მართლმადიდებელი ეკლესია დღეს გიორგობის დღესასწაულს აღნიშნავს. ამასთან დაკავშირებით ტაძრებში წირვა-ლოცვა სრულდება.
წმინდა საკვირველთმოქმედი და ძლევაშემოსილი გიორგი ქართველი ერის მფარველად მიიჩნევა და საქართველოში განსაკუთრებულად უყვართ.
წმინდანი მესამე საუკუნის მეორე ნახევარში, კაბადოკიაში, მდიდარ ქრისტიანულ ოჯახში დაიბადა. მოგვიანებით, წმინდა გიორგი რომის იმპერატორ დიოკლიტიანეს მმართველობის დროს მხედართმთავარი გახდა. ქრისტიანებზე დევნის დაწყების შემდეგ იგი იმპერატორს განუდგა.
კერპთაყვანისმცემელმა რომის იმპერატორმა წმინდა გიორგის ქრისტეს უარყოფა მოსთხოვა. უფლის შეწევნით მან მრავალი სატანჯველი დაითმინა, მათ შორის - ბორბალზე გაკვრა. მისი თხოვნით უფალმა მიცვალებული მკვდრეთით აღადგინა. წმინდანს 303 წელს თავი მოკვეთეს. წმიდა გიორგი 30 წლის ასაკში ეწამა. იგი ეკლესიის ისტორიაში შევიდა, როგორც ძლევაშემოსილი და უძლეველი ზეციური მხედარი.
მართლმადიდებელი ეკლესია წმინდა გიორგის ხსენებას ორჯერ დღესასწაულობს: 6 მაისს - წმიდანის აღსრულების დღეს და 23 ნოემბერს - მისი ბორბალზე წამების დღეს. ამ უკანასკნელ დღესასწაულს ქართული ეწოდება, რადგან სხვა ეკლესიებში საქართველოდან გადავიდა.
23 ნოემბერი საქართველოში უქმე დღედ არის გამოცხადებული.
ქუთაისის ოპერის თეატრის სოლისტს, საოპერო მომღერალს , რამაზ კუბლაშვილს დაბადებიდან 70 წელი შეუსრულდა. თარიღთან დაკავშირებით 6 მარტს,მესხიშვილის თეატრში საიუბილეო გალა-კონცერტი გაიმართება, რომელშიც მონაწილეობას მიიღებს თავად რამაზ კუბლაშვილი, მისი კოლეგები, აღზრდილები და თეატრის ორკესტრი რევაზ ჯავახიშვილის დირიჟორობით.დასაწყისი 19:00 საათზე.
რამაზ კუბლაშვილის დებიუტი დიდ სცენაზე ზაქარია ფალიაშვილის ოპერა „დაისში“ მალხაზის პარტიით შედგა,კონსერვატორიის საოპერო სტუდიაში.
კონსერვატორიაში სწავლის დასრულების შემდეგ, 1979 წლიდან, რამაზ კუბლაშვილის შემოქმედებითი კარიერა ქუთაისის ოპერის თეატრს დაუკავშირდა.
მისი რეპერტუარი მრავალფეროვანია და მოიცავს ისეთ პარტიებს, როგორებიცაა: აბესალომი, მალხაზი, გურამი (ფალიაშვილის „აბესალომ და ეთერი“, „დაისი“, „ლატავრა“), კოტე (დოლიძის „ქეთო და კოტე“), არსაკიძე (მშველიძის „დიდოსტატის მარჯვენა“), მინდია, ერთაოზი (თაქთაქიშვილის „მინდია“, „პირველი სიყვარული“), ბერდო (ლაღიძის „ლელა“), ალფრედი, ჰერცოგი (ვერდის „ტრავიატა“, „რიგოლეტო“), ტურიდუ (მასკანის „სოფლის ღირსება“), ნადირი (ბიზეს „მარგალიტის მაძიებლები“), რინუჩო (პუჩინის „ჯანი სკიკი“), ლენსკი, ვოდემონი (ჩაიკოვსკის „ევგენი ონეგინი“, „იოლანტა“), ახალგაზრდა ბოშა (რახმანინოვის „ალეკო“) და ა.შ.
პარალელურად, პროფესორი რამაზ კუბლაშვილი აქტიურ, ნაყოფიერ პედაგოგიურ მოღვაწეობასაც ეწევა.
1999 წელს ის ღირსების ორდენით დაჯილდოვდა, 2018 წელს კი საქართველოს კულტურის სამინისტროს უმაღლესი ჯილდოთი - „ხელოვნების ქურუმით“. ამავე წელს ქუთაისის ოპერის თეატრის წინ გაიხსნა რამაზ კუბლაშვილის ვარსკვლავი.
