როგორც შეფასების და გამოცდების ეროვნული ცენტრის ხელმძღვანელმა სოფიო გორგოძემ ბრიფინგზე განაცხადა 2021 წლის ერთიანი ეროვნული გამოცდები პირველ ივლისს ქართული ენისა და ლიტერატურის გამოცდით დაიწყება.
მისივე თქმით,14 ივლისიდან გამოცდებში მასწავლებლები და მასწავლებლობის მსურველი პირები ჩაერთვებიან. 28 ივლისს სტუდენტთა საგრანტო კონკურსი ჩატარდება, ხოლო საერთო სამაგისტრო გამოცდას მაგისტრანტობის კანდიდატები 27-30 ივლისს ჩააბარებენ.
შეფასების და გამოცდების ეროვნული ცენტრის ინფორმაციით, 2021 წელს გამოცდებში მონაწილეობის მსურველთა რეგისტრაციის სტატისტიკა ასეთია: ერთიანი ეროვნული გამოცდებისათვის რეგისტრაცია 38 400-ზე მეტმა აბიტურიენტმა გაიარა; სტუდენტთა საგრანტო კონკურსში მონაწილეობის სურვილი 3 700-ზე მეტმა სტუდენტმა გამოთქვა; საერთო სამაგისტრო გამოცდისათვის 12 800-ზე მეტი მაგისტრანტობის კანდიდატი დარეგისტრირდა.
მასწავლებლის საგნის გამოცდაზე, უფროსი სპეციალური მასწავლებლის გამოცდაზე, ასევე საგნობრივი და პროფესიული კომპეტენციების დასადასტურებლად რეგისტრაცია 28 700-ზე მეტმა მსურველმა გაიარა - ამ ჩამონათვალში არიან ის აპლიკანტებიც, რომლებიც 2020 წლის 30 აპრილის ჩათვლით დარეგისტრირდნენ საგნობრივი ან/და პროფესიული კომპეტენციების დადასტურების ტესტირებაზე.
გორგოძის განცხადებით, დეტალური ინფორმაცია გამოცდის თარიღის, გამოცდაზე გამოცხადების დროისა და საგამოცდო ცენტრის მისამართის შესახებ მითითებული იქნება სპეციალურ ბარათზე, რომლის ამობეჭდვასაც გამოსაცდელები საკუთარი სარეგისტრაციო გვერდიდან შეძლებენ.
"
საექსპერტო მისიის პირველი ეტაპი, რომელიც ორი დღის განმავლობაში ჟვანიას სკოლისა და ევროკომისიის ტექნიკური დახმარებისა და ინფორმაციის გაცვლის პროგრამის (TAIEX) ერთობლივი პროექტის ფარგლებში მიმდინარეობდა, დასრულებულია.
ევროპელი ექსპერტების მონაწილეობით გამართულ კონფერენციაზე საუბარი შეეხო ჟვანიას სკოლაში არსებულ სასწავლო პროცესს, ასევე უცხოელი პარტნიორების მიერ შემოთავაზებულ იქნა კონკრეტული რეკომენდაციები. როგორც შეხვედრაზე აღინიშნა, თანამშრომლობა მომავალშიც გაგრძელდება.
„პირველად, არსებობის ისტორიაში ჟვანიას სკოლა ხდება ევროკავშირის პროგრამის (TAIEX ) მონაწილე, ეს კი ადასტურებს იმას, რომ ჩვენ და ჩვენს სკოლას სწორი კურსი გვაქვს არჩეული.
იმის გარდა, რომ ეს მოვლენა სკოლის ინტერნაციონალიზაციისა და საერთაშორისო კავშირების გამყარების კუთხით მნიშვნელოვანი წინგადადგმული ნაბიჯია, ასევე ჩვენთვის ძალიან საინტერესო გამოცდილების მქონე ევროპელი პარტნიორებისგან ღირებული დახმარება - სასარგებლო რჩევები მივიღეთ ტრენინგების მონიტორინგისა და შეფასების ეფექტიანობის სისტემურად გამართვის მიმართულებით, რაც ხელს შეუწყობს სკოლაში ტრენინგების შეფასების მეთოდოლოგიისა და, შესაბამისად, სასწავლო პროგრამის შემუშავების პროცესის გაუმჯობესებას.
ჩვენი მხრივ, ევროპელ ექსპერტებს გავაცანით ჟვანიას სკოლაში არსებულ სასწავლო პროცესთან დაკავშირებული პროცედურები, გამოცდილება, მიღწევები და გამოწვევები.
ვსარგებლობ შემთხვევით და დიდი მადლობა მინდა გადავუხადო ევროპელ პარტნიორებს გაწეული სამუშაოსთვის,ხოლო საგარეო საქმეთა სამინისტროს- ევროკომისიის ტექნიკური დახმარებისა და ინფორმაციის გაცვლის პროგრამასთან (TAIEX) ეფექტური კოორდინაციის უზრუნველყოფისთვის.“-განაცხადა ჟვანიას სკოლის დირექტორმა ქეთევან ჯაყელმა.
