ოჯახის სიწმინდისა და მშობლების პატივისცემის დღესთან დაკავშირებით 2024 წლის 17 მაისი უქმე დღედ განისაზღვრა, – ამის შესახებ საქართველოს მთავრობის დადგენილებაშია ნათქვამი, რომელიც საკანონმდებლო მაცნეში უკვე გამოქვეყნდა.

დოკუმენტში აღნიშნულია, რომ დადგენილება შეეხება ზოგადი ადმინისტრაციული კოდექსით განსაზღვრულ ადმინისტრაციულ ორგანოებს, თუმცა ასევე დასახელებულია ის საქმიანობები და მოხელეები, რომელთაც შესაძლოა, არ შეეხოს 17 მაისს დასვენების დღე.

„საქართველოს ორგანული კანონის „საქართველოს შრომის კოდექსი“ 30-ე მუხლის მე-3 პუნქტის შესაბამისად, საქართველოს ზოგადი ადმინისტრაციული კოდექსით განსაზღვრულ ადმინისტრაციულ ორგანოებში (შემდგომში – ადმინისტრაციული ორგანო) დასაქმებულთათვის ოჯახის სიწმინდისა და მშობლების პატივისცემის დღესთან დაკავშირებით 2024 წლის 17 მაისი განისაზღვროს უქმე დღედ.

ადმინისტრაციული ორგანო განსაზღვრავს მის დაქვემდებარებაში მყოფ/მის სისტემაში შემავალ სამსახურებს/მოსამსახურეებს, რომელთა მიმართაც არ გავრცელდება ეს დადგენილება, თუ მათი ფუნქციების შესრულება სახელმწიფო ხელისუფლების განხორციელებისა და საზოგადოების ნორმალური ფუნქციონირებისთვის წარმოადგენს გადაუდებელ აუცილებლობას.

ეს დადგენილება არ ვრცელდება საქართველოს ეროვნული ბანკის ზედამხედველობას აქვემდებარებული პირების წინაშე შესასრულებელ ფინანსურ ვალდებულებებზე.

ეს დადგენილება არ ვრცელდება „სახელმწიფო შესყიდვების შესახებ“ საქართველოს კანონით გათვალისწინებულ სახელმწიფო შესყიდვებთან დაკავშირებულ საქმიანობაზე, მათ შორის, ამავე კანონის მე-3 მუხლის პირველი პუნქტის „ა.თ“ ქვეპუნქტით გათვალისწინებულ შესყიდვებთან დაკავშირებულ და სახელმწიფო შესყიდვებთან დაკავშირებული დავების განხილვის საბჭოს საქმიანობაზე“, – ნათქვამია საქართველოს მთავრობის 15 მაისით დათარიღებულ დადგენილებაში, რომელსაც ხელს პრემიერ-მინისტრი ირაკლი კობახიძე აწერს.

დადგენილება გამოქვეყნებისთანავე ძალაში შევიდა.

საქართველოს 38 უმაღლესი სასწავლებელი ერთობლივ განცხადებას ავრცელებს. ხელმომწერთა შორისაა ქუთაისის 2 უნივერსიტეტი- აკაკი წერეთლის სახელმწიფო უნივერსიტეტი და ქუთაისის საერთაშორისო უნივერსიტეტი. 

,,საქართველოს უნივერსიტეტები, საქართველოს უმაღლეს საგანმანათლებლო დაწესებულებათა რექტორების მუდმივმოქმედი კონფერენციის წევრები ვეხმიანებით ქვეყანაში მიმდინარე მოვლენებს, რომლებმაც ასახვა ჰპოვა უნივერსიტეტებში სასწავლო პროცესის წარმართვაზე.

