საქართველოს პრემიერ-მინისტრის ინიციატივით რეგიონებში ჩასატარებელი ღონისძიებების ფარგლებში, საჩხერეში საახალწლო აქტივობები მთელი დღის განმავლობაში მიმდინარეობდა. ღონისძიების ფარგლებში მუსიკალური ნომრები წარმოადგინა ბენდმა ,,გუფილენდი". ასევე, საახალწლო კონცერტში მონაწილეობდა გელა გნოლიძის ბენდი.
დღევანდელ ღონისძიებაზე საჩხერის საპატიო მოქალაქეებიც აირჩიეს. ასევე სხვადასხვა ნომინაციაში დასახელდნენ საუკეთესო პედაგოგები, ექიმები, სპორტსმენები, და სხვა სფეროს წარმომადგენლები.
იმერეთში სახელმწიფო რწმუნებულმა, ზვიად შალამბერიძემ მოქალაქეებს დამდეგი ახალი წელი მიულოცა და წარმატებები უსურვა.
,, გრძელდება იმერეთის 12-ვე მუნიციპალიტეტში საახალწლო ღონისძიებები. დღეს საჩხერლებს ვულოცავთ დამდეგ ახალ წელს ამ საინტერესო კონცერტით. ბავშვებისთვის და ზოგადად მოქალაქეებისთვის მოეწყო ნამდვილი ზეიმი. ასევე გაიმართა სხვადასხვა პერფომანსი. რეგიონის მასშტაბით ღონისძიებები გაგრძელდება არა მხოლოდ 31 დეკემბრამდე არამედ შემდეგშიც" - ზვიად შალამბერიძე.
რეგიონში ჩასატარებელი ღონისძიებების ფარგლებში საჩხერეში მთელი დღის განმავლობაში რკინიგზის მიმდებარე ტერიტორიაზე სპეციალურ ჯიხურებში მოეწყო საშობაო ბაზრობები, გამოფენა-გაყიდვები, საბავშვო გასართობი სივრცეები. ტერიტორიაზე განთავსდა ხის საახალწლო სახლები, ფოტო გადასაღები სტენდები და ინსტალაციები. მუნიციპალიტეტში მცხოვრებ პატარებს თოვლის ბაბუა ტკბილეულსა და საჩუქრებს გადასცემდა. გარდა ამისა სანტას, ანიმატორებისა და ელფების მონაწილეობით მოეწყო საზეიმო მსვლელობა.
ღონისძიებები კოვიდ რეგულაციების დაცვით გაიმართა.
საჩხერეში საახალწლო ღონისძიებები ფოიერვერკით დასრულდა.
დღეს ქუთაისის მელიტონ ბალანჩივაძის სახელობის ოპერისა და ბალეტის პროფესიული სახელმწიფო თეატრს 52 წელი შეუსრულდა . თეატრის ფეისბუქ გვერდზე მისალოცი ტექსტი გამოქვეყნდა.
"ქუთაისის ოპერის თეატრის დაარსება, რაშიც ლომის წვლილი მიუძღვოდა ცნობილ მუსიკოსსა და მოღვაწეს, თეატრის პირველ ხელმძღვანელს თეიმურაზ კობახიძეს, იმთავითვე ღირსშესანიშნავი მოვლენა, მრავლისმთქმელი ფაქტი იყო ქვეყნის კულტურული ცხოვრებისთვის.
ამ დროის მანძილზე ქუთაისის ოპერის თეატრმა ღირსეული ადგილი დაიმკვიდრა ჩვენი ქვეყნის კულტურულ ცხოვრებაში.
არსებობის ორმოცდათორმეტი წლის მანძილზე ქუთაისის ოპერისა და ბალეტის თეატრმა ათეულობით საოპერო და საბალეტო დადგმა განახორციელა.
და მაინც, ეს თეატრი განსაკუთრებულ ერთგულებას იჩენდა და იჩენს ქართველი კომპოზიტორების ნაღვაწის მიმართ, რაც დაარსებისთანავე გაცხადდა და ამ კურსისთვის არასოდეს უღალატია, რაც ესოდენ დასაფასებელია.
შარშანაც საიუბილეოდ დაგეგმილი გვქონდა გამოჩენილი ქართველი კომპოზიტორის ბიძინა კვერნაძის ოპერის „იყო მერვესა წელსა“ პრემიერა, რითაც ტრადიციულად უნდა აღგვენიშნა თეატრის საზეიმო დღე, მაგრამ პანდემიამ ამ ჩანაფიქრსაც დაღი დაასვა.
სამწუხაროდ, იგივე მიზეზით ვერც წლევანდელ დაბადების დღეს აღვნიშნავთ, მაგრამ ვიმედოვნებთ, რომ გაზაფხულზე აუცილებლად მოგიწვევთ ამ შესანიშნავი თხზულების პრემიერაზე.
ვფიქრობთ, ქუთაისის ოპერისა და ბალეტის სახელმწიფო თეატრი მომავალშიც უთუოდ ღირებულ კვალს გაავლებს ქალაქის კულტურული აღორძინებისა და განვითარების საქმეში და კიდევ არაერთხელ იტყვის თავის ღირსეულ სიტყვას."-წერია თეატრის ფეისბუქგვერზე.