ქუთაისში,ცისფერყანწელების ქუჩაზე,მონპლაზირის თაღთან დაზიანებული კედლის მხატვრობის აღდგენა მიმდინარეობს. კედელი შავი საღებავით შესრულებული წარწერით იყო გადაფარული.

ქუთაისის მერიის მიერ გავრცელებული ინფორმაციით, მხატვრობა 2024 წლის 21 იანვრის ღამეს, უცხო ქვეყნის ორმა მოქალაქემ დააზიანა.

 აღნიშნული გრაფიტი შესრულებული იყო "ქარავან არტ ფორუმის" ფარგლებში,2016 წელს.

მსოფლიო სურსათის დღე –16 ოქტომბერი - გაეროს სურსათისა და სოფლის მეურნეობის ორგანიზაციის (FAO) დაარსების დღე – გაეროს ერთ-ერთი გამორჩეული დღესასწაულია და მსოფლიოს 150-მდე ქვეყანაში აღინიშნება.

ქუთაისში აგრობაზარი ,,უნიკალური ქართული გემო,, თეთრი ხიდის მიმდებარედ, 12:00-დან 20:00-მდე გაიმართება.  აგრობაზარი ფერმერებს მთელი საქართველოდან უმასპინძლებს. ბავშვებისთვის დაგეგმილია გასართობი აქტივობები.

აქტივობას გაეროს სურსათისა და სოფლის მეურნეობის ორგანიზაცია(FAO) და საქართველოს გარემოს დაცვისა და სოფლის მეურნეობის სამინისტრო, იმერეთში სახელმწიფო რწმუნებულის ადმინისტრაციისა და ქუთაისის მერიის მხარდაჭერით ჩაატარებს.

გარემოს ეროვნული სააგენტოს ინფორმაციით,17-18 ოქტომბერს საქართველოში მოსალოდნელია წვიმა, ზოგან ძლიერი, მაღალმთაში ზოგან თოვლი, დასავლეთის მიმართულების ძლიერი ქარი, შესაძლებელია ელჭექი, სეტყვა, ზღვაზე 3-4 ბალიანი შტორმული ღელვა. 

მოსალოდნელმა ნალექებმა შესაძლებელია საქართველოს მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს. (საფრთხის დონე საშუალო).

იმერეთში სახელმწიფო რწმუნებული ლევან ზალკალიანი ზესტაფონსა და ხარაგაულში მიმდინარე და დასრულებულ პროექტებს გაეცნო. 

თანამედროვე საგანმანათლებლო ინფრასტრუქტურის უზრუნველსაყოფად ზესტაფონში, ქალაქის მე-2 და მე - 4 საჯარო სკოლების სრული რეაბილიტაცია მიმდინარეობს.სკოლებში მოეწყობა საკლასო ოთახები, საბუნებისმეტყველო და კომპიუტერული ლაბორატორიები, ბიბლიოთეკა, რესურს ოთახი, ექიმის კაბინეტი, სპორტული დარბაზები, დამონტაჟდება გათბობის სისტემები, ასევე, სკოლები აღიჭურვება შესაბამისი სასწავლო რესურსით და ინვენტარით. ორივე შენობა უზრუნველყოფილია ლიფტით და სრულად იქნება ადაპტირებული შეზღუდული შესაძლებლობის მქონე პირებისთვის.რეაბილიტაციის პროცესის დასრულების შემდეგ, 1500 - მდე მოსწავლე თანამედროვე სტანდარტების შესაბამისად აღჭურვილი საგანმანათლებლო და სპორტული ინფრასტრუქტურით ისარგებლებს.

სამუშაოები განათლებისა და მეცნიერების სამინისტროს სსიპ-ის საგანმანათლებლო და სამეცნიერო ინფრასტრუქტურის განვითარების სააგენტოს მიერ ფინანსდება.

ხარაგაულში, სოფელ კიცხში უკვე დასრულდა ახალი საბავშვო ბაღის მშენებლობა. ევროპული სტანდარტების შესაბამისი საბავშვო ბაღი 50 ბავშვზეა გათვლილი.პროექტს მუნიციპალური განვითარების ფონდი აფინანსებს და მისი ღირებულება 1 278 332 ლარია.კიცხის სკოლამდელი დაწესებულება რიგით მე-16 ახალი საბავშვო ბაღია, რომელიც ხარაგაულში ბოლო წლებში აშენდა.

რეგიონული განვითარების პროექტების ფონდიდან მიღებული დაფინანსებით, ხარაგაულის მერიამ სოფელ თეთრაწყაროში ახალი მინი სტადიონის მშენებლობაც განახორციელა.

ქუთაისში, “ქართული ოცნების” მიერ დაპირებულ ინფრასტრუქტურულ პროექტებზე ადგილობრივებმა ძებნა გამოაცხადეს.

სამოქალაქო აქტივისტები ფანრებით ხელში, იმ პროექტებს ეძებდნენ, რომლის მშენებლობის დაპირებებიც “ოცნების” ხელისუფლებამ წლების წინ გასცა, ახლა სამუშაოები დასრულებული უნდა იყოს, თუმცა ადგილზე ძირითად შემთხვევაში რქოსანი პირუტყვი ბალახობს.

სამოქალაქო მოძრაობის “დატოვე პარლამენტი ქუთაისში” წევრები ბერძენი ფილოსოფოსის მეთოდით ცდილობდნენ ენახათ რეაბილიტირებული რიონისპირა სახლები, ელექტრომობილების ქარხანა, ოცნების ქალაქი, ტექნოლოგიური ჰაბები და სხვა.

მათი თქმით, “ქართული ოცნების” 12-წლიანი მმართველობის განმავლობაში ქუთაისმა დაკარგა საპარლამენტო ქალაქის სტატუსი, განვითარების პერსპექტივა, ქალაქი დატოვა 30 ათასზე მეტმა ადამიანმა და მოსახლეობის რაოდენობით ქუთაისმა მეორე ადგილიდან მეოთხეზე გადაინაცვლა.

აქტივისტები მოუწოდებენ თანაქალაქელებს, საპარლამენტო არჩევნებში ხმა მისცენ მხოლოდ იმ პოლიტიკურ ძალებს, რომლებიც საქართველოსთვის ევროინტეგრაციის კურსის და ქუთაისისთვის საპარლამენტო ქალაქის სტატუსის დაბრუნების პირობას დადებენ.

“ჩვენ, დღეს, ფარნებით ვეძებდით “ოცნების” პროექტებს, ჯერჯერობით ვერ ვიპოვეთ. ის, რომ ქუთაისი დაცლილია, არ არის მხოლოდ ქუთაისის პრობლემა, ეს, ალბათ, პირველ რიგში, თბილისის პრობლემაც არის. მაშინ, როდესაც სახელმწიფო კომპანიების უმეტესობა და სახელმწიფო სტრუქტურები, რომლებიც ბიუჯეტიდან ფინანსდებიან, თბილისში ფუნქციონირებს, თავისთავად, ეკონომიკაც მთლიანად კონცენტრირებულია თბილისში და მთელი საქართველო, შეიძლება ითქვას, ერთ ქალაქში ცხოვრობს”, – განაცხადა სამოქალაქო აქტივისტმა ეკა ფხაკაძემ.

აქცია-პერფორმანსი მოძრაობა “დატოვე პარლამენტი ქუთაისში” ორგანიზებით გაიმართა.

საქართველოს აეროპორტების გაერთიანება ქუთაისის დავით აღმაშენებლის სახელობის საერთაშორისო აეროპორტის ახალი - 3,5 კმ-იანი ასაფრენ-დასაფრენი ზოლისა და სააეროდრომო ინფრასტრუქტურის მშენებლობას იწყებს.

მშენებლობის დაწყებასთან დაკავშირებით, სიმბოლური კაფსულა, ქუთაისის საერთაშორისო აეროპორტში, საქართველოს პრემიერ-მინისტრმა ირაკლი კობახიძემ, პირველმა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა, საქართველოს აეროპორტების გაერთიანების გენერალურმა დირექტორმა ირაკლი ქარქაშაძემ და სამშენებლო კომპანია ,,ანაგის" დირექტორმა ირაკლი გოგოლიშვილმა  ჩაუშვეს.

ახალი ასაფრენ-დასაფრენი ზოლის მშენებლობა ხელს შეუწყობს აეროპორტთან ლოგისტიკური ცენტრისა და სატვირთო ტერმინალის განვითარებას. ასევე, სამომავლოდ, დიდი ზომის (ე. წ. wide body) საჰაერო ხომალდების მიღება ქუთაისის აეროპორტს შესაძლებლობას მისცემს შორი მანძილებიდან ახალი ავია-მიმართულებები დაემატოს.

პროექტის საინვესტიციო ღირებულება უპრეცედენტოდ დიდი - 240 მლნ ლარამდეა და ჯამურად, 2012-2024 წლებში ქუთაისის საერთაშორისო აეროპორტში განხორციელებულ კაპიტალურ დანახარჯებს 40 მლნ ლარით აღემატება. 

 ახალი, 3.5 კმ-იანი ასაფრენ-დასაფრენ ზოლისა და სააეროდრომო ინფრასტრუქტურის მშენებლობა, ქუთაისის საერთაშორისო აეროპორტის გენერალური განვითარების გეგმის პირველი ფაზის ნაწილია, რომელზეც მუშაობა საქართველოს აეროპორტების გაერთიანების ჩართულობით, მსოფლიოს ერთ-ერთმა ყველაზე გავლენიანმა საავიაციო საკონსულტაციო კომპანია IATA კონსალტინგმა ცოტა ხნის წინ დაასრულა.

პროექტს სამშენებლო კომპანია ,,ანაგი" განახორციელებს და მისი დასრულება 2026 წლის გაზაფხულზე იგეგმება, რის შემდეგაც, ქუთაისის საერთაშორისო აეროპორტი იქნება ერთადერთი აეროპორტი საქართველოში, რომელიც დიდი ზომის საჰაერო ხომალდების მიღებას შეზღუდვების გარეშე შეძლებს.

დღეისათვის, ქუთაისის საერთაშორისო აეროპორტი D კოდით ოპერირებს, მისი ასაფრენ-დასაფრენი ზოლის (ადზ) სიგრძე 2,5 კმ-ს შეადგენს, რაც საშუალო ზომის საჰაერო ხომალდების ოპერირებას უზრუნველყოფს.