იმერეთში სახელმწიფო რწმუნებული ზვიად შალამბერიძე სლოვაკეთის ელჩს საქართველოში, მატუშ ბუშოვსკის შეხვდა. სლოვაკეთის ელჩი იმერეთში პირველად იმყოფება და მან შეხვედრაზე რეგიონის შესახებ დეტალური ინფორმაცია მიიღო.
გაცნობითი სახის შეხვედრაზე მხარის გუბერნატორი ელჩს რეგიონის ტურისტულ და ეკონომიკურ პოტენციალზე ესაუბრა, ასევე ყურადღება გაამახვილა საინვესტიციო გარემოსა და ევროკავშირის მიერ დაფინანსებულ პროექტებზე და აღებულ ვალდებულებებზე.
,,საქართველოსთვის ევროკავშირის წევრობის კანდიდატის სტატუსის მინიჭება ძალიან მნიშვნელოვანია და შესაბამისად ჩვენ მზად ვართ უფრო მჭიდროდ ვითანამშრომლოთ პარტნიორ ქვეყნებთან და მათთან ერთად ჩავერთოთ სხვადასხვა საერთაშორისო პროექტში.
ქვეყნის განვითარებისთვის და ევროკავშირის წევრობის კანდიდატის სტატუსის მისაღებად ქვეყანამ არაერთი წარმატებული ნაბიჯი გადადგა, პროცესი გრძელდება და საქართველოს მთავრობა მოსახლეობასთან ერთად ყველაფერს გააკეთებს სრულფასოვანი წევრის სტატუსი მიიღოს.
იმერეთი თერმული წყლების სიმრავლითაც გამოირჩევა და მიმდინარე წლის გაზაფხულზე ვუმასპინძლებთ ევროპის ისტორიული თერმული ქალაქების ასოციაციის გენერალურ ასამბლეას, რომელიც საუკეთესო საშუალება ინვესტიციების მოზიდვის.
ასევე აღსანიშნავია, რომ იმერეთი ტურისტებისთვის