ერთიანი ეროვნული გამოცდების პერიოდში ქუთაისში საზოგადოებრივი ტრანსპორტის მუშაობის საათები იცვლება.

2 -დან 24 ივლისის ჩათვლით მუნიციპალური ტრანსპორტი მუშაობას დილის 06:30 საათიდან დაიწყებს .

ინფორმაციას ქუთაისის მუნიციპალიტეტის მერია ავრცელებს. 

 გარემოსდაცვითი ზედამხედველობის დეპარტამენტმა გურიაში, იმერეთსა და ქვემო-ქართლში ქვიშა-ხრეშის უკანონო მოპოვების ფაქტები გამოავლინა

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლების მიერ სამართალდარღვევები გამოვლენილია ოზურგეთის მუნიციპალიტეტის სოფელ სულაურში, სამტრედიის მუნიციპალიტეტის სოფელ საჯავახოში, გარდაბნის მუნიციპალიტეტის სოფელ ნაგებსა და რუსთავში. 

სამართალდამრღვევებმა სპეციალური ტექნიკის გამოყენებით, მდინარეების - სუფსის, რიონისა და მტკვრის კალაპოტებიდან უკანონოდ მოიპოვეს, ჯამში 100 კუბურ მეტრზე მეტი მოცულობის ქვიშა-ხრეში. 

შედგა შესაბამისი დოკუმენტაცია. მასალები, შემდგომი რეაგირების მიზნით შესაბამის უწყებებში გადაიგზავნა. 

შინაგან საქმეთა მინისტრის ბრძანების საფუძველზე შექმნილმა მუდმივმოქმედმა კომისიამ, საქართველოს მასშტაბით სხვადასხვა დროს ჩატარებული საგამოძიებო ღონისძიებების შედეგად, უკანონო ბრუნვიდან ამოღებული 700 კილოგრამამდე ნარკოტიკული საშუალებები გაანადგურა, რომელთა საერთო ღირებულება ე.წ. შავ ბაზარზე 37 მილიონ ლარს აღემატება.

შინაგან საქმეთა სამინისტროს თანამშრომლებმა, პოლიციელებზე თავდასხმის ბრალდებით იმერეთში ერთი პირი დააკავეს. 

ბრალდებულმა მიმდინარე წლის 26 ივნისს, ზესტაფონში, სამართალდამცველებს სამსახურებრივი მოვალეობის შესრულებისას სიტყვიერი შეურაცხყოფა მიაყენა, ასევე მათ ცივი იარაღის გამოყენებით სიცოცხლის მოსპობით დაემუქრა და სამინისტროს ბალანსზე რიცხული ავტომობილი დააზიანა. სამართალდამცველებმა მამაკაცი განაიარაღეს და შემთხვევის ადგილზე ბრალდებულის სახით დააკავეს.

გამოძიება სისხლის სამართლის კოდექსის 353-ე პრიმა მუხლის პირველი ნაწილით მიმდინარეობს, რაც 7 წლამდე ვადით თავისუფლების აღკვეთას ითვალისწინებს.

მესამე დღეა ქუთაისში, ვერიკო ანჯაფარიძის სკვერის მიმდებარე ტერიტორიაზე, გასტრონომიული ფესტივალი„გემოფესტი 2026“ მიმდინარეობს .

 „გემოფესტი“ სტუმრებს ქართულ გასტრონომიას, მეწარმეების მრავალფეროვან პროდუქციას სთავაზობს. წელს ფესტივალში პირველად მონაწილეობენ მეწარმეები აფხაზეთიდან. 

„გემოფესტის“ მთავარი მიზანია ქართული გასტრონომიის პოპულარიზაცია, ადგილობრივი წარმოების მხარდაჭერა და გასტრო-ტურიზმის განვითარების ხელშეწყობა.

ფესტივალი იმართება საქართველოს ტურიზმის ეროვნული ადმინისტრაციის ორგანიზებით, ქუთაისის მუნიციპალიტეტის მერიის, იმერეთის დანიშნულების ადგილის მართვის ორგანიზაციისა და საქართველოს აეროპორტების გაერთიანების მხარდაჭერით.

 26 ივნისიდან 28 ივნისის დილამდე საქართველოში მოსალოდნელია დროგამოშვებით ნალექი, დასავლეთ საქართველოს უმეტეს ტერიტორიაზე და აღმოსავლეთ საქართველოს მთიან რაიონებში ზოგან ძლიერი. შესაძლებელია ელჭექი და ქარის გაძლიერება, კახეთში და ქვეყნის მთიან რაიონებში სეტყვა, 27-28 ივნისს - ზღვაზე 3-4 ბალიანი შტორმული ღელვა.  

მოსალოდნელმა ნალექებმა შესაძლებელია საქართველოს მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს (საფრთხის დონე საშუალო).