,,სამწუხაროდ ქუთაისის მერიაში აღებ - მიცემობა და კორუფცია დიდი ხანია გავრცელებულია,,-ასე გამოეხმაუურა საკრებულოს ფრაქცია ,,ერთიანი ნაციონალური მოძრაობის,, თავმჯდომარე გიგა შუშანია, ,,საერთაშორისო გამჭვირვალობა საქართველოს,, მიერ გავრცელებულ ინფორმაციას, რომლის მიხედვითაც ქუთაისის მერის მოადგილის ბიზნესპარტნიორის კომპანია ადგილობრივ ტენდერებს იგებს.
,,ყველა შესყიდვის და ყველა პროექტის დროს ხდება არათანაბარი შერჩევა კომპანიების, მაგალითად ხდება თვითნებურად ვადების გაზრდა,თანხების დამატება, ასე რომ ტენდერის გამოცხადების დროს არათანაბარი პირობებია და კომპანიებს, რომლებიც არ არიან დაახლოებული ,,ქართულ ოცნებასთან,, არ აქვთ საშუალება გაიგონ რეალურად რა ვადებში უნდა გააკეთონ სამუშაოები.სწორედ ამ კორუფციის გამო თითქმის ყველა პროექტი არის უხარისხოდ შესრულებული, სწორედ ამის გამოა ქუთაისი გადათხრილი ქუჩების ქალაქი და ერთადერთი, ვინც იმარჯვებს ამ ყველაფერში,ეს არის ,,ქართული ოცნების,, ახლობლების კომპანიები, კომპანიები, რომლებიც ფულს წირავენ და შემდგომ ავსებენ,, ქართული ოცნების,, საარჩევნო ყულაბას.
ეს კომპანია არა მარტო, ქუთაისში, არამედ თბილისშიც იგებდა ძელსკამების ტენდერებს,,-განაცხადა გიგა შუშანიამ.
ქუთაისის მერის მოადგილის, იუზა უგულავას ბიზნესპარტნიორის კომპანია ქუთაისის მუნიციპალიტეტის ტენდერებს იგებს. აღსანიშნავია, რომ თავად იუზა უგულავა 2019 წლიდან ხელმძღვანელობს სატენდერო კომისიას.
სწორედ 2019-2021 წლებში გაიმარჯვა ქუთაისის მერიის მიერ აუქციონის გარეშე გამოცხადებულ 5 ელექტრონულ ტენდერში შპს,,ლიკო 1”-მა. ამ კომპანიის 100% წილის მფლობელი და დირექტორია ზაალ ხიდაშელი, რომელიც ქუთაისის მერის მოადგილის, იუზა უგულავას ბიზნესპარტნიორია. იუზა უგულავა და ზაალ ხიდაშელი ფლობენ 50-50%-იან წილებს შპს “იუკოში”, რომლის დირექტორიც ასევე ხიდაშელია.
ხელშეკრულებების ჯამურმა ღირებულებამ 294,545 ლარი შეადგინა. 2019 წელს 114,220 ლარის ტენდერი მოიგო, 2020 წელს - 16,000 ლარის, ხოლო 2021 წლის 5 მარტს კომპანიასთან 164,325 ლარზე გაფორმდა ხელშეკრულება. ხუთი ტენდერიდან ოთხ შემთხვევაში შპს “ლიკო-1”-ს კონკურენტი არ ჰყოლია. კომპანიას ქუთაისის სკვერებისთვის ძელსკამები უნდა დაემზადებინა და დაემონტაჟებინა.
მოქმედი კანონმდებლობის თანახმად,იუზა უგულავა ვალდებული იყო, განეცხადებინა ინტერესთა კონფლიქტის არსებობის შესახებ (რადგანაც ტენდერში მონაწილე კომპანიის წილის მფლობელი და დირექტორი მისი ბიზნესპარტნიორია) და შეეწყვიტა აღნიშნული შესყიდვების განხილვის პროცესში მონაწილეობა.
„საერთაშორისო გამჭვირვალობა - საქართველოს” შეფასებით, ტენდერებში შპს “ლიკო-1”-ის გამარჯვება და ზემოთ მოყვანილი გარემოებები წარმოშობს ეჭვს პროცესის გამჭვირვალობასთან და შემსყიდველი ორგანიზაციების მიუკერძოებელ მიდგომასთან დაკავშირებით. მოვუწოდებთ სახელმწიფო უსაფრთხოების სამსახურის ანტიკორუფციულ სააგენტოს, შეისწავლონ ქუთაისის მერიის ტენდერებში შპს “ლიკო-1”-ის გამარჯვების კანონიერების საკითხი.