ბაღდათის მუნიციპალიტეტში სახელმწიფო პროგრამის „ჩემი პირველი ნერგის“ ფარგლებში, გამწვანების ღონისძიებები გაიმართა.

ქალაქ ბაღდათში ცენტრალურ სტადიონთან და სოფელ ნერგეეთში 138 სხვადასხვა ჯიშის ნერგი საჯარო სკოლების პირველკლასელებმა დარგეს. 

სახელმწიფო პროგრამა „ჩემი პირველი ნერგი“ მუნიციპალიტეტის ადგილობრივი თვითმმართველობის მხარდაჭერით და საგანმანათლებლო რესურსცენტრის ჩართულობით მოეწყო. გამწვანების ღონისძიებას ბაღდათის მუნიციპალიტეტის მერი ნოდარ გიორგიძე, მოადგილეები, საკრებულოს თავმჯდომარე გურამ კიკნაველიძე ადგილობრივი ხელისუფლების და რესურსცენტრის წარმომადგენლები შეუერთდნენ.

აღნიშნული ინიციატივის მიზანია, ბავშვებში ადრეული ასაკიდან გარემოსდაცვითი ცნობიერების ამაღლება, ბუნების მიმართ პასუხისმგებლიანი დამოკიდებულების ჩამოყალიბება და გარემოზე ზრუნვის კულტურის განვითარება.

 რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა იმერეთში,ზესტაფონის მუნიციპალიტეტში,სოფელ შორაპანში, ისტორიული რკინიგზის სადგურისა და ყოფილი ელემენტების ქარხნის ტერიტორიაზე არსებული შენობების რეკონსტრუქციისა და სარეკრეაციო სივრცის პროექტირებისთვის კონკურსი გამოაცხადა.

პროექტის მიზანია ტერიტორიის კომპლექსური განვითარება, შორაპნის ისტორიული და ინდუსტრიული მემკვიდრეობის შენარჩუნება და მათი თანამედროვე, საზოგადოებრივი დანიშნულებით ფუნქციონირება.

რეაბილიტაციის პროცესში განსაკუთრებული ყურადღება დაეთმობა შენობების თავდაპირველი იერსახით აღდგენას, ყოფილი დეპოს შენობა კი განიხილება როგორც საექსპოზიციო და შემეცნებითი სივრცე, რომელიც წარმოაჩენს რეგიონის ინდუსტრიულ და რკინიგზის ისტორიას.

მარტვილიდან ცოფზე დაკვირვების მიზნით გადაყვანილი ძაღლების ექვსთვიანი საზედამხედველო პერიოდი ამოიწურა.

 სურსათის ეროვნული სააგენტოს ძაღლების ჰიპერპოპულაციის მართვის პროგრამის ფარგლებში, თერჯოლის მუნიციპალიტეტში, საქართველოს ცხოველთა ფედერაციის (GAF) მიერ სპეციალურად მოწყობილ სივრცეში, ცოფზე დაკვირვების მიზნით მოთავსებული ძაღლებისთვის კანონმდებლობით განსაზღვრული 6 თვიანი (დაავადების ინკუბაციური პერიოდი) საზედამხედველო პერიოდი ამოიწურა. 

ძაღლების ჰიპერპოპულაციის მართვის პროგრამის ეკიპაჟებმა ცხოველები იმერეთის ინტერმუნიციპალურ თავშესაფარში გადაიყვანეს, სადაც მათ შესაბამისი ვეტერინარული მანიპულაციები (სტერილიზაცია/კასტრაცია, ცოფის საწინააღმდეგო ვაქცინაცია, იდენტიფიკაცია) ჩაუტარდათ 

ერთი კვირის განმავლობაში ძაღლებს გააჩუქებენ თერჯოლის მუნიციპალიტეტის სოფელ თავასაში არსებული სპეციალურად გამოყოფილი ტერიტორიიდან, სადაც ძაღლებმა ექვსთვიანი საზედამხედველო პერიოდი გაიარეს. 

ცხოველებს, რომლებსაც არ გამოუჩნდებათ პატრონი, პროგრამის ეკიპაჟები, კანონმდებლობის შესაბამისად, ბუნებრივ არეალში - პირვანდელ ლოკაციებზე დააბრუნებენ. 

მიმდინარე წლის მაისში, მარტვილის მუნიციპალიტეტიდან იმერეთის ინტერმუნიციპალურ თავშესაფარში გადაყვანილ 30 ძაღლზე მზრუნველობა საქართველოს ცხოველთა ფედერაციამ (GAF) ითავა. 

სურსათის ეროვნული სააგენტოს სპეციალისტების მიერ სივრცის შემოწმებისა და დადგენილ მოთხოვნებთან შესაბამისობის დადასტურების შემდეგ, ცხოველები თერჯოლის მუნიციპალიტეტში, სპეციალურად მოწყობილ სივრცეში განათავსეს.

სააგენტო, კანონმდებლობის მოთხოვნების, ცხოველთა კეთილდღეობის პრინციპების და საზოგადოებრივი უსაფრთხოების დაცვის მიზნით, ძაღლებზე ზედამხედველობასა და მონიტორინგს ექვსი თვის განმავლობაში მუდმივად ახორციელებდა.

ქალაქ ონის შესასვლელთან, შიდასახელმწიფოებრივი მნიშვნელობის ქუთაისი (ჭომა)-ალპანა–მამისონის უღელტეხილის საავტომობილო გზის კმ107–კმ112 მონაკვეთზე მეწყრული პროცესების სტაბილიზაციისა და დაზიანებული გზის აღდგენის სამუშაოები დასრულდა.

აღნიშნულ მონაკვეთზე ყველა სახის ავტოტრანსპორტის მოძრაობა სრულად აღდგენილია.

სამუშაოების ფარგლებში განხორციელდა მეწყრული უბნის გამაგრება, დაზიანებული გზის აღდგენა და დამცავი კედლის მოწყობა. ჩატარებული სამუშაოების მიზანი იყო ფერდობის სტაბილიზაცია და საავტომობილო გზაზე უსაფრთხო გადაადგილების უზრუნველყოფა.

შეგახსენებთ, რომ 2026 წლის 11 ივლისს ქალაქ ონის შესასვლელთან, მთის ფერდობზე განვითარებული მეწყრული პროცესების შედეგად, საავტომობილო გზის სავალი ნაწილი დაზიანდა, რის გამოც ძირითად გზაზე ავტოტრანსპორტის მოძრაობა შეიზღუდა.

მოძრაობის უწყვეტობის უზრუნველსაყოფად მოეწყო დროებითი შემოვლითი გზა, რომლითაც ავტოტრანსპორტი ძირითადი გზის აღდგენის პერიოდში გადაადგილდებოდა.

აღდგენითი სამუშაოების დასრულების შემდეგ ავტოტრანსპორტის მოძრაობა კვლავ ძირითად გზაზე ხორციელდება.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა გადამფრენ ფრინველებზე ნადირობის სეზონის გახსნიდან 2 თვეში, 2026 წლის 22 აგვისტოდან 22 ოქტომბრამდე 1069 სამართალდარღვევა გამოავლინეს. 

ყველაზე მეტი - 331 ფაქტი დაფიქსირდა იმერეთში. 233 სამართალდარღვევა გამოვლენილია სამეგრელო-ზემო სვანეთის რეგიონული სამმართველოს სამოქმედო ტერიტორიაზე, 148 - გურიაში, 98 - შიდა ქართლში, 68 – სამცხე-ჯავახეთში, 55 - ქვემო ქართლში, 53 - აჭარაში, 51 - მცხეთა-მთიანეთში, 22 კი - კახეთში.

სამართალდარღვევები დაფიქსირდა დედაქალაქშიც. სეზონის გახსნიდან 2 თვეში, თბილისში ნადირობის წესების დარღვევის 10 ფაქტია გამოვლენილი.  

 გამოვლენილი სამართალდარღვევებიდან, 927 აკრძალული იარაღით, მეთოდით ან საშუალებით ნადირობის ფაქტია. 60 შემთხვევაში სამართალდამრღვევები გარემოდან გადამფრენი ფრინველების ამოღებაზე დაწესებული მოსაკრებლის გადახდის გარეშე ნადირობდნენ, 50 შემთხვევაში მონადირეებმა ნადირობის წესები დაარღვიეს, 32 შემთხვევაში კი მოქალაქეები მუნიციპალიტეტის ტერიტორიაზე ნადირობდნენ. 

ნადირობის სეზონის გახსნიდან 2 თვეში დეპარტამენტის თანამშრომლების მიერ ამოღებულია 909 უკანონო საშუალება - ფრინველების მოსაზიდი ხმოვანი მოწყობილობა ე.წ. მანოკი. 

მიმდინარე წლის 22 აგვისტოდან 22 ოქტომბრამდე, უკანონოდ მოპოვებული ბუნებრივი რესურსის რაოდენობა 70 ერთეულს შეადგენს. ბრაკონიერებმა უკანონოდ მოინადირეს 64 მწყერი, ასევე თითო-თითო კაკაბი, ოფოფი, ირაო და ხოხობი. გადამფრენ ფრინველებზე ნადირობის სეზონის განმავლობაში, ასევე კურდღელსა და ტურაზე ნადირობის ფაქტებიც დაფიქსირდა.  

ქუთაისში ჰერალდიკისა და ვექსილოლოგიის IV საერთაშორისო კონფერენცია გაიმართა. 

კონფერენცია სახელმწიფო სიმბოლიკისა და ჰერალდიკის დეპარტამენტის ორგანიზებით, ქუთაისის მერიისა და ქუთაისის სახელმწიფო ისტორიული მუზეუმის მხარდაჭერით იმართება.

ორდღიანი  კონფერენციის თემაა „ანტიკური სიმბოლოებიდან თანამედროვე ჰერალდიკამდე“. ღონისძიების მიზანია ჰერალდიკისა და ვექსილოლოგიის სფეროში არსებული სამეცნიერო კვლევების, ისტორიული წყაროებისა და თანამედროვე მიდგომების წარმოჩენა, დარგის აქტუალური საკითხების განხილვა და სხვადასხვა ქვეყნის სპეციალისტებს შორის პროფესიული და აკადემიური თანამშრომლობის გაღრმავება.