დღეს,26 სექტემბერს, 19:00 საათზე, პარლამენტის შენობის წინ სოფელ შუქრუთის მოსახლეობა მორიგ აქვიას გამართავს.
სოლიდარობის აქციაზე მოსახლეობის მოთხოვნები კიდევ ერთხელ გაჟღერდება.
შუქრუთის მაცხოვრებლები 26 დღეა შემშილობენ .ხუთ მოშიმშილეს პირი აქვს ამოკერილი.
უწყვეტი პროტესტის 190 დღეზე მეტია გრძელდება. ისინი კომპანია “ჯორჯიან მანგანეზისგან” მათთვის მიყენებული ზიანის სამართლიან ანაზღაურებას ითხოვენ. საკითხით დაინტერესებისკენ გაფიცულები ცენტრალურ ხელისუფლებას მოუწოდებენ.მათ პრემიერს შესაბამისი წერილითაც მიმართეს,თუმცა პასუხი არ მიუღიათ.
შუქრუთელები, რომლებიც თბილისში, პარლამენტთან აქციის გასამართად 11 სექტემბერს ჩამოვიდნენ, ღამესაც აქციის მიმდებარე ტერიტორიაზე უმძიმეს პირობებში ათევენ, ხოლო ადგილზე მობილიზებული საპატრულო პოლიცია მათ კარვის გაშლის საშუალებას არ აძლევს. როგორც ადგილობრივები ჰყვებიან, მოშიმშილეებს ჯანმრთელობის მდგომარეობა, რომლებიც ღამეს ღია ცის ქვეშ, წვიმაში ათევენ, ყოველდღიურად მძიმდება და სამედიცინო დახმარებას სულ უფრო და უფრო ხშირად საჭიროებენ.