ჩვენი ევროპული მომავლის ფუნდამენტური საფუძველია, თავისუფალ და არადისკრიმინაციულ გარემოში ახალგაზრდების განათლება. აქედან გამომდინარე მიგვაჩნია, რომ ნებისმიერი პოლიტიკური პროცესი აკადემიური სივრცის მიღმა უნდა დარჩეს. შესაბამისად, ის არ უნდა აისახოს უნივერსიტეტების ფუნქციონირებასა და სწავლა-სწავლების წარმართვაზე. არ უნდა მოხდეს სტუდენტთა ინტერესებისა და სასწავლო პროცესის დაზიანება. ხაზს ვუსვამთ, რომ ჩვენთვის ფუნდამენტურად ღირებულია გამოხატვის თავისუფლების გარანტირება.

მიუღებელია, რომ აკადემიური პერსონალის ზოგიერთი წარმომადგენელი უარს აცხადებს საკუთარი მოვალეობის შესრულებაზე. ამით ხელი ეშლება სასწავლო პროცესის წარმართვას. ეს არღვევს სტუდენტის კონსტიტუციურ უფლებას. აღსანიშნავია, რომ მიუხედავად განვითარებული მოვლენებისა, უნივერსიტეტებში სასწავლო პროცესი გრძელდება. ამასთან, აკადემიური პერსონალის ლექციებზე გამოუცხადებლობა წარმოადგენს არა მხოლოდ მათთვის კანონმდებლობითა და უნივერსიტეტებთან დადებული შრომითი ხელშეკრულებით დაკისრებული ვალდებულებების დარღვევას, არამედ უშუალოდ აზარალებს იმ სტუდენტთა ინტერესებს, რომლებიც დღეს ესწრებიან სალექციო კურსებს. ლექტორთა მიერ სასწავლო პროცესის შეფერხება, ხელს უშლის უმაღლესი განათლების მიზნების რეალიზებას და საგანმანათლებლო პროგრამებით გათვალისწინებული სწავლის შედეგების მიღწევას. ეს ყველაფერი კი უარყოფითად აისახება ხარისხის უზრუნველყოფის ეროვნული და ევროპული სტანდარტების შესრულებაზე.

თითოეული უნივერსიტეტის, მისი პროფესორ-მასწავლებლების ვალდებულებაა, უზრუნველყოს სტუდენტებისთვის სასწავლო პროცესის უწყვეტად წარმართვა და საუნივერსიტეტო სივრცეებში პოლიტიკისგან თავისუფალი, ჯანსაღი და აკადემიური საგანმანათლებლო გარემოს შექმნა.

თუკი ჩვენი განზრახვაა უკეთესი საქართველო, ამის მიღწევის ერთადერთი და საუკეთესო საშუალებაა ხარისხიანი განათლების მიღება.

აქვე აღვნიშნავთ, რომ ჩვენთვის მიუღებელია უნივერსიტეტების სახელით გარკვეული ჯგუფების მიერ პოლიტიკური განცხადებების გაკეთება.

თითოეული ჩვენგანის ვალია, ერთად უზრუნველვყოთ ჩვენი სტუდენტებისთვის შესაბამისი საგანმანათლებლო გარემო, რაც დღეს საქართველოს ევროინტეგრაციისკენ მიმავალ გზაზე განსაკუთრებით მნიშვნელოვანია.,,-წერია განაცხადებში.

ქუთაისის აკაკი წერეთლის სახელმწიფო უნივერსიტეტის პროფესორ-მასწავლებელთა ნაწილი განცხადებას ავრცელებს. 

,,ჩვენ, აკაკი წერეთლის სახელმწიფო უნივერსიტეტის პროფესორ-მასწავლებლები ვაპროტესტებთ კანონს  ,,უცხოური გამჭვირვალობის შესახებ,,მხარს ვუჭერთ და გამოვხატავთ სოლიდარობას აკაკი წერეთლის სახელმწიფო უნივერსიტეტის სტუდენტების მიმართ,რომლებმაც გუშინ ღიად,საჯაროდ დააფიქსირეს დამოკიდებულება ჩვენს ქვეყანაში განვითარებული მოვლენების მიმართ.მიგვაჩნია,რომ სტუდენტობა წარმოადგენს უნივერსიტეტის ყველაზე დიდ საგანძურს და მათ ძალიან გულწრფელ სურვილთან   და მომავალის ხედვასთან უნდა იყოს თანხვედრაში ჩვენი, ლექტორ-მასწავლებლების პოზიცია. საქართველოს, მისი ხვალინდელი დღის ადგილი მხოლოდ ევროპაშია. არა რუსულ კანონს,,-აღნიშნული განცხადება უნივერსიტეტის პროფესორ-მასწავლებლების სახელით მაკა ხეცურიანმა წაიკითხა.

