კომპანია „ფუდ გალერი,, ქუთაისში მომხმარებელთა მოწამვლისა და სურსათის ეროვნული სააგენტოს მიერ, საკვებში აღმოჩენილი დარღვევების ფაქტს ეხმაურება.
,,21.05.26 დაფიქსირდა ჩვენი მომხმარებლების ინტოქსიკაციის შემთხვევები. ჩვენ დაუყოვნებლივ დავუკავშირდით სურსათის ეროვნულ სააგენტოს, რომელმაც შეამოწმა ჩვენი საწარმო და მოგვცა შესაბამისი რეკომენდაციები.
რეკომენდაციების გათვალისწინებით, საწარმოო პროცესი დროებით შეჩერდა.
ჩატარებული მოკვლევის შედეგად დადგინდა, რომ ჩვენს ერთ-ერთ თანამშრომელს ჰქონდა სტაფილოკოკური ინფექცია, რომელიც ჰაერწვეთოვანი გზით ვრცელდება. სწორედ ამ ფაქტმა გამოიწვია გარკვეული მომხმარებლების ინტოქსიკაცია.
„ფუდ გალერი“ გულწრფელად უხდის ბოდიშს ყველა დაზარალებულ მომხმარებელს იმ დისკომფორტისა და ჯანმრთელობის პრობლემებისთვის, რაც აღნიშნულმა შემთხვევამ გამოიწვია.
კომპანია სრულ პასუხისმგებლობას იღებს და დაზარალებული მომხმარებლების მკურნალობის ხარჯებს სრულად დაფარავს.,,-ინფორმაციას კომპანია აქვეყნებს.
შეახსენებთ, ,,ფუდ გალერის,, ქუთაისის ფილიალში შეძენილი საკვებით 36 ადამიანი მოიწამლა. სურსათის ეროვნულმა სააგენტომ საკვების ნიმუშებში სტაფილოკოკი და ბაქტერიები აღმოაჩინა.
სახელმწიფო უსაფრთხოების სამსახურმა ჯაშუშობის ბრალდებით ერთი პირი დააკავა.
სუს-ის უფროსის მოადგილემ, ლაშა მაღრაძემ ბრიფინგზე განაცხადა,რომ დაკავებული დაკავშირებული იყო ორი უცხო ქვეყნის სპეცსამსახურებთან.
მაღრაძის ინფორმაციით, ბრალდებული ერთ-ერთი არასამთავრობო ორგანიზაციის დამფუძნებელი და ხელმძღვანელია.
„სახელმწიფო უსაფრთხოების სამსახურის კონტრდაზვერვის დეპარტამენტის თანამშრომლების მიერ, ჯაშუშობის ბრალდებით, დაკავებულია საქართველოს ერთი მოქალაქე, რომელიც დაკავშირებული იყო ორი უცხო ქვეყნის სპეცსამსახურებთან.
გამოძიებით დადგინდა, რომ ერთ-ერთი არასამთავრობო ორგანიზაციის დამფუძნებელი და ხელმძღვანელი წლების განმავლობაში, მატერიალური სარგებლის მიღებისა და უცხო ქვეყნის ინტერესების გატარების მიზნით, სისტემურად ახორციელებდა უცხო ქვეყნების სპეცსამსახურებისთვის სადაზვერვო ხასიათის ინფორმაციის მოპოვებასა და გადაცემას.
დაკავებულს უცხო ქვეყნების სპეცსამსახურების წარმომადგენელებთან გააჩნდა მაღალ დონეზე ორგანიზებული კონსპირაციული ხასიათის სისტემატური კონტაქტები. ინფორმაციის მიწოდება ხორციელდებოდა როგორც პირისპირ შეხვედრების, ასევე ელექტრონული საშუალებების გამოყენებით. ამასთან, პერიოდულად, კონსპირაციის დაცვისა და ინსტრუქტაჟის ჩატარების მიზნით, შეხვედრები ტარდებოდა ქვეყნის საზღვრებს გარეთ.
ჯაშუშობაში ბრალდებულ პირს, უცხო ქვეყნების სპეცსამსახურების დავალებითა და დაფინანსებით, შესაბამისი აქტივობების წარმართვის მიზნით, შექმნილი ჰქონდა საინფორმაციო პლატფორმები და ორგანიზებას უწევდა ქვეყნის მასშტაბით სხვადასხვა ღონისძიების ჩატარებასაც.
საყურადღებოა, რომ ბრალდებული ერთდროულად თანამშრომლობდა ორი უცხო სახელმწიფოს სპეციალურ სამსახურებთან და ახორციელებდა პარალელურ სადაზვერვო საქმიანობას.
საქმეზე გამოძიება საქართველოს სისხლის სამართლის კოდექსის 314-ე მუხლის პირველი ნაწილით მიმდინარეობს, რაც სასჯელის სახით 8-დან 12 წლამდე თავისუფლების აღკვეთას ითვალისწინებს”,- განაცხადა ლაშა მაღრაძემ.
