2022 წლის III კვარტალში საქართველოს ტერიტორიიდან დაფიქსირდა საქართველოს რეზიდენტი მოგზაურების 693.4 ათასი გასვლა საზღვარგარეთ, რაც წინა წლის შესაბამისი პერიოდის მაჩვენებელზე 3.9-ჯერ მეტია, - ამის შესახებ ინფორმაციას საქართველოს სტატისტიკის ეროვნული სამსახური ავრცელებს.
მათივე ინფორმაციით, გასვლების უდიდესი ნაწილი, 46.3 პროცენტი, 31-50 წლის მოგზაურების მიერ განხორციელდა.
„აღნიშნული რაოდენობიდან საქართველოს რეზიდენტი ვიზიტორების მიერ საზღვარგარეთ განხორციელებული ვიზიტების რაოდენობამ 531.8 ათასი შეადგინა, რაც 3.3-ჯერ მეტია 2021 წლის შესაბამისი პერიოდის მაჩვენებელზე.
საქართველოს რეზიდენტი ვიზიტორების მიერ საზღვარგარეთ განხორციელდა 287.7 ათასი ტურისტული ტიპის ვიზიტი, რაც 94.3 პროცენტით მეტია წინა წლის შესაბამისი პერიოდის მაჩვენებელზე.
ვიზიტების უმრავლესობა, 48.9 პროცენტი, განხორციელდა 31-50 წლამდე ასაკობრივ კატეგორიაში შემავალი საქართველოს რეზიდენტი ვიზიტორების მიერ. ქალების მიერ განხორციელებული ვიზიტების რაოდენობა მთლიანი ვიზიტების 48.7 პროცენტს შეადგენდა“,- ნათქვამია გავრცელებულ ინფორმაციაში.
„საქსტატის“ ცნობით, 2022 წლის III კვარტალში ყველაზე მეტი ვიზიტი (43.7 პროცენტი) განხორციელდა საყიდლების მიზნით.
„ვიზიტების უმრავლესობა განხორციელდა თურქეთსა და რუსეთის ფედერაციაში, შესაბამისად, 314.5 ათასი და 79.4 ათასი ვიზიტი.
2022 წლის III კვარტალში განხორციელებული ვიზიტებისას გათეული ღამეების საშუალო რაოდენობამ 6.3 ღამე შეადგინა. განხორციელებული ვიზიტების 95.7 პროცენტი წარმოადგენდა განმეორებითი ხასიათის ვიზიტს.
2022 წლის III კვარტალში განხორციელებული ვიზიტებისას გაწეული ხარჯები 539.4 მილიონ ლარს გაუტოლდა. ვიზიტზე საშუალო ხარჯმა 1 014.1 ლარი შეადგინა“,- ნათქვამია „საქსტატის“ მიერ გავრცელებულ ინფორმაციაში.
24 ნოემბერს, 19:00 საათზე,თბილისში,შოთა რუსთაველის ძეგლთან (მეტრო რუსთაველის მიმდებარე ტერიტორიაზე), მეცნიერების, განათლებისა და კულტურის პროფესიული კავშირი გამართავს აქციას - გელათის გადასარჩენად.
"გელათის შენარჩუნება, ეროვნული მნიშვნელობის საკითხია. დღეს, ეს მდიდარი ისტორიული წარსულისა და უმაღლესი ისტორიულ-მხატვრული ღირებულების მსოფლიო კულტურული მემკვიდრეობის ძეგლი უკიდურეს საფრთხეშია, რადგან კედლის მხატვრობის ნაწილს სამუდამო გაქრობა და ისტორიული ღირებულების დაკარგვა ემუქრება.
კულტურის სამინისტროს ახალი ხელმძღვანელობის მხრიდან უხეშად იქნა უკუგდებული ქართველი და უცხოელი მაღალი დონის სპეციელისტებისა და საქართველოს საპატრიარქოს არაერთგზის გაფრთხილება, რომ მათი (სამინისტროს) მხრიდან გადადგმული ნაბიჯები 2020-2021 წლებში გამოვლენილ უმძიმეს მდგომარეობას კიდევ უფრო გაამწვავებდა.
საბოლოოდ, ძეგლს გამოუსწორებელი ზიანი მიადგა. თუმცა, ჯერ კიდევ არსებობს ჩვენი ქვეყნის ყველაზე მნიშვნელოვანი ქრისტიანული ძეგლის გადარჩენის შესაძლებლობა.
ამიტომ მოვუწოდებთ საქართველოს ყველა მოქალაქეს, 24 ნოემბერს, 19:00 საათზე მოვიდეს შოთა რუსთაველის ძეგლთან, გელათის გადასარჩენად.
ჩვენ ვითხოვთ, გელათის სამონასტრო კომპლექსის კონსერვაცია-რესტავრაციის პროცესს დაუყოვნებლივ ჩამოშორდეს მინისტრი თეა წულუკიანი და დადგეს მისი პასუხისმგებლობის საკითხი; დაუყოვნებლივ გასაჯაროვდეს პროცესთან დაკავშირებული სრული დოკუმენტაცია; დაუყოვნებლივ ჩაერთოს პროცესში ყველა მაღალი დონის ქართველი და უცხოელი სპეციალისტი."-აცხადებენ
განათლებისა და კულტურის პროფესიული კავშირში.
