1989 წლის 9 აპრილის ტრაგედიიდან 33 წელი შესრულდა.
იმერეთში სახელმწიფო რწმუნებულმა ზვიად შალამბერიძემ , ქუთაისის მერმა იოსებ ხახალეიშვილმა და ქუთაისის საკრებულოს თავმჯდომარემ ირაკლი შენგელიამ, ადგილობრივი ხელისუფლების სხვა წარმომადგენლებთან ერთად 9 აპრილის მემორიალი გვირგვინით შეამკეს და დაღუპულთა ხსოვნას პატივი მიაგეს.
,,საქართველოს თავისი ისტორიის მანძილზე არაერთი გმირობის მაგალითი ახსოვს და სწორედ ასეთია ჩვენი ქვეყნის უახლოეს ისტორიაში 9 აპრილი. 33 წლის წინ განვითარებულმა მოვლენებმა აჩვენა, რომ ქართველ ხალხს შიშველი ხელებით შეუძლია აღუდგეს ტანკებს, როდესაც საქართველოს სიყვარულს და საქართველოს დამოუკიდებლობას ეხება საქმე. განსაკუთრებით დღევანდელ დღეს, როდესაც მსოფლიოში ასეთი გეოპოლიტიკური ვითარება გვაქვს, იმ ადამიანების თავგანწირვით მოპოვებული თავისუფლება კიდევ უფრო მეტ ფასს იძენს. ჩვენი და ჩვენი შთამომავლობის ვალია, გავუფრთხილდეთ ქვეყნის დამოუკიდებლობას და თავისუფლებას" - განაცხადა ზვიად შალამბერიძემ.
,,9 აპრილი ჩვენი ქვეყნის თანამედროვე ისტორიაში უმნიშვნელოვანესი თარიღია.1989 წლის 9 აპრილს ქართველმა ხალხმა გამოხატა თავისი სწრაფვა დამოუკიდებლობისაკენ, ორი წლის შემდეგ კი, ზუსტად ამ დღეს, ჩვენ უკვე ოფიციალურად გამოვაცხადეთ საქართველოს დამოუკიდებლობის აღდგენა.
მადლობა გმირებს, თავისუფლებისთვის!
ჩვენ ვალდებული ვართ, მათ მიერ დაწყებული საქმე ბოლომდე მივიყვანოთ და საქართველო იყოს ერთიანი, ძლიერი და დამოუკიდებელი ქვეყნა!"- განაცხადა იოსებ ხახალეიშვილმა.
ქუთაისში, 1989 წლის 9 აპრილის, მოვლენების ამსახველი ფოტოებიც გამოიფინა.
იმერეთის რეგიონის 12- ვე მუნიციპალიტეტში ამ დღისადმი მიძღვნილი სხვადასხვა ღონისძიებები გაიმართა.
1989 წლის 9 აპრილს, გამთენიისას, საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან, მშვიდობიანი საპროტესტო აქცია დაარბიეს, რასაც მსხვერპლი მოჰყვა.
დარბევის შედეგად 21 ადამიანი დაიღუპა. პარლამენტის წინ შეკრებილი ათასობით მოქალაქე დაუდგენელი შემადგენლობის გაზით მოიწამლა.
1991 წლის 9 აპრილს მაშინდელმა უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა.
დღეს ქუთაისში 9 აპრილს დაღუპულთა ხსოვნის პატივსაცემად აქცია გაიმართება.მოქალაქეები 19:00 საათზე,თეთრ ხიდთან შეიკრიბებიან.აქციაზე პატივს რუსეთ-უკრაინის ომში დაღუპულების ხსოვნასაც მიაგებენ.
"1989 წლის 9 აპრილს საბჭოთა ჯარმა მხუთავი აირის, ორლესული ნიჩბებისა და ცეცხლსასროლი იარაღის გამოყენებით დაარბია თბილისში მიმდინარე მშვიდობიანი საპროტესტო აქცია.
შედეგად 21 ადამიანი დაიღუპა, ასობით ადამიანი დასახიჩრდა, ათასობით კი მოიწამლა.
2022 წლის აპრილის თვეში უკრაინაში იგივე საბჭოთა ძალამ რუსეთის სახელმწიფოს სახით მოკლა 1417 მოქალაქე, მათგან 150-მდე ბავშვი და ბოლო მონაცემებით 4000 ზე მეტი სამხედრო მსახური.
1991 წლის 9 აპრილს საქართველოს უზენაესმა საბჭომ მიიღო საქართველოს სახელმწიფოებრივი დამოუკიდებლობის აღდგენის აქტი.
9 აპრილი საქართველოსთვის თავისუფლების მოპოვებისა და გამარჯვების დღე არის, მაგრამ ახლა გლოვის დღეა !
ვიკრიბებით, რათა მივაგოთ პატივი თავისუფლებისთვის განწირულ თითოეული ქართველისა თუ უკრაინელის სულს ქუთაისში თეთრ ხიდზე -
9 აპრლის, საღამოს 7 საათზე.
ადგილზე შეგიძლიათ მოიტანოთ ყვავილები, სანთლები და სამგლოვიარო პლაკატები.
დიდება უკრაინას ! დიდება საქართველოს ! დიდება გმირებს !"- წერია დღევანდელ დღეს დაგეგილი აქციის საანონსე ტექსტში.