კორონავირუსისგან ქედის მუნიციპალიტეტის მკვიდრი, 88 წლის მამაკაცი განიკურნა. ასევე გამოჯანმრთელდა 72 წლის შეზღუდული შესაძლებლობის მქონე ქალბატონი, რომელიც ქუთაისში ცხოვრობს.
კლინიკიდან გამოჯანმრთელებული გაეწერა ახალგაზრდა ქალბატონი. ორსული სამი კვირის წინ ბათუმიდან მძიმე მდგომარეობაში ქუთაისში გადმოიყვანეს. პაციენტმა საავადმყოფოში იმშობიარა და კოვიდცენტრი ჩვილთან ერთად დატოვა.
“ამ ეტაპზე კლინიკაში 70 კოვიდდადებითი პაციენტი აგრძელებს მკურნალობას. 90-მდე პაციენტმა კი ვირუსი დაამარცხა. გამოჯანმრთელებულებს შორის არიან ბავშვები, ორსულები და ხანდაზმულები,”-აცხადებს “კლინიკა ბომონდი”-ს კლინიკური მენეჯერი მამია ყიფიანი.
იმერეთში სახელმწიფო რწმუნებული ზვიად შალამბერიძე, დაავადებათა კონტროლისა და საზოგადოებრივი ცენტრის ხელმძღვანელ პირებთან ერთად, რეგიონის პირველადი ჯანდაცვის სფეროს წარმომადგენლებს და მუნიციპალიტეტების მერებს შეხვდა.მხარის რწმუნებულმა რეგიონში არსებული ეპიდემიოლოგიური სიტუაცია შეაფასა, მისი განცხადებით, მზარდი სტატისტიკის მიუხედავად, სიტუაცია სტაბილურია და კონტროლს ექვემდებარება. თუმცა, არსებული მდგომარეობის შესანარჩუნებლად, აუცილებელია საზოგადოებრივი ჯანდაცვის სპეციალისტების და ადგილობრივი თვითმმართველობების მაქსიმალურად კოორდინირებული მუშაობა.
„კოვიდ-19 - ის გამოვლენიდან მის ბოლო ეტაპამდე არსებულ ციკლში თითოეული ჩვენგანი 24 საათის განმავლობაში უნდა ვიყოთ ჩართულები. ყოველდღე ყველა მუნიციპალიტეტში მერმა და ამ მიმართულებით მომუშავე პირებმა ზუსტად უნდა იცოდნენ ინფიცირებულთა რაოდენობა და ვინაობა, ბოლომდე უნდა მიყვნენ დაავადებულთა კონტაქტებს. ასევე, საჭიროა ოჯახისა და სოფლის ექიმების მაქსიმალური მობილიზება, ისინი დღეში ხუთჯერ მაინც ურეკავდნენ პაციენტებს, რათა სრულად შეძლონ სიტუაციის კონტროლი. ამ ეტაპზე ეს სასიცოცხლოდ მნიშვნელოვანია, არ გვაქვს არც ერთი შეცდომის დაშვების უფლება“. - განაცხადა ზვიად შალამბერიძემ.
დღესვე, დაავადებათა კონტროლის ეროვნული ცენტრის იმერეთის სამმართველოს უფროსის მოადგილემ კოტე გვეტაძემ, მხარის საზოგადოებრივი ჯანდაცვის ცენტრების ხელმძღვანელებს მთავრობის ახალი დადგენილება და რეგულაციები გააცნო, რომლის მიხედვითაც მაქსიმალურად მკაცრდება სამედიცინო პერსონალის ტესტირების პროცესი, ასევე უნდა მოხდეს პერსონალისა და სამედიცინო დაწესებულებების სრული ინვენტარიზაცია.
„უნდა განხორციელდეს პროაქტიური ქმედებები, ზუსტად უნდა ვიცოდეთ რა რესურსი გვაქვს, რომ მზად ვიყოთ უარესი სცენარისთვის და მოვახდინოთ რესურსების მაქსიმალური მობილიზება“. - განაცხადა კოტე გვეტაძემ.
