ქუთაისის საკრებულოს წევრი ,(პარტია "საქართველოსთვის" ) ელეონორა არჩაია განცხადებას ავრცელებს.
"მოგესალმებით ძვირფასო მეგობრებო, მინდა თქვენი ყურადღება მივაპყრო მეტად მნიშვნელოვან და პრობლემურ საკითხზე.
ქუთაისის და თერჯოლის ადმინისტრაციული საზღვრის მოუწესრიგებლობის გამო, მთელი რიგი დასახლებული პუნქტები ეფექტურად ვერ სარგებლობენ სოციალური და ჯანდაცვის სერვისებით.
გაცნობებთ, რომ რკინიგზის სადგურ რიონის მოსაზღვრე ბინებში, “მუხრანის” მუნიციპალიტეტის საზღვართან ცხოვრობს 33 ოჯახი, დაახლოებით 130 მოქალაქე, რომელთაგან 80 ამომრჩეველია, მათი უმრავლესობა ქუთაისის საზღვრებში გახსნილ საარჩევნო უბნებზე აძლევს ხმას.
ბინების მაცხოვრებლები სამოქალაქო რეესტრის მიერ რეგისტრირებულნი არიან ქალაქ ქუთაისის მოქალაქეებად და სარგებლობენ ყველა სახის კომუნალური მომსახურებით. ყველა ბინაში შექმნილია ბინის მესაკუთრეთა ამხანაგობები, რომლებიც 1997 წლიდან დაფიქსირებულია საბინაო ინფრასტრუქტურის მართვისა და განვითარების სამსახურის მიერ. მიუხედავად ზემოთ აღნიშნულისა, ადგილობრივ მოსახლეობას სერიოზული პრობლემები ექმნებათ, რადგან საკადასტრო მონაცემებით ტერიტორია მიეკუთვნება თერჯოლის მუნიციპალიტეტს.
ამ გაურკვეველი მდგომარეობის გამო ვერ ხერხდება ბინების პრივატიზაცია და რეგისტრაციაში გატარება. პრობლემებია მემკვიდრეობის დამტკიცების, მათი კუთვნილი საცხოვრებელი ფართის ყიდვა-გაყიდვის გაფორმების და სხვა მომსახურების კუთხით. ყოველივე ეს სერიოზულ ფინანსურ ზიანს აყენებს მოსახლეობას და ზედმეტ დაბრკოლებებს უქმნის მას.
ადგილობრივი მოსახელობა უკვე წლებია სხვადასხა გზით ითხოვს, რომ აღნიშნულ ტერიტორიაზე არსებული ბინები მოექცეს ქალაქ ქუთაისის მუნიციპალიტეტის საკადასტრო საზღვრებში.
მათ არაერთხელ მიმართეს მუნიციპალიტეტის მერიასა და საკრებულოს პრობლემის მოსაგვარებლად, თუმცა როგორც ჩანს ამ პრობლემის გადაჭრა ცდება მუნიციპალიტეტის უფლებამოსილების საზღვრებს და ის ცენტრალურმა ხელისუფლებამ უნდა დაარეგულიროს.
მივმართავ ჩემს კოლეგებს თხოვნით, გაეცნონ და შეისწავლონ აღნიშნული საკითხი და დავეხმაროთ მოსახლეობას პრობლემის დროულად გადაჭრაში!
მადლობა ყურადღებისთვის!"-აცხადებს ელეონორა არჩაია.
სამ თვეში საჯარო უწყებებმა სარესტორნო მომსახურებაში 405 ათასი ლარი დახარჯეს. ინფორმაცია გამომძიებელ ჟურნალისტთა გაერთიანებამ (აი,ფაქტი-ifact.ge) გაავრცელა.
მაგალითად, ჭიათურის მერიამ “საპატიო ჭიათურელების” დაჯილდოვებაზე მოსული 100 სტუმარი 13,000-ლარიან სუფრაზე მიიწვია. ფეხბურთელ ზურაბ წერეთლის მემორიალური დაფის გახსნა კი 15-კაციანი სუფრით აღნიშნეს და რესტორანში 1,100 ლარი დახარჯეს. მაგიდაზე არც მწყერი აკლდათ და არც კურდღელი .
თეთრიწყაროს მუნიციპალიტეტში კალანდობაზე მოსულ მერიისა და საკრებულოს თანამშრომლებსაც რესტორანში უმასპინძლეს გოჭითა და ტაბაკებით. ვახშამში თეთრიწყაროს ბიუჯეტიდან 1,305 ლარი დაიხარჯა.
ხონის მერიამ კი 1,200 ლარი დახარჯა საახალწლო ღონისძიებაზე 20 სტუმრის გამასპინძლებაში.
მუნიციპალიტეტებს შორის კვებაზე ყველაზე მეტი თანხა, 27 ათასი ლარი ქუთაისის მერიამ დახარჯა.
