ეროვნულ-დემოკრატიული ინსტიტუტის, (NDI) კვლევის მიხედვით, ხვალ რომ საპარლამენტო არჩევნები ტარდებოდეს, გამოკითხულთა უმეტესობა მასში მონაწილეობას მიიღებდა.

უფრო კონკრეტულად, შეკითხვაზე: ხვალ რომ საპარლამენტო არჩევნები ტარდებოდეს, მიიღებდით თუ არა მონაწილეობას, პასუხები ასე გადანაწილდა: 66 % - სავარაუდოდ მიიღებდა, 34 % - სავარაუდოდ არ მიიღებდა.

ამასთან, კვლევის მიხედვით, არჩევნებზე წასვლაზე უარს ყველაზე ხშირად ეთნიკური უმცირესობების დასახლებაში მცხოვრები, ასევე გადაუწყვეტელი ამომრჩეველი ამბობდა. კერძოდ, უმცირესობებით დასახლებულ რეგიონებში მცხოვრები გამოკითხულებიდან 62 %-მა განაცხადა, რომ არჩევნებზე არ წავიდოდა, 38 %-მა კი აღნიშნა, რომ არჩევნებში მონაწილეობას მიიღებდა. ასევე, უშუალოდ „ქართული ოცნების“ მხარდამჭერებიდან 21 %-მა აღნიშნა, რომ არჩევნებზე არ წავიდოდა, ოპოზიციის მხარდამჭერებიდან კი იგივე მაჩვენებელი 26 %-ს შეადგენს. ხოლო იმ რესპონდენტებიდან, ვინც არ დაასახელა, რომელ პარტიას უჭერს მხარს, 45 %-მა განაცხადა, რომ ხვალ რომ საპარლამენტო არჩევნები ტარდებოდეს, ხმის მისაცემად არ წავიდოდა.

ფოტო არქივიდან . 

ქუთაისში ყაზახეთის ქალაქ შიმკენტის დელეგაცია იმყოფებოდა. დელეგაციის წევრები შიმკენტის ტურიზმის ადმინისტრაციას წარმოადგენდნენ. მათი ვიზიტის მიზანი ქუთაისის ტურისტული პოტენციალის გაცნობა იყო.

სტუმრები ქუთაისის მერმა იოსებ ხახალეიშვილმა მიიღო. დაგეგმილია ქუთაისისა და შიმკენტის დამეგობრება. შეხვედრაზე ამ საკითხის საორგანიზაციო დეტალებზეც იყო საუბარი. ქუთაისის მერმა სტუმრებს მადლობა გადაუხადა ქუთაისში ჩამოსვლისთვის და სამახსოვრო საჩუქრები გადასცა.

ბაღდათის მუნიციპალიტეტსა და ლიეტუვის რესპუბლიკის კაიშადორისის რაიონს შორის ურთიერთთანამშრომლობის მემორანდუმს მოეწერა ხელი. ურთიერთთანამშრომლობის მემორანდუმს ხელი ლიუტევაში, კაიშადორისში (კაუნასის მხარე), ბაღდათის მუნიციპალიტეტის მერმა კახა ენუქიძემ და კაიშადორისის რაიონის მერმა ვიტიანის ტომკუსმა მოაწერეს. მემორანდუმზე დაყრდნობით, მხარეებს შორის შედგება საქმიანი თანამშრომლობა სოციალურ-ეკონომიკური და კულტურული მიმართულებით, გაღრმავდება მეგობრული ურთიერთობები. ლიეტუვის რესპუბლიკაში ოფიციალური ვიზიტის დროს გაიცვალა ინფორმაცია ბაღდათის მუნიციპალიტეტსა და კაიშადორისის რაიონის შესახებ როგორც კულტურული, ასევე სოციალური, ტურისტული პოტენციალისა და სოფლის მეურნეობის განვითარების მიმართულებით. ლიეტუვას რესპუბლიკაში დელეგაციას ბაღდათის მუნიციპალიტეტის მერი კახა ენუქიძე ხელმძღვანელობდა. ოფიციალურ შეხვედრებს ესწრებოდა პროფესორი მარიამ მანჯგალაძე, ლიეტუვის პარლამენტის წევრი, ლიეტუვის პარლამენტის საქართველოს მეგობართა ჯგუფის თანათავმჯდომარე, პროფესორი ვილია თარგამაძე, რომლის ხელშეწყობითაც შედგა ორ მხარეს შორის დამეგობრება. მემორანდუმის გაფორმების ცერემონიას ესწრებოდა ლიეტუვაში საქართველოს რესპუბლიკის საელჩოს წარმომადგენელი - საქართველოს სრულუფლებიანი ელჩის მთავარი მრჩეველი - ნატალია კიპაროიძე.

2022 წლის 7 თვის მდგომარეობით, საქართველოს მოქალაქეობა რუსეთის 723 მოქალაქეს მიენიჭა, მათ შორის, 551-მა საქართველოს მოქალაქეობა საგამონაკლისო წესით, რუსეთის უკრაინაში შეჭრის შემდეგ მიიღო. ინფორმაციას ამის შესახებ „ინფორმაციის თავისუფლების განვითარების ინსტიტუტი“ პრეზიდენტის ადმინისტრაციის მიერ მიწოდებულ ინფორმაციაზე დაყრდნობით ავრცელებს.

