საქართველოს სახელმწიფო ვალი 31.57 მილიარდი ლარია, რაც იმას ნიშნავს, რომ ვალი კანონით დადგენილ კრიტიკულ ზღვარს – ეკონომიკის მოცულობის (მშპ) 60%-ს გადასცდა.

ქუთაისის საქალაქო სასამართლომ ნამოხვანჰესის საქმეზე დაკავებული 8 პირის საქმე განიხილა, მათ  სისხლის სამართლის კოდექსის 166-ე და 173-ე  მუხლებით ედებათ ბრალი, რაც წვრილმან ხულიგნობასა და სამართალდამცავი ორგანოს თანამშრომლის კანონიერი მოთხვნისადმი დაუმორჩილებლობას გულისხმობს.

ბრალდებულების ინტერესებს ახალგაზრდა იურისტთა ასოციაცია იცავს.იურისტი დარინე სალდაძე ამბობს, რომ საქმეში არ არსებობს გარემოება, რაც მათ ბრალეულობას დაამტკიცებს, ამიტომ იმედოვნებს, რომ   7 ივნისს 17 საათზე  სასამართლო საბოლოო  გადაწყვეტილებას ბრალდებულების სასარგებლოდ გამოიტანს.

ქუთაისის საერთაშორისო აეროპორტიდან ვენის, ბუდაპეშტისა და ვროცლავის მიმართულებით რეგულარული რეისები განახლდება. 

2021 წლის პირველი ორი თვის ეკონომიკის ვარდნის საშუალო მაჩვენებელი -8,3 %-ია,- ამის შესახებ სტატისტიკის ეროვნული სამსახურის აღმასრულებელმა დირექტორმა გოგიტა თოდრაძემ ბრიფინგზე განაცხადა.

მისი თქმით, 2021 წლის თებერვალში, წინა წლის შესაბამის პერიოდთან შედარებით საქართველოს ეკონომიკა 5,1%-ით შემცირდა. აქედან გამომდინარე, 2021 წლის პირველი ორი თვის ეკონომიკის ვარდნის საშუალო მაჩვენებელი -8,3 %-ია.

„2021 წლის თებერვალში, წინა წლის შესაბამის პერიოდთან შედარებით კლება შეინიშნებოდა შემდეგ საქმიანობებში: მშენებლობა, განთავსების საშუალებით უზრუნველყოფა, ხელოვნება, გართობა და დასვენება, ტრანსპორტი და დასაწყობება, უძრავ ქონებასთან დაკავშირებული საქმიანობა და დამამუშავებელი მრეწველობა. ზრდის ტენდენცია გამოვლინდა საფინანსო და სადაზღვევო საქმიანობის, ვაჭრობის, წყალმომარაგების და ნარჩენების მართვის სექტორებში. 2021 წლის იანვარ-თებერვალში საქონლის ექსპორტი შემცირდა -6.8%-ით. დაახლოებით -14% არის შემცირებული იმპორტის მოცულობა. აღსანიშნავია, რომ 2021 წლის თებერვალში ექსპორტის მაჩვენებელი გაიზრდა 3%-ით, მათ შორის ადგილობრივი ექსპორტის მოცულობა 23%-ით იყო გაზრდილი“,-განაცხადა გოგიტა თოდრაძემ.

„საქსტატის“ მონაცემებით, 2020 წლის IV კვარტალში საქართველოში საშუალო თვიური ნომინალური ხელფასი გასული წლის შესაბამის პერიოდთან შედარებით 5 ლარით, 1 314.7 ლარამდე შემცირდა.

საქმიანობების სახეების მიხედვით შედარებით მაღალი ხელფასი დაფიქსირდა შემდეგ დარგებში: ინფორმაცია და კომუნიკაცია – 2 199.8 ლარი (წინა წლის შესაბამის პერიოდთან შედარებით გაიზარდა 6.2 პროცენტით); მშენებლობა – 2 061.8 ლარი (გაიზარდა 1.2 პროცენტით); პროფესიული, სამეცნიერო და ტექნიკური საქმიანობები – 2 020.9 ლარი (წინა წლის შესაბამის პერიოდთან შედარებით შემცირდა 8.8 პროცენტით); საფინანსო და სადაზღვევო საქმიანობები – 2 017.2 ლარი (წინა წლის შესაბამის პერიოდთან შედარებით გაიზარდა 4.2 პროცენტით).

ამასთან, საქმიანობის სახეების მიხედვით,  კაცების ხელფასი თითქმის ყველა სექტორში აღემატებოდა ქალების ხელფასს.

„2020 წლის IV კვარტალში ქალების საშუალო ხელფასი 1 022.3 ლარით, ხოლო კაცების - 1 581.5 ლარით განისაზღვრა. ხელფასების წლიურმა ზრდამ ქალებში 3.8 ლარი შეადგინა, ხოლო კაცებში აღნიშნული მაჩვენებელი შემცირდა 11.7 ლარით“,- აღნიშნულია „საქსტატის“ ანგარიშში.

2020 წელს ადგილობრივი ტურისტული ტიპის ვიზიტების საშუალო თვიური რაოდენობა 9.5%-ით შემცირდა და 480.4 ათასით განისაზღვრა, - ინფორმაციას “საქსტატი“ აქვეყნებს.

„საქსტატის“ მონაცემებით, 2020 წელს, საქართველოს ტერიტორიაზე 15 წლის და უფროსი ასაკის ადგილობრივი ვიზიტორების საშუალო თვიური რაოდენობა 910.8 ათასით განისაზღვრა, რომლებმაც ქვეყნის ტერიტორიაზე განახორციელეს 1.0 მილიონი ვიზიტი. აღნიშნულ პერიოდში ვიზიტორების რაოდენობა 8.3 პროცენტით ნაკლებია 2019 წლის შესაბამის მონაცემებზე.

გამოკვლევის შედეგების მიხედვით, ვიზიტორების 39.2 პროცენტი თბილისის მცხოვრებელია, 12.8 პროცენტი მოდის იმერეთის, რაჭა-ლეჩხუმისა და ქვემო სვანეთის რეგიონზე, 12 პროცენტი - ქვემო ქართლის რეგიონზე, ხოლო დანარჩენი რეგიონები სტრუქტურაში შედარებით დაბალი წილით არის წარმოდგენილი.

ამასთან, 2020 წელს ვიზიტების უმრავლესობა (45.9 პროცენტი) განხორციელდა მეგობრების/ ნათესავების მონახულების მიზნით.

„საქსტატის“ ინფორმაციით, 2020 წელს განხორციელებული ვიზიტებისას გაწეული საშუალო თვიური ხარჯების მოცულობა განისაზღვრა 147.1 მილიონი ლარით. აღნიშნული მაჩვენებელი 4.2 პროცენტით ნაკლებია გასული წლის შესაბამისი პერიოდის მაჩვენებელთან შედარებით. ამასთან, ვიზიტზე გაწეული საშუალო ხარჯი გაზრდილია 9.5 პროცენტით და 141.6 ლარს უტოლდება.