ბაღდათის მუნიციპალიტეტის სახალხო თეატრმა საერთაშორისო ფესტივალ "თეატრალური იმერეთი 2022"- ის ფარგლებში სპექტაკლი წარადგინა.
ნიკო ლორთქიფანიძის და მიხეილ ჯავახიშვილის ნაწარმოებების მოტივებზე „სოფლის აშიკი“ ზაზა კიკნაველიძის რეჟისორობით, რ.ლაღიძის კულტურის სახლის სცენაზე დაიდგა.
საფესტივალო ჩვენებას ჟიურის წევრებთან და თეატრალური საზოგადოების წარმომადგენლებთან ერთად, იმერეთის გუბერნატორის მოადგილე ლევან კიკნაველიძე, ბაღდათის მუნიციპალუტეტის მერი კახა ენუქიძე, მოადგილე მერაბ ზირაქაძე, საკრებულოს თავმჯდომარე ნოდარ გიორგიძე, საკრებულოს დეპუტატები, მერიის სამსხურების ხელმძღვანელები, ა.ა.ი.პ. ხელოვნებისა და კულტურის განვითარების ცენტრის წარმომადგენლები დაესწრნენ.
საერთაშორისო ️ფესტივალის დახურვა 1 ივლისს გაიმართება, სადაც კომპეტენტური ჟიური სხვადასხვა ნომინაციაში გამარჯვებულ სპექტაკლებს და მსახიობებს გამოავლენს.
ქუთაისის, ლადო მესხიშვილის სახელობის პროფესიულ თეატრში ფესტივალის ფარგლებში პირველი წარმოდგენა ზესტაფონის, უშანგი ჩხეიძის სახელობის თეატრმა გამართა.
,,ვულოცავ იმერეთს მე-13 თეატრალური ფესტივალის დაწყებას, ფესტივალის რომელიც დიდიხანია გასცდა, როგორც იმერეთს ასევე, საქართველოს ფარგლებს და შეიძინა საერთაშორისო მასშტაბები. წელს ფესტივალი განსხვავებული ფორმატით ტარდება. თეატრები სპექტაკლებს თავიანთ მუნიციპალიტეტებში წარმოადგენენ, ამ ნაბიჯით ვცდილობთ, კიდევ უფრო გავაცოცხლოთ თეატრალური ცხოვრება მუნიციპალიტეტებში“ - აღნიშნა იმერეთში სახელმწიფო რწმუნებულმა ზვიად შალამბერიძემ.
„თეატრალური იმერეთი 2022“ დღეს იღებს სტარტს და 2 კვირის მანძილზე ნამდვილ დღესასწაულს აჩუქებს თეატრის მოყვარულებს. საუკეთესო ტრადიციად ქცეული ფესტივალი წელსაც მთელ იმერეთს მოიცავს, მონაწილეობას მიიღებს თეატრი ყაზახეთიდანაც.
ქუთაისის მერია ამ ფესტივალის ერთ-ერთი დამფუძნებელი და მუდმივი მხარდამჭერია. გიწვევთ ყველას, დაესწარით სპექტაკლებს და იგრძენით თავი ფესტივალის მონაწილეებად! „- განაცხადა ქუთაისის მერმა იოსებ ხახალეიშვილმა.
წელს ფესტივალზე რეგიონის თეატრალური დასების მიერ წარმოდგენილი განსხვავებული ჟანრისა და შინაარსის სპექტაკლების გარდა, მაყურებელი ნახავს ყაზახეთის თეატრისა და თბილისის ახალგაზრდული თეატრის წარმოდგენებს.
ფესტივალის ფარგლებში მოქმედი პროფესიული თუ სახალხო თეატრების მიერ წარმოდგენილი იქნება 17 სპექტაკლი. მაყურებელს საშუალება ეძლევა 16 ივნისიდან 1 ივლისის ჩათვლით მისთვის სასურველ წარმოდგენას დაესწროს.
სპექტაკლებს შეაფასებს პროფესიული ჟიური და ფესტივალის ბოლოს სხვადასხვა ნომინაციებში გამარჯვებულები გამოვლინდებიან. ფესტივალის დახურვის ღონისძიება ქუთაისის, ლადო მესხიშვილის სახელობის პროფესიულ თეატრში 1 ივლისს გაიმართება.
პროექტს უკვე მეცამეტე წელია იმერეთში სახელმწიფო რწმუნებულის ადმინისტრაცია და იმერეთის თეატრალური საზოგადოება ერთობლივად ახორციელებს. ასევე, ფესტივალის მხარდაჭერია რეგიონის 12-ვე მუნიციპალიტეტი და საქართველოს კულტურის, სპორტისა და ახალგაზრდობის სამინისტრო. ,,თეატრალური იმერეთი“ ყოველწლიურად უფრო მასშტაბურია და რეგიონის თეატრების გარდა სხვა დასებიც მონაწილეობენ. ფესტივალზე დასწრება თავისუფალია.