სტატისტიკური მონაცემების მიხედვით, 2022 წლის იანვარში საქართველოს მოქალაქეობა რუსეთის 74 მოქალაქეზე, ხოლო თებერვალში 98 მოქალაქეზე გაიცა. მარტის თვეში აღნიშნული მაჩვენებელი 43-მდე შემცირდა, თუმცა შემდეგ თვეებში აღნიშნული მაჩვენებელი იზრდება. მაგალითად, 2022 წლის ივნისის თვეში საქართველოს მოქალაქეობა რუსეთის 162-მა მოქალაქემ, ივლისის თვეში 136-მა მოქალაქემ მიიღო. რუსეთ-უკრაინის ომის დაწყების შემდეგ საქართველოს მოქალაქეობა საგამონაკლისო წესით რუსეთის 551 მოქალაქეს მიენიჭა.

„2019-2022 წლებში საქართველოს მოქალაქეობის მიმღებ პირებს შორის რუსეთის მოქალაქეები მნიშვნელოვნად ჭარბობს. 2019 წელს საქართველოს მოქალაქეობა (საქართველოს მოქალაქეობის აღდგენის გარდა) 1 219 რუსეთის მოქალაქეს მიენიჭა. 2020 წელს ეს მაჩვენებელი 629-მდე შემცირდა, ხოლო 2021 წელს 1 342-მდე გაიზარდა. 2022 წლის 7 თვის მდგომარეობით, საქართველოს მოქალაქეობა რუსეთის 723 მოქალაქეს მიენიჭა.

საქართველოს მოქალაქეობის მინიჭების სტატისტიკური მონაცემების ანალიზი აჩვენებს, რომ ბოლო 5 წლის განმავლობაში საქართველოს მოქალაქეობა უმეტესწილად რუსეთის მოქალაქეებს ენიჭებათ. რუსეთის მოქალაქეების მიერ საქართველოს მოქალაქეობის მიღების სურვილის კიდევ მეტად ზრდა მოსალოდნელია 2022 წლის 24 თებერვალს რუსეთის უკრაინაში შეჭრის შემდეგ შექმნილი სიტუაციის (მოსალოდნელი გრძელვადიანი სანქციები, განსხვავებული შეხედულებების მქონე პირების დევნა და სხვა) გათვალისწინებით,“ - აღნიშნულია IDFI-ის მიერ გავრცელებულ ინფორმაციაში.

აღსანიშნავია, რომ ორგანიზაციის ინფორმაციით, უკრაინაში ომის დაწყების შემდეგ საქართველოს მოქალაქეობა მიიღო უკრაინის 8 მოქალაქემაც.

საქართველოს მთავრობა სამ ახალ ვერტმფრენს შეისყიდის. ამის შესახებ პრემიერ-მინისტრმა  მთავრობის სხდომის დაწყებისას განაცხადა.

როგორც ღარიბაშვილმა აღნიშნა, მთავრობის გადაწყვეტილებით გაყიდიან წინა ხელისუფლების დროს შეძენილ ერთ ძვირადღირებულ ვერტმფრენს, რომელიც მისივე შეფასებით, „ფუფუნებისთვის“ იყო შესყიდული.

„გომელაურის უწყება მუშაობს ახლა აქტიურად სამი ახალი ვერტმფრენის შეძენის თაობაზე. მიუხედავად იმისა, რომ ყველა ვერტმფრენი არის აბსოლუტურად გამართული, კარგ მდგომარეობაში, ჩვენ ამას ძალიან დიდ ყურადღებას ვუთმობთ, გვქონდა ამის თაობაზე განხილვა. მოგეხსენებათ, რომ სახელმწიფოს ჰყავს ერთი ძვირადღირებული, ფუფუნებისთვის განკუთვნილი ვერტმფრენი, რომელიც წინა მთავრობამ ყოფილი პრეზიდენტისთვის შეიძინა და რამდენიმე ათეული დოლარი თუ ევროა გადახდილი ამ ვერტმფრენში. ჩვენი გადაწყვეტილება იყო, რომ ამ ვერტმფრენით არავინ არ ისარგებლა. აქვე ხაზგასმით უნდა აღვნიშნო, მიუხედავად იმ სპეკულაციებისა, რომ თითქოს ეს ვერტმფრენი გამოიყენება სამაშველო ოპერაციებში, ეს არის ტყუილი. გვქონდა განხილვა და მივიღეთ გადაწყვეტილება, რომ ამ ვერტმფრენს გადავცემთ უკან მის გამომშვებ ქარხანას ანუ გავყიდით და სანაცვლოდ ჩვენ სამ ახალ ვერტმფრენს შევიძენთ, რომელიც სხვადასხვა სამაშველო თუ სხვა ოპერაციისთვისაც გამოგვადგება. ახლა აქტიური მოლაპარაკებები მიმდინარეობს და ფინანსთა სამინისტროც ჩართულია ამ პროცესში“, - განაცხადა ღარიბაშვილმა.