ისე ნუ წარმოვაჩენთ, რომ რაღაცას ვმათხოვრობთ და ვეხვეწებით ვინმეს, - ამის შესახებ პრემიერ-მინისტრმა ევროკავშირის წევრობის კანდიდატის სტატუსის მინიჭებასთან დაკავშირებით დასმულ კითხვაზე განაცხადა.
პერმიერის განმარტებით, თუ გადაწყვეტილება უსამართლო, შეურაცხმყოფელი იქნება ქვეყნისთვის, ის „ყველაფერს ფარდას ახდის“.
„ჩვენ თავმოყვარე ერი ვართ, ჩვენ ვართ ერთ-ერთი ყველაზე უძველესი ცივილიზაცია მსოფლიოში, უძველესი კულტურით და ჩვენი ძალიან მაგარი, ამაყი ხალხით. აქ ამპარტავნობაზე არ არის საუბარი, მაგრამ ისე ნუ წარმოვაჩენთ, რომ რაღაცას ვმათხოვრობთ და ვეხვეწებით ვინმეს. ჩვენ არაფერს არ ვითხოვთ, საჯაროდ ვთქვი ბრიუსელშიც, დავოსშიც და ბრატისლავაშიც, ჩენ არაფერს არ ვითხოვთ დაუმსახურებელს, მე ვითხოვ სამართლიან დამოკიდებულებას, პატივისცემის გამოხატულებას, 17 ივნისს იქნება ევროკომისიის მოსაზრება და 23-24 ივნისს დაველოდები და მანამდე შევინარჩუნებ რეზერვაციას, რომ უფრო მეტი არ ვილაპარაკო ჩვენი ხალხის წინაშე, თუ გადაწყვეტილება იქნება ისეთი უსამართლო, ისეთივე შეუარცხმყოფელი ჩვენი ქვეყნისთვის, ჩვენი ხალხისთვის, ვიტოვებ რეზერვაციას, რომ ყველაფერს ფარდას ავხდი და ჩვენ ხალხს ყველაფერს ვეტყვი. თქვენგან განსხვავებით შეთქმულების თეორიებზე არ ველაპარაკები, მე ხალხს ველაპარაკები მხოლოდ და მხოლოდ ფაქტებით“, - განუცხადა ღარიბაშვილმა ჟურნალისტებს.
გვაქვს უპრეცედენტო ეკონომიკური ზრდა. ახლახან ვიყავით ბრატისლავაში და ჩვენი ევროპელი კოლეგები გაოცებული ისმენდნენ ჩემი და ლევან დავითაშვილის საუბრებს, - ამის შესახებ საქართველოს პრემიერ-მინისტრმა, ირაკლი ღარიბაშვილმა მთავრობის სხდომაზე განაცხადა.
მისივე თქმით, „ასეთი ეკონომიკური ზრდა ძალიან ცოტა ქვეყანას აქვს“.
„პირველი კვარტალი ჩვენ დავხურეთ 14%-იანი ეკონომიკური ზრდით და 4 თვეში გამოგვივიდა 10,8% ეკონომიკური ზრდა, რაც არის ძალიან სასიხარულო. ქვეყანაში არის პოზიტიური დინამიკა. შარშან აპრილში ჩვენ გვქონდა თითქმის 45%-იანი ეკონომიკური ზრდა. აპრილში არ ველოდით ზრდას, მაგრამ ამის მიუხედავად მაინც გვაქვს დადებითი დინამიკა და ჯამში 4 თვეში გამოგვივიდა 10,8% ეკონომიკური ზრდა. სრულად აღდგენილია ფრენები, ტურიზმის აღდგენა მიმდინარეობს ძალიან სწრაფად. ჩვენი ქალაქები სავსეა ტურისტებით და ეს გვახარებს“, - განაცხადა ღარიბაშვილმა.
მან ასევე აღნიშნა, რომ ასევე იზრდება ექსპერტი.
„ბიზნესის ბრუნვა არის გაზრდილი წინა წელთან შედარებით ისევე, როგორც მთლიანი ბიზნეს სექტორი და შეადგინა 38,6 მილიარდი ლარი. სამუშაო ადგილების რაოდენობაც 8,2%-ით გაზრდილია ბიზნეს სექტორში და ეს არის დაახლოებით 50 000. საშუალო ხელფასის მოცულობა 15%-ით არის გაზრდილი.
ასევე გეტყვით, რომ სიღარიბის დონე ისტორიულ მინიმუმზე არის ჩამოსული - 17,5% შეადგინა და ასეთი შემცირება არ ყოფილა ბოლო წლების განმავლობაში. შედარებისთვის, გეტყვით, რომ 2010 წელს სიღარიბის დონე იყო 38%, ხოლო 2012-ში, როდესაც ხელისუფლებაში მოვედით, იყო 34%. ეს არ გვაკმაყოფილებს, მეტი უნდა ვიმუშაოთ, მაგრამ ამას სჭირდება მშვიდობა, სტაბილურობის შენარჩუნება და განვითარება, რომელსაც ჩვენ ვაკეთებთ.
მაგალითად, თურქეთში ინფლაცია იყო 73%. ევროპაში ის არის პიკზე - თითქმის ყველგან ის ისტორიულ მაქსიმუმზეა, მათ შორის გერმანიაში, საფრანგეთში. მოლდოვაში, ჩვენს კოლეგა ქვეყანაში არის 27%. ესტონეთში 18%, რუსეთში 17%, ბელარუსში 16%, მეზობელ ქვეყნებშიც ინფლაციის მაჩვენებელი ორნიშნაა - აზერბაიჯანში 12,8%, ხოლო სომხეთში 9%-მდე“, - განაცხადა პრემიერმა.
