საზოგადოება

: საზოგადოება; 24 ივლისი 2021; გადასვლები: 870

მაშველები საზღვაო სეზონის დაწყებიდან დღემდე 100-მდე ადამიანს დაეხმარნენ

შინაგან საქმეთა სამინისტროს საგანგებო სიტუაციების მართვის სამსახურის თანამშრომლები მიმდინარე საზღვაო სეზონზე გამოჩენილი განსაკუთრებული მამაცობისთვის დაჯილდოვდნენ. სახანძრო-სამაშველო ძალების დეპარტამენტის უფროსის მოადგილემ - ლაშა თვაურმა განსაკუთრებული მამაცობისთვის სამახსოვრო საჩუქრები 3 მაშველს - მამუკა წულუკიძეს, დავით ბაუჟაძეს და ბექა ხელაძეს გადასცა. სამივე მათგანმა ბოლო ერთი თვის განმავლობაში, საკუთარი სიცოცხლის ფასად, რამდენიმე რთული სამაშველო ოპერაცია ჩაატარა.

საგანგებო სიტუაციების მართვის სამსახურის თანამშრომლებმა 2021 წლის საზღვაო სეზონის გახსნიდან დღემდე, დაახლოებით ერთთვიან მონაკვეთში წყალში მყოფი 70 ადამიანის სიცოცხლე გადაარჩინეს.

გარდა ამისა, სანაპირო ზოლზე იპოვეს 10 გზააბნეული მოქალაქე, მათ შორის იყვნენ არასრულწლოვნებიც. სანაპირო ზოლზე მორიგეობისას, მაშველებმა პირველადი სამედიცინო დახმარება აღმოუჩინეს 12 დამსვენებელს.

საგანგებო სიტუაციების მართვის სამსახურის მაშველები გურიის, სამეგრელოს და აჭარის სანაპირო ზოლზე, ასევე, რაჭაში შაორის ტბაზე, თბილისის ზღვაზე და სხვა ტურისტულ ზონებში ყოველდღიურად მორიგეობენ და მოქალაქეთა უსაფრთხო დასვენებაზე ზრუნავენ. 2021 წლის ტურისტული სეზონის განმავლობაში, რამდენიმე ლოკაციაზე 300-ზე მეტი მაშველი მუშაობს და საჭიროების შემთხვევაში, მოქალაქეებს შესაბამის დახმარებას უწევს.

შინაგან საქმეთა სამინისტროს საგანგებო სიტუაციების მართვის სამსახური მოგიწოდებთ დასვენებისას მაქსიმალურად დაიცვათ უსაფრთხოების წესები და დაემორჩილოთ მაშველების მითითებებს.

ყურადღება მიაქციეთ საინფორმაციო ბანერებს და ამკრძალავ ნიშნებს. ასევე, არ გასცდეთ წყალში მონიშნულ საცურაო ტერიტორიას და მაშველთა პატრულირების არეალს; არ შეხვიდეთ წყალში არაფხიზელ მდგომარეობაში ან ნაბახუსევზე; დაუშვებელია ბავშვების და მოზარდების უყურადღებოდ დატოვება სანაპირო ზოლსა და წყალში. კატეგორიულად აკრძალულია წყალში შესვლა შტორმის, უამინდობის და შეზღუდული ხილვადობის დროს.

: საზოგადოება; 23 ივლისი 2021; გადასვლები: 862

იმერეთსა და რაჭა-ლეჩხუმში უკანონო ტყითსარგებლობის 14 ფაქტი გამოვლინდა

გარემოსდაცვითი ზედამხედველობის დეპარტამენტის თანამშრომლებმა იმერეთსა და რაჭა-ლეჩხუმში უკანონო ტყითსარგებლობის 14 ფაქტი გამოავლინეს.

სამართალდარღვევებიდან 4 ხე-ტყის უკანონო ტრანსპორტირების ფაქტია, 4 - ხე-ტყის უკანონო მოპოვების, 6 კი, ხე-ტყის უკანონო მოპოვება-ტრანსპორტირების.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის დასავლეთის რეგიონული სამმართველოს თანამშრომლების მიერ, უკანონო ტრანსპორტირების ფაქტები გამოვლენილია ბაღდათისა და ამბროლაურის მუნიციპალიტეტებში. კურორტ საირმის მიმდებარე ტერიტორიაზე, მოქალაქემ 6 კუბური მეტრი თხმელის (მურყანი) სახეობის საშეშე მერქნის უკანონო ტრანსპორტირება მოახდინა. სოფელ ხანში, მოქალაქის მიერ წარმოდგენილი ხე-ტყის წარმოშობის დოკუმენტში მითითებულ მონაცემები, არ ემთხვეოდა ავტომანქანის ძარაზე განთავსებულ ფაქტობრივ მასალას.

გარდა ზემოაღნიშნულისა, ამბროლაურის მუნიციპალიტეტში, სამართალდამრღვევებმა წიფლის სახეობის 15 ერთეული მორისა და 2,5 კუბური მეტრი საშეშე მერქნის უკანონო ტრანსპორტირება მოახდინეს.