აღნიშნულ განცხადებას ხელს ამ დროისთვის  35 ლექტორი აწერს.

,,საქართველო,, ,,არა რუსულ კანონს,,-ამ შეძახილებით ქუთაისში, ადგილობრივი თვითმმართველობის შენობის წინ საპროტესტო აქცია იმართება. შეკრებილები უკვე ოცდამეექვსე დღეა ხელისუფლებას ,,რუსული კანონის,, უკან გაწვევას თხოვენ.

დღეს ქუთაისში აკაკი წერეთლის სახელმწიფო უნივერსიტეტისა და ბიძინა ივანიშვილის მიერ დაარსებული ქუთაისის საერთაშორისო უნივერსიტეტის სტუდენტები გაიფიცნენ.

შეგვახსენებთ, პარლამენტში რუსული კანონის მესამე მოსმენა ხვალ იგეგმებ.

პროტესტის ნიშნად ლექციებს არ დავესწრებით-ეს განცხადება ქუთაისის აკაკი წერეთლის სახელმწიფო უნივერსიტეტის სტუდენტებმა დღეს გააკეთეს.მათი თქმით,ისინი უერთდებიან სხვა უმაღლეს სასწავლებლებს და დღეიდან აუდიტორიაში შესვლას არ აპირებენ.სტუდენტები მიიჩნევენ,რომ საქართველოს მომავალი მხოლოდ ევროპაშია და ისინი სასწავლო პროცესის ჩვეულ რეჟიმში გაგრძელებას არ აპირებენ.

,,მიგვაჩნია, რომ ე.წ. გამჭვირვალობის შესახებ კანონის ხელახლა ინიცირებამ საფრთხის ქვეშ დააყენა საქართველოს ევროატლანტიკური მომავალი, რომელიც მოსახლეობის აბსოლუტური უმრავლესობის ნება და არჩევანია. 

მიგვაჩნია, რომ ამ სიტუაციაში არაფერია უფრო მნიშვნელოვანი, ვიდრე საქართველოს ისტორიული არჩევანის და ევროპული ფასეულობების დაცვა. 

შესაბამისად, ვუერთდებით სხვა უნივერისტეტების სტუდენტების პროტესტს და ვაცხადებთ: შეუძლებლად მიგვაჩნია სასწავლო პროცესის ჩვეულ, სააუდიტორიო ფორმატში გაგრძელება და პროტესტის ნიშნად უარს ვამბობთ აკადემიურ პროცესში მონაწილეობაზე.

მოვუწოდებთ ყველა სტუდენტთსა და ლექტორს მოვუწოდებთ,იყვნენ სოლიდარული და შემოგვიერთდნენ,,-აცხადებენ სტუდენტები.

ქუთაისის აკაკი წერეთლის სახელმწიფო უნივერსიტეტის სამედიცინო ფაკულტეტის სტუდენტები  საპროტესტო აქცია მართავენ.

ახალგაზრდებმა მსვლელობა თეთრ ხალათებში მოაწყვეს და განაცხადეს,რომ  თბილისში მიმდინარე პროცესებს უერთდებიან.

,,არა რუსულ კანონს,კი ევროპას,,  ,,გამჭირვალე კანონს გამჭირვალე მომავალი გვირჩევნია,, ,,მე არ მინდა ვიყო ექიმი გოსპიტალში,,-ამ ტრანსფარანტებით სტუდენტებმა საკუთარი პოზიცია დააფიქსირეს.

დღეს 14:00 საათზე ქუთაისის აკაკი წერეთლის სახელმწიფო უნივერსიტეტის სტუდენტები განცხადებას გააკეთებენ .ისინი გაფიცვისთვის ემზადებიან.