გარემოს დაცვისა და სოფლის მეურნეობის სამინისტროს გარემოსდაცვითი ზედამხედელობის დეპარტამენტის იმერეთის რეგიონული სამმართველოს თანამშრომლებმა, უკანონო ტყითსარგებლობის წინააღმდეგ ბრძოლის ფარგლებში, იმერეთში სამართალდარღვევები გამოავლინეს. 

2 უკანონო სახერხი საამქრო გამოვლენილია ხარაგაულის მუნიციპალიტეტის სოფელ გედსამანიასა და წყალტუბოს მუნიციპალიტეტის სოფელ ზედა მესხეთში. მოქალაქეებს არარეგისტრირებული ლენტური და ცირკული ტიპის სახერხი დანადგარები საკარმიდამო ეზოებში ჰქონდათ დამონტაჟებული. 

ვინაიდან ორივე ფაქტი შეიცავს სისხლის სამართლის დანაშაულის ნიშნებს, მასალები შემდგომი რეაგირების მიზნით შესაბამის უწყებებში გადაიგზავნა. 

ხე-ტყის უკანონო მოპოვების 4 ფაქტი დაფიქსირდა ხარაგაულის მუნიციპალიტეტის სოფლებში - ლეღვანში, დეისსა და მარელისში, სადაც მოქალაქეებმა უკანონოდ მოჭრეს სხვადსახვა სახეობის ჯამში 16 ერთეული ხე. 

ხარაგაულის მუნიციპალიტეტის სოფლებში - ვახანში, საქასრიასა და მარელისში, ასევე ხონის მუნიციპალიტეტის სოფელ ღვედში კი გამოვლენილია ხე-ტყის უკანონო მოპოვება-ტრანსპორტირების 4 ფაქტი.

მას შემდეგ, რაც აუქციონები დასრულდება, გამოჩნდება, ვის აქვს კონკრეტულად ინტერესი კონკრეტული სანატორიუმების მიმართ, ჩვენთვის მთავარია, რომ კურორტი განვითარდეს, დღეს არის ისეთი ტენდენციები, რომ ამისათვის ძალიან კარგი ნიადაგია შექმნილი და, შესაბამისად, ინტერესით ველით აუქციონის დასრულებას, - ამის შესახებ პრემიერ-მინისტრმა ირაკლი კობახიძემ წყალტუბოს სანატორიუმებთან დაკავშირებით დასმული კითხვის პასუხად განაცხადა.

კითხვაზე, აქვს თუ არა დაინტერესება ბიძინა ივანიშვილს სანატორიუმებთან დაკავშირებით, რაზეც იგი 2019 წელს საუბრობდა, პრემიერ-მინისტრმა აღნიშნა, რომ დე ფაქტო სანქციებმა ხელი შეუშალა ახალი ინიციატივების განხორციელებას, თუმცა, სახელმწიფოს აქვს ყველანაირი რესურსი კურორტის გასავითარებლად.

„2019 წელს, თუ არ ვცდები, ნამდვილად ითქვა ასე. ამის შემდეგ იყო, სამწუხაროდ, 2020-2021 წლები, კოვიდის პერიოდი და ამის შემდეგ იყო 2022 და შემდგომი წლები, როდესაც ბატონი ბიძინა ივანიშვილის მიმართ ამოქმედდა დე ფაქტო სანქციები. ამ დე ფაქტო სანქციებმა ხელი შეუშალა, ბუნებრივია, ახალი ინიციატივების განხორციელებას, მათ შორის ამაში ლოგიკურად მოიაზრება, ბუნებრივია, წყალტუბოს ინიციატივა. თუმცა, ჩვენ გვაქვს ყველანაირი რესურსი იმისათვის, რომ ეს კურორტი განვავითაროთ, ეს არის ჩვენთვის ერთ-ერთი უმთავრესი პრიორიტეტი და აუქციონი, რომელიც გამოცხადდა, ამისთვის შექმნის ძალიან კარგ საფუძველს.
ზოგადად, რა თქმა უნდა, დე ფაქტო სანქციები ზღუდავს ფინანსურ შესაძლებლობებს, ბუნებრივია, ეს ასეა. თუმცა ამის მიუხედავად, ბატონი ბიძინა ივანიშვილი ახორციელებს მთელ რიგ ძალიან მნიშვნელოვან პროექტებს. მას, მთლიანობაში, მრავალმილიარდიანი ინვესტიციები აქვს ჩადებული ჩვენი ქვეყნის განვითარებაში, ეს სასტუმროც ამის ერთ-ერთი მაგალითია და არამარტო. მათ შორის, ტურიზმის სექტორში აქვს უამრავი ძალიან მასშტაბური ინიციატივა განხორციელებული, რამაც თვისებრივად შეცვალა ჩვენი ტურისტული შესაძლებლობები, გააძლიერა ჩვენი ქვეყანა ამ სფეროში, შესაბამისად, სადაც ამის შესაძლებლობა არსებობს, არასდროს ერიდება, პირიქით, ყოველთვის კონკრეტული ინიციატივებით გამოდის ბატონი ბიძინა ივანიშვილი და ამის უამრავი მაგალითია. რაც შეეხება წყალტუბოს, ამასთან დაკავშირებით დეტალურად მოგახსენეთ. წყალტუბოს განვითარება ჩვენი პრიორიტეტია და ეს აუქციონი იქნება ძალიან კარგი დასაწყისი ამ ინიციატივის განხორციელებისთვის,“- აღნიშნა პრემიერმა.

20 ოქტომბრის ღამის საათებიდან აღმოსავლეთ, ხოლო 21 ოქტომბრიდან დასავლეთ საქართველოში, 22 ოქტომბრის დღის მეორე ნახევრამდე მოსალოდენელია დროგამოშვებით ნალექი, ქვეყნის ჩრდილო მთიან რაიონებში, ასევე შიდა ქართლის, ქვემო ქართლის და კახეთის რეგიონებში, ზოგან ძლიერი ინტენსივობით. შესაძლებელია ელჭექი და ქარის გაძლიერება.  

მოსალოდნელმა ძლიერმა ნალექებმა შესაძლებელია მდინარეებზე - ენგურზე, არაგვზე, ალაზანზე, იორსა და მათ შენაკადებზე წყლის დონეების მნიშვნელოვანი მატება და წყალმოვარდნები, გორაკ-ბორცვიან და მთიან ზონებში მეწყრული და ღვარცოფული პროცესების ჩასახვა-გააქტიურება, ხოლო ურბანულ ტერიტორიებზე ცალკეული მონაკვეთების დატბორვა გამოიწვიოს (საფრთხის დონე საშუალო).

ინფორმაციას გარემოს ეროვნული სააგენტო ავრცელებს. 

შინაგან საქმეთა სამინისტროს იმერეთის პოლიციის დეპარტამენტის თანამშრომლებმა, წინასწარი შეთანხმებით ჯგუფის მიერ განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და რეალიზაციის ხელშეწყობის ბრალდებით, სხვადასხვა დროს, 5 პირი დააკავეს, მათ შორის 2 უცხო ქვეყნის მოქალაქეა.

სამართალდამცველებმა, ბრალდებულების პირადი, დროებითი საცხოვრებელი ბინებისა და ავტომობილის ჩხრეკის შედეგად, ასევე მათ მიერ მითითებული ადგილებიდან ნივთმტკიცებად ამოიღეს სარეალიზაციოდ გამზადებული განსაკუთრებით დიდი ოდენობით სხვადასხვა სახის ნარკოტიკული საშუალება, მათ შორის: 150 გრამი „კოკაინი”, 111 აბი და 119 შეკვრად დაფასოებული „მეთადონი“. 

ჩატარებული საგამოძიებო მოქმედებების შედეგად, ასევე ამოღებულია ნარკოტიკული საშუალებების დაფასოებისთვის საჭირო მასალები.

გამოძიება სისხლის სამართლის კოდექსის 260-ე და 260-ე კვარტა მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.

შინაგან საქმეთა სამინისტროს იმერეთის პოლიციის დეპარტამენტის ქუთაისის საქალაქო სამმართველოს თანამშრომლებმა, წინასწარი შეთანხმებით ჯგუფის მიერ ჩადენილი თაღლითობის ბრალდებით, რამაც მნიშვნელოვანი ზიანი გამოიწვია, ორი პირი ბათუმში დააკავეს.  

გამოძიებით დადგინდა, რომ ბრალდებულებმა ნაცნობ ქალს ერთობლივი ბიზნესსაქმიანობის წამოწყება შესთავაზეს. აღნიშნული გეგმის განსახორციელებლად ქალმა საბანკო სესხები აიღო და ბრალდებულებს ჯამში 116 475 ლარი გადასცა.   

ბრალდებულებმა შეთანხმებული პირობები არ შეასრულეს და გადაცემულ თანხას მართლსაწინააღმდეგოდ დაეუფლნენ. 

სამართალდამცველებმა ორივე პირი მოსამართლის განჩინების საფუძველზე ბათუმში დააკავეს. 

გამოძიება საქართველოს სისხლის სამართლის კოდექსის 180-ე მუხლის მე-2 ნაწილით მიმდინარეობს, რაც 7 წლამდე ვადით თავისუფლების აღკვეთას ითვალისწინებს.

ქუთაისში ვეტერანის დღე აღინიშნა.

ქუთაისის მერმა დავით ერემეიშვილმა, იმერეთში სახელმწიფო რწმუნებულმა ლევან ზალკალიანმა და რწმუნებულის მოადგილემ გრიგოლ დალაქიშვილმა, ადგილობრივი თვითმმართველობის წარმომადგენლებთან და ვეტერანებთან ერთად, ყვავილებით შეამკეს გმირთა მემორიალი და პატივი მიაგეს საქართველოს ერთიანობისთვის დაღუპულ გმირთა ხსოვნას.

ღონისძიება ვეტერანების საქმეთა სახელმწიფო სამსახურის იმერეთის რეგიონული სამმართველოს ორგანიზებით გაიმართა.

ვეტერანის დღის აღსანიშნავად, ქუთაისში მცხოვრებ შეზღუდული შესაძლებლობის მქონე 29 ვეტერანს ადგილობრივი თვითმმართველობისგან ერთჯერადი ფინანსური დახმარება გადაეცა.