ინფორმაციას "ფლანგვის დეტექტორი" ავრცელებს.
2021 წლის განმავლობაში მერიამ 100%-ით თითქმის ვერცერთი პროგრამა აითვისა და მათ შორის ყველაზე უარესად ინფრასტრუქტურის განვითარების პროგრამა შეასრულა, 10.2 მილიონი დაუხარჯავი ლარით.
ინფრასტრუქტურის გარდა ქუთაისმა ვერ აითვისა ბიუჯეტის შემდეგი მუხლები: დასუფთავება და გარემოს დაცვა - 1,476,500, განათლება - 762,200, კულტურა, ახალგაზრდობა და სპორტი - 1,443,600, ჯანდაცვა და სოცუზრუნველყოფა - 282,500.
სახელმწიფო აუდიტის სამსახურის მიერ მომზადებულ ქუთაისის მუნიციპალიტეტის ჯერ კიდევ 2019-2020 წლების საქმიანობის შესაბამისობის ანგარიშშია ნათქვამი, რომ “მერიამ, ინფრასტრუქტურული პროექტების განსახორციელებლად, წლის ბოლომდე ვერ აითვისა ადგილობრივი ბიუჯეტიდან და საქართველოს მთავრობის განკარგულებით გამოყოფილი თანხები. შესაბამისად, მუნიციპალიტეტმა ვერ მიიღო პროგრამით გათვალისწინებული მოსალოდნელი შედეგები: ძირითადად, ვერ დასრულდა და დაგვიანდა საგზაო ინფრასტრუქტურის, მრავალბინიანი საცხოვრებელი კორპუსების ფასადებისა და ეზოების, საბავშვო ბაღების, წყალმომარაგებისა და სანიაღვრე სისტემების, ტროტუარების, სხვა ობიექტების მშენებლობისა და რეაბილიტაციის სამუშაოები.”
თუმცა პარალელურად მერიამ კარგად აითვისა შრომის ანაზღაურებისთვის გამოყოფილი თანხები. 2019-2020 წლებში ქუთაისის მუნიციპალიტეტში დასაქმებულმა საჯარო მოსამსახურეებმა ხელფასის გარდა მილიონ ლარზე მეტი მიიღეს: აქედან 331 400 ათასი ლარი დანამატის სახით, 432 000 ათასი ლარი, როგორც ჯილდო, 358 200 ათასი ლარი კი, როგორც სოციალური დახმარება.
“ფლანგვის დეტექტორმა” შეისწავლა 2021 წლის ბიუჯეტის შესრულების ანგარიში და დაადგინა, რომ 2019 და 2020 წლების მსგავსად მერიამ ბიუჯეტი სრულად ვერც 2021 წელს აითვისა.
2021 წელს გეგმის მიხედვით ქუთაისის მერიას 95,070,200 ლარი უნდა დაეხარჯა, თუმცა მხოლოდ 79,717,400 ლარი დახარჯა. შესაბამისად მერიამ წლის განმავლობაში 15,352,800 ლარის დახარჯვა ვერ შეძლო.
