პარტია "თავისუფალი საქართველოს" თანათავმჯდომარემ გოგი წულაიამ, ქუთაისში 2021 წლის ბიუჯეტის პროექტი მერიასთან საჯაროდ დაწვა. ამ ფორმით მან მთავარი ფინანსური დოკუმენტი გააპროტესტა. მისი თქმით, ბიუჯეტი არ არის მორგებული მოსახლეობის ინტერესებზე და მხოლოდ მაღალჩინოსნების კეთილდღეობას ემსახურება. წულაიას თქმით, 2021 წლის ბიუჯეტში 12 მილიონით შემცირდა ინფრასტრუქტურული პროექტები, თუმცა არ შემცირებულა თვითმმართველობაში დასაქმებულთა სახელფასო ხარჯი და ის 24 მილიონს შეადგენს. გოგი წულაიას თქმით, მან ბიუჯეტი გასულ წელსაც დაწვა, თუმცა ადგილობრივმა თვითმმართველობამ შენიშვნები არ გაითვალისწინა, ამიტომ მერიას სიმბოლურად ცერცვიც შეაყარა. წულაიას ქალაქის თვითმმართველობა არ ეხმიანება.
21 დეკემბრიდან პარლამენტი პრემიერ-მინისტრობის კანდიდატის გიორგი გახარიას მიერ ნდობის გამოსაცხადებლად წარდგენილ მთავრობის შემადგენლობის მოსმენას იწყებს. პარლამენტს ასევე წარედგინა სამთავრობო პროგრამა 2021-2024 “ევროპული სახელმწიფოს მშენებლობისთვის“.
თემატური მოსმენები კომიტეტების გაერთიანებულ სხდომებზე 21 და 22 დეკემბერს გაიმართება.
23 დეკემბერს კი, მთავრობის წევრობის კანდიდატებთან შეხვედრა ფრაქცია “ქართული ოცნების“ ფორმატში გაიმართება, ხოლო 24 დეკემბერს პლენარულ სხდომაზე ნდობის მისაღებად გავა.
მინისტრთა კაბინეტი ნდობის მისაღებად პარლამენტში შემდეგი შემადგენლობით შევიდა:
პრემიერ-მინისტრი - გიორგი გახარია.
რეგიონული განვითარებისა და ინფრასტრუქტურის მინისტრი - მაია ცქიტიშვილი.
იუსტიციის მინისტრი - გოჩა ლორთქიფანიძე.
შინაგან საქმეთა მინისტრი - ვახტანგ გომელაური.
ეკონომიკისა და მდგრადი განვითარების მინისტრი - ნათია თურნავა.
საგარეო საქმეთა მინისტრი - დავით ზალკალიანი.
ფინანსთა მინისტრი - ივანე მაჭავარიანი.
განათლების, მეცნიერების, კულტურისა და სპორტის მინისტრი - მიხეილ ჩხენკელი.
ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი - ეკატერინე ტიკარაძე.
გარემოს დაცვისა და სოფლის მეურნეობის მინისტრი - ლევან დავითაშვილი.
თავდაცვის მინისტრი - ირაკლი ღარიბაშვილი.
შერიგებისა და სამოქალაქო თანასწორობის საკითხებში სახელმწიფო მინისტრი - თეა ახვლედიანი.