ხე-ტყის უკანონო მოპოვების ფაქტები გამოვლენილია ტყიბულის, ხონისა და ონის მუნიციპალიტეტებში. მოქალაქეებმა უკანონოდ მოიპოვეს ერთი ერთეული წიფლის სახეობის და 12 ერთეული რცხილის სახეობის ხე-მცენარე.

ზესტაფონის, ჭიათურის, ვანის, ხონისა და ამბროლაურის მუნიციპალიტეტებში, მოქალაქეებმა უკანონოდ მოიპოვეს ჯამში 6 ერთეული სხვადასხვა სახეობის ხე-მცენარე და მათი უკანონო ტრანსპორტირება მოახდინეს.

სამართალდამრღვევების მიმართ შედგა ადმინისტრაციული სამართალდარღვევის შესახებ ოქმები. მასალები, შემდგომი რეაგირების მიზნით, შესაბამის უწყებებში გადაიგზავნება.

: საზოგადოება; 23 ივლისი 2021; გადასვლები: 816

შეხვედრა ტურისტული სექტორის წარმომადგენლებთან

იმერეთში სახელმწიფო რწმუნებული ზვიად შალამბერიძე ვანის არქეოლოგიურ მუზეუმში ტურისტული სექტორის წარმომადგენლებს შეხვდა.

მხარის გუბერნატორმა შეხვედრაზე ტურისტული ინფრასტრუქტურის, დარგის გამოწვევების, მათი დაძლევის გზებსა და სამომავლო განვითარების შესაძლებლობებზე ისაუბრა.

,,საპილოტე რეგიონების ინტეგრირებული განვითარების პროგრამა, რომელიც ხორციელდება ევროკავშირის დახმარებით, ძალიან მნიშვნელოვანი მიმართულებაა იმერეთისთვის. ორი წლის განმავლობაში რეგიონში მთლიანად 69 მილიონი ლარის პროექტების განხორციელებას შევძლებთ სხვადასხვა მიმართულებით, მათ შორის ერთ-ერთი არის ტურიზმის მიმართულება. დღეს შევიკრიბეთ ჩვენ იმ საზოგადოებასთან ერთად, რომელიც ჩართულია ამ სექტორში. მათი ჩართულობა და ინფორმირება ამ პროექტების განხორციელების შესახებ არის ძალიან მნიშვნელოვანი, რადგან მათ ფაქტიურად ყოველდღიურად აქვთ შეხება ამ სფეროსთან" - ზვიად შალამბერიძე.

შეხვედრაზე ყურადღება გამახვილდა ქუთაისის აეროპორტში ავიარეისების აღდგენის დინამიკაზე, რომელიც ძალიან მნიშვნელოვანია იმერეთის რეგიონისთვის.

განიხილეს ის გეგმებიც, რომელიც ხელს შეუწყობს იმერეთის მხარის პოპულარიზაციას, რაც, პირველ რიგში, გააძლიერებს იმერეთში ტურიზმის სექტორში დასაქმებულ ადამიანებს.

შეხვედრა კითხვა-პასუხის რეჟიმში გაიმართა. ასევე, ტურიზმის სფეროს წარმომადგენლებისთვის მოეწყო ინფო-ტური და მათ ჰქონდათ საშუალება ენახათ გამოფენა ,,სიცოცხლე და სიკვდილი - დიდებული პომპეი".

საქართველოში პირველად არის წარმოდგენილი ანტიკური სამყაროს ისტორიის მნიშვნელოვანი ეპიზოდი, რომელიც ახ. წ. 79 წელს, ვულკან ვეზუვის ამოფრქვევის შედეგად, ფერფლით დაფარული ძველი რომის დიდებული ქალაქის – პომპეის ისტორიას ასახავს. პომპეი, როგორც კარგად შემონახული ქალაქი, ანტიკური კულტურის კვლევის ერთ-ერთი მთავარი წყაროა.

: საზოგადოება; 22 ივლისი 2021; გადასვლები: 934

ვერ ვიტყვი,რომ გადაადგილების თავისუფლება გვაქვს-მაკა სულაძე

,,ვერ ვიტყვი რომ გადაადგილების თავისუფლება გვაქვს, რაც ასევე იყო შეთანხმების ერთ-ერთი შემადგენელი ნაწილი“ ასე ეხმაურება მოძრაობა ,,რიონის ხეობის გადარჩენისთვის“ ერთ-ერთი დამფუძნებელი მაკა სულაძე რიონის ხეობაში არსებულ ვითარებას.სულაძის თქმით, ხეობაში უწყვეტი პროტესტი გრძელდება.ადგილზე მობილიზებულია პოლიციაც, რომელიც გაადგილების უფლებას აქციის მთავარ ორგანიზატორებს მხოლოდ დეტალური ინფორმაციის მიღების შემდგომ აძლევს.

,, უნდა ჩავაბაროთ ყველა ჯერზე პოლიციას ინფორმაცია, სად მივდივართ, რა მიზნით და როდის დავბრუნდებით, თუ გადადაგილების თავისუფლება ქვია, ასეთი გვაქვს, მაგრამ ამას მე თავისუფლებას ვერ დავარქმევ -„განაცხადა რიონის ხეობის ერთ-ერთმა მცველმა.

: საზოგადოება; 22 ივლისი 2021; გადასვლები: 953

სოციალური სამართლიანობის ცენტრმა ნამოხვანისკენ გადაადგილების შეზღუდვა გააპროტესტა

დღეს “სოციალური სამართლიანობის ცენტრმა” (ყოფილი EMC) ქუთაისის საქალაქო სასამართლოს ადმინისტრაციული სარჩელით მიმართა, რომლითაც ასაჩივრებს შინაგან საქმეთა სამინისტროს მიერ სოფელ ნამოხვანის მიმართულებით გადაადგილების უკანონოდ და დაუსაბუთებლად შეზღუდვას.

სარჩელით, "სოციალური სამართლიანობის ცენტრი” ნამოხვანისკენ მიმავალ გზებზე ჩაყენებული პოლიციის ადგილიდან გაყვანას და მოქალაქეთა თავისუფალი გადაადგილების დაუყოვნებლივ უზრუნველყოფას ითხოვს.

3 აპრილიდან რიონის ხეობაში გადაადგილების თავისუფლების შეზღუდვისას, შინაგან საქმეთა სამინისტროს მიერ განმარტებული არ ყოფილა, თუ რა კონკრეტული საფრთხის პრევენციას ისახავდა მიზნად საპოლიციო ღონისძიებები.

პოლიციამ ამ დრომდე ვერ აჩვენა, რომ ადგილზე არსებობდა მყისიერი და კონკრეტული საფრთხე, რომლის მოსალოდნელობა დასაბუთებული იქნებოდა ობიექტური ინფორმაციითა და გარემოებებით.

: საზოგადოება; 21 ივლისი 2021; გადასვლები: 1001

ქუთაისის აეროპორტსა და ბათუმში თურქეთის 5 მოქალაქე დააკავეს

შინაგან საქმეთა სამინისტროს საპატრულო პოლიციის დეპარტამენტის იმერეთის მთავარი სამმართველოს საგამოძიებო განყოფილებისა და საზღვრის მართვისა და კოორდინირების სამმართველოს თანამშრომლებმა ქუთაისის დავით აღმაშენებლის სახელობის საერთაშორისო აეროპორტსა და ბათუმში უცხო ქვეყნის 5 მოქალაქე დააკავეს.

დაკავებულ თურქეთის რესპუბლიკის მოქალაქეებს: 1996 წელს დაბადებულ ჰ.ბ.-ს, 1992 წელს დაბადებულ ბ.ი.-ს, 2002 წელს დაბადებულ ი.ჩ.-სა და 1985 წელს დაბადებულ ჩ.ჩ.-ს ბრალად ედებათ საქართველოს სახელმწიფო საზღვრის უკანონოდ, ჯგუფურად გადაკვეთის მცდელობა და ყალბი დოკუმენტების გამოყენება. ასევე თურქეთის რესპუბლიკის მოქალაქეს, 1964 წელს დაბადებულ ი.შ.-ს კი ბრალი საქართველოს სახელმწიფო საზღვარზე ყალბი საბუთების გამოყენებით ორი ან მეტი მიგრანტის უკანონოდ გადაყვანისთვის წარუდგინეს.

დანაშაულები 3-დან 8 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ თურქეთის ოთხმა მოქალაქემ - ჰ.ბ.-მ, ბ.ი.-მ, ჩ.ჩ.-მ და ი.შ.-მ ქუთაისის საერთაშორისო აეროპორტში, საპასპორტო კონტროლის გავლისას, მესაზღვრე-კონტროლიორს საფრანგეთის რესპუბლიკის მოქალაქის დროებითი ბინადრობის ყალბი მოწმობა წარუდგინა. ბრალდებულები ქუთაისი-მილანის რეისით, მილანის მიმართულებით გაფრენას აპირებდნენ. დადგენილია, რომ აღნიშნული პირების საზღვარზე უკანონოდ გადასვლის ორგანიზებას ასევე თურქეთის რესპუბლიკის მოქალაქე - ი.შ. ახორციელებდა.

პოლიციამ ბრალდებულების მიერ საპასპორტო კონტროლის დროს წარდგენილი ყალბი დოკუმენტები ნივთმტკიცებად ამოიღო.

გამოძიება მიმდინარეობს საქართველოს სისხლის სამართლის კოდექსის 19-344-ე მუხლის მე-2 ნაწილის „ა“ ქვეპუნქტით, 362-ე მუხლის პირველი ნაწილით, 344-ე პრიმა მუხლის მე-2 ნაწილის „ბ“ და „ე“ ქვეპუნქტებით, რაც საქართველოს სახელმწიფო საზღვრის უკანონოდ, ჯგუფურად გადაკვეთის მცდელობას, ყალბი დოკუმენტების გამოყენებას, ასევე, საქართველოს სახელმწიფო საზღვარზე ყალბი საბუთების გამოყენებით ორი ან მეტი მიგრანტის უკანონოდ გადაყვანას გულისხმობს.

დღის სიახლეები

საზოგადოება

Search