +13 გრადუსი დაფიქსირდება.

ჭიათურელ მაღაროელთა ნაწილს ხელფასი დაერიცხა, თუმცა თანხა ,,ლიბერთი ბანკმა,, ჩამოაჭრა. ადგილზე  ვითარების გასარკვევად მისულებს კი ბანკში განუცხადეს,რომ კიდევ დარჩათ ვალი 355 ლარის ოდენობით.

,,შევედი ბანკში და გამომიშვეს განულებული. კიდევ ვალი დამადეს,ამხელა ტყუილი როგორ შეიძლება ,გაამწარო ისედაც გამწარებული ხალხი.,,-ამბობს ერთ-ერთი მაღაროელი.

ამ ეტაპზე ერთი თვის ხელფასი 400 ადამიანს დაერიცხა,აქედან უმეტესობას ბანკმა თანხმა სესხის დავალიანების გამო ჩამოაჭრა.

  სურსათის ეროვნული სააგენტოს თბილისის საქალაქო სამსახურის ინსპექტორებმა 28 მარტს შპს "ვიმ-ბილ-დან საქართველოში" (ს/კ 204546553 (სოფლის ნობათი) სახელმწიფო კონტროლი განახორციელეს. 

ინსპექტირების შედეგად საწარმოში კრიტიკული შეუსაბამობა არ გამოვლენილა, თუმცა, დაფიქსირდა სურსათის შესახებ ინფორმაციის მიწოდების წესის დარღვევა, რის გამოც ბიზნესოპერატორი დაჯარიმდა სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის შესაბამისად. 

გარდა ამისა, შპს "ვიმ-ბილ-დან საქართველოს" დაევალა აზერბაიჯანში წარმოებული რძის 5 ნიმუშის აღება (რომლიდანაც ერთი არის ბავშვთა კვებისთვის განკუთვნილი) და აფლატოქსინ M1-ზე გამოკვლევა; ასევე არასწორად ეტიკეტირებული სურსათის ბაზრიდან გამოთხოვა. 

სააგენტოს ზედამხედველობით აღებული ნიმუშები გაიგზავნა აკრედიტებულ ლაბორატორიაში. 

ლაბორატორიული კვლევის შედეგად აფლატოქსინ M1-ის გადაჭარბებული ოდენობა დაფიქსირდა ხუთ ნიმუშში. კერძოდ: 

სასმელი რძე საბავშვო, ულტრაპასტერიზებული - 2,5% ცხიმიანობით - დამზადების თარიღი: 04.02.2025, ვარგისიანობის ვადა: 03.08.2025; 

სასმელი რძე რჩეული ულტრაპასტერიზებული, 1,5% ცხიმიანობით - დამზადების თარიღი: 12.02.2025, ვარგისიანობის ვადა: 11.08.2025; 

სასმელი რძე რჩეული ულტრაპასტერიზებული, 1,5% ცხიმიანობით - დამზადების თარიღი: 10.02.2025, ვარგისიანობის ვადა: 09.08.2025; 

სასმელი რძე რჩეული ულტრაპასტერიზებული, 2,5% ცხიმიანობით - დამზადების თარიღი: 09.02.2025, ვარგისიანობის ვადა: 08.08.2025; 

⁠სასმელი რძე რჩეული ულტრაპასტერიზებული, 3,2% ცხიმიანობით - დამზადების თარიღი: 02.02.2025, ვარგისიანობის ვადა: 01.08.2025. 

შპს „ვიმ-ბილ-დან საქართველოს“ დაევალა დასახელებული სურსათის პარტიების სარეალიზაციო ქსელიდან ამოღება/გამოთხოვა.

 სურსათის ეროვნული სააგენტო მოუწოდებს მომხმარებელს, არ გამოიყენოს აღნიშნული რძე.

აფლატოქსინი წარმოიქმნება ობის სოკოებისაგან. აფლატოქსინ B1-ით დაბინძურებული საკვები ხვდება ცხოველის ორგანიზმში, საიდანაც გადადის რძეში და გარდაიქმნება M1 აფლატოქსინად, რაც საფრთხეს უქმნის ადამიანის ჯანმრთელობას.