აღმაშენებლის ქუჩის რეაბილიტაციის პროექტი, იმერეთში სახელმწიფო რწმუნებულმა, ზვიად შალამბერიძემ ადგილობრივი თვითმმართველობის, მუნიციპალური განვითარების ფონდისა და გაერთიანებული წყალმომარაგების კომპანიის წარმომადგენლებთან ერთად ადგილზე დაათვალიერა და მიმდინარე პროცესს გაეცნო. ამ ეტაპზე აღნიშნულ მონაკვეთზე მიწისქვეშა კომუნიკაციების მოწყობის სამუშაოები მიმდინარეობს.
მასშტაბური ინფრასტრუქტურული პროექტი, რომელსაც საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი ახორციელებს, სრულიად განახლებული, ცენტრალური ქუჩის მოწყობას ითვალისწინებს, როგორც მიწისქვეშა, ასევე მიწისზედა კომუნიკაციების გათვალისწინებით. აღნიშნულ ქუჩაზე დაიგება საავტომობილო გზის მონაკვეთი, დამონტაჟდება გარე განათებები, მოეწყობა ტროტუარები და ბორდიურები, მოწესრიგდება რკინიგზის მიმდებარედ არსებული კედლის ფასადი.
აღმაშენებლის ქუჩის სრული რეაბილიტაციის პროექტი მაისის თვეში დასრულდება, რაც გათვალისწინებულია სატენდერო ვალდებულებით.
აღმაშენებლის ქუჩის სრული რეაბილიტაციის პროექტი დროებით შეჩერებული იყო. სამუშაოების მიმდინარეობისას ტექნიკური ხარვეზი წარმოიქმნა, რამაც სამუშაოების გაგრძელებას შეუშალა ხელი. კერძოდ, ერთ - ერთ მონაკვეთზე, მიწისქვეშა გრუნტის წყალი ამოვიდა, ასევე გაჭედილი იყო რკინიგზის ტერიტორიაზე არსებული სანიაღვრე სისტემა, რომელიც არ ატარებდა წყალს. უახლოეს დღეებში მოხდება მისი გაწმენდა სპეციალური ტექნიკით და ასევე მოეწყობა ახალი საკანალიზაციო ქსელი. აღნიშნულის გათვალისწინებით პროექტში ცვლილებები შევიდა, და ამ მიმართულებით დამატებითი სამუშაოები 22 იანვრიდან გაგრძელდება.
პროექტის ღირებულება დაახლოებით 6 მილიონი ლარია. სარეკონსტრუქციო სამუშაოების დასრულების შემდეგ, სრულიად განახლდება ქალაქის ცენტრალური მაგისტრალის ინფრასტრუქტურა, რაც ბოლო ათწლეულების მანძილზე ყველაზე მასშტაბური პროექტი იქნება ქალაქისთვის.
საქართველოს კულტურული მემკვიდრეობის დაცვის სააგენტო ადასტურებს გელათის მონასტრის სახურავის დაზიანების მორიგ ფაქტს. სააგენტოს განცხადებაში წერია, რომ,, ფიზიკური სამუშაოების პროცესში დაშვებული შეცდომების მიზეზით, 18 იანვარს მთავარი ტაძრის დასავლეთი მკლავის სამხრეთ ფერდზე ქარის შედეგად დროებითი გადახურვის ფრაგმენტი აძვრა.,,
მათივე ინფორმაციით, დაზიანებული კონსტრუქციის აღდგენის სამუშაოები დაწყებულია.,, აღდგენილი მყარი გადახურვის სათანადო წესით გამაგრების პარალელურად, სააგენტოს ინსპექტირების ჯგუფის სპეციალისტების ზედამხედველობით გადამოწმდება დროებითი გადახურვების ყველა არეალი. პრევენციული ქმედებებისას შესრულებული სამუშაოების ხარვეზების აღმოფხვრას დღეიდან კომპანია "ბაგინეთი +" განახორციელებს.,,
ინფორმაცია გელათის ტაძრის სახურავის მორიგი დაზიანების შესახებ ორგანიზაცია ,,ევროპა ჩვენი სახლიას ,, წარმომადგენელმა გაავრცელა. თორნიკე ბარათაშვილი გელათის მონასტრის უხარისხო გადახურვის საკითხს და დაშვებულ შეცდომებს უკვე დიდი ხანია აპროტესტებს.
