საზოგადოება

: საზოგადოება; 02 აპრილი 2022; გადასვლები: 1311

ბაღდათში საოჯახო ღვინის მარნებთან მისასვლელი გზების რეაბილიტაცია მიმდინარეობს

საპილოტე რეგიონების ინტეგრირებული განვითარების პროგრამის ფარგლებში ბაღდათში საოჯახო ღვინის მარნებთან მისასვლელი გზების რეაბილიტაცია მიმდინარეობს.

პროექტი ადგლობრივი ბიზნეს განვითარების ხელშემწყობი ინფრასტრუქტურის მოწყობას გულისხმობს, რომლის ფარგლებშიც 2022 წლის ბოლომდე მუნიციპალიტეტის 7 ტერიტორიულ ერთეულში 14 საოჯახო ღვინის მარანთან მისასვლელი საუბნო გზების რეაბილიტაცია, გარე განათებების და საპარკინგე ადგილების მოწყობა განხორციელდება.

სოფელ წითელხევში ნინოს მარანთან და გაბრიჩიძის მარანთან მისასვლელი გზების მიმდინარე სამუშაოებს ბაღდათის მუნიციპალიტეტის მერი კახა ენუქიძე, პირველ მოადგილე დავით სილაგაძესთან და მერიის ინფრასტრუქტურის სამსახურის უფროს კახა მსხვილიძესთან ერთად გაეცნო.

აღნიშნულ ობიექტებზე მიწის მოწყობითი სამუშაოები განხორციელდა, ასევე მოეწყო ღვარსადენები.

ამ ეტაპზე კი რკინა- ბეტონის საფარი იგება .

საგზაო ინფრასტრუქტურული სამუშაოები მიმდინარეობს სოფელ ობჩაში რამდენიმე საოჯახო მარნებთან მისასვლელ გზებზე.

: საზოგადოება; 01 აპრილი 2022; გადასვლები: 1148

ქუთაისში განზრახ მკვლელობის ბრალდებით ახალგაზრდა ქალი დააკავეს

შინაგან საქმეთა სამინისტროს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 1995 წელს დაბადებული ს.ყ. თერჯოლის მუნიციპალიტეტში დააკავეს. მას ბრალად განზრახ მკვლელობა ედება.

დანაშაული 7-დან 15 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა ქალმა, მიმდინარე წლის 31 მარტს, ქუთაისში, მოსწავლე-ახალგაზრდობის პარკში, კონფლიქტის შედეგად წარმოქმნილი ურთიერთშელაპარაკებისას, მეგობარ მამაკაცს - 1997 წელს დაბადებულ ტ.კ.-ს ცივი იარაღის გამოყენებით კისრის არეში ჭრილობა მიაყენა და შემთხვევის ადგილიდან მიიმალა. დაჭრილი საავადმყოფოში მიყვანის შემდეგ გარდაიცვალა.

სამართალდამცველებმა ს.ყ. მომხდარიდან რამდენიმე საათში დააკავეს. პოლიციამ დანაშაულის ჩადენის იარაღი - დანა ნივთმტკიცების სახით ამოიღო.

განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს.

: საზოგადოება; 01 აპრილი 2022; გადასვლები: 1493

ქუთაისში იდეათონი იწყება

იდეების კონკურსი, ქუთაისის მერიისა და პარტნიორი ორგანიზაციების მხარდაჭერით განხორციელდება. პროექტის პრეზენტაცია დღეს, აკაკი წერეთლის სახელმწიფო უნივერსიტეტში გაიმართა, სადაც კონკურსის დეტალები და პირობები ახალგაზრდებს გააცნეს.

პროექტის მიზანია, ახალგაზრდებმა საკუთარი შემოქმედებითი აზროვნების დახმარებით, მოიფიქრონ საინტერესო იდეები, იმუშაონ მათ დახვეწაზე და შედეგად, იზრუნონ ქუთაისის, როგორც შემოქმედებითი სივრცის, განვითარებაზე.

საბოლოო ეტაპზე შეირჩევა 6 იდეა, რომლებზეც მონაწილეები 3 კაციან გუნდებად იმუშავებენ. გამარჯვებულ გუნდს ფულადი პრიზები გადაეცემათ.

ღონისძიებას საკრებულოს კულტურის, სპორტის, განათლების და ახალგაზრდობის კომისიის თავმჯდომარე, ბექა ქებულაძე და მერიის ადმინისტრაციული სამსახურის უფროსი პეტრე ადამაძე დასწრნენ.

: საზოგადოება; 01 აპრილი 2022; გადასვლები: 1416

ქუთაისის მერიაში ახალგაზრდული ინიციატივების მხარდამჭერი პროგრამა 2022-ის გამარჯვებული პროექტების ავტორებთან შეხვედრა გაიმართა

ღონისძიებას ქუთაისის მერი იოსებ ხახალეიშვილი, მაჟორიტარი დეპუტატი ზაზა ლომინაძე, საკრებულოს თავმჯდომარე ირაკლი შენგელია და ადგილობრივი თვითმმართველობის წარმომადგენლები ესწრებოდნენ.

ახალგაზრდული ინიციატივების პროგრამის მიზანია ახალგაზრდობის სფეროში ინიციატივების წახალისება, ახალგაზრდების პოტენციალის რეალიზებისა და მათი უნარების განვითარების ხელშეწყობა, ასევე საზოგადოებრივ და კულტურულ ცხოვრებაში მათი აქტიური ჩართვა.

“ახალგაზრდული ინიციატივების მხარდამჭერი პროგრამის ფარგლებში უკვე ათეულობით პროექტი იქნა ქუთაისის მერიის მიერ დაფინასებული. უამრავი ახალი იდეა იქცა რეალობად. ეს იდეები გამოადგება ჩვენს ქალაქს, ჩვენს ახალგაზრდებს. დღეს გამარჯვებული პროექტების ავტორებს შევხვდით. პროექტების ხარისხი და მრავალფეროვნება მიგვანიშნებს იმაზე, რომ დიდია ამ პროგრამით დაინტერესება. ჩვენ სამომავლოდ ვგეგმავთ გავზარდოთ როგორც დაფინასება, ასევე პროგრამის მასშტაბები, რომ რაც შეიძლება მეტი ახალგაზრდა ჩაერთოს და გამოადგეს ჩვენს ქალაქს“- განაცხადა იოსებ ხახალეიშვილმა.

2022 წლის პროგრამაში გამარჯვებული პროექტები.

1. “ ახალგაზრდა მეწარმე - როგორც ქვეყნის მომავალი” („აი ქუთაისი“

ანა ლიპარიშვილი);

2. Airsoft Space (გიორგი ოკრიბელაშვილი);

3. „მეოცნებე ნიამორები“ ( თამაზ ცხადაძე);

4. „ახალგაზრდა ელჩები ქუთაისის განვითარებისთვის“ (ა(ა)იპ სამოქალაქო ინიციატივების მხარდაჭერის ცენტრი, თეონა ფურცხვანიძე);

5. „ქუთაისის ახალგაზრდული მრჩეველთა საბჭო (სამეცნიერო-ინტელექტუალური კლუბი „თაობათა დიალოგი“ – RICDOG, ლანა თოთაძე);

6. langua.edu.ge (მედეა ალფაიძე);

7. ინფო ქუთ*აისი ( მედეა ტაბატაძე);

8. ბოჩა - სპორტულ-საგანმანათლებლო კლუბი (ააიპ ახალგაზრდული ჰორიზონტი, მინდია თავხელიძე);

9. „ოფროუდ სპრინტი“ (სსიპ ქუთაისის ოფროუდ ფედერაცია, ნიკოლოზ გუჩუა );

10. „მწვანეყვავილას საზოგადო მოღვაწეთა პანთეონის ბინადართა სავანე“ ( ნინო ნებიერიძე).

: საზოგადოება; 31 მარტი 2022; გადასვლები: 1191

სოფელ ითხვისში არსებულ სიტუაციას გეოლოგები სწავლობენ

ჭიათურის მუნიციპალიტეტის სოფელ ითხვისში საკითხის შესწავლის მიზნით გარემოს ეროვნული სააგენტოს გეოლოგები მუშაობენ. პრემიერის დავალებით ითხვისში იმყოფებოდა საქართველოს მთავრობის რეგიონებთან ურთიერთობის დეპარტამენტის უფროსი ლერი ბარნაბიშვილი, იმერეთში სახელმწიფო რწმუნებულ ზვიად შალამბერიძესთან და ჭიათურის მერთან გივი მოდებაძესთან ერთად. ხელისუფლების წარმომადგენლები ადგილობრივ მოსახლეობას შეხვდნენ და დაზიანებული სახლები პირადად დაათვალიერეს.

ლერი ბარნაბიშვილის განცხადებით ოჯახები, რომელთა საცხოვრებელი სახლებიც დაზიანებულია დროებით ალტერნატიულ საცხოვრებლებში იცხოვრებენ, ხარჯებს ჭიათურის მერია გაიღებს. რაც შეეხება გამომწვევ მიზეზებს რეგიონებთან ურთიერთობის დეპარტამენტის უფროსის განცხადებით, გეოლოგთა ჯგუფი ყველა დაზიანებულ სახლში არსებული სიტუაციის დეტალურ აღწერას აწარმოებს და შემოწმების საფუძველზე უახლოეს პერიოდში შესაბამის დასკვნას დადებს.

“პრემიერის დავალებით კომუნიკაცია მოხდა სოფლის და ეკონომიკის სამინისტროებთან, ორივე უწყების ექსპერტები სწავლობენ სიტუაციას, მოხდება იმ სახლების შესწავლა, რომელიც დაზიანებულია, პარალელურად კი მოხდება ადგილობრივების უსაფრთხო ტერიტორიაზე გადაყვანა,“-განაცხადა ლერი ბარნაბიშვილმა.

ჭიათურის მერიამ სპეციალური კომისია შექმნა, რომელიც სოფელში მოსახლეობის ქონებრივ მდგომარეობას სწავლობს. ამ დრისთვის 17 საცხოვრებელი სახლი არის დაზიანებული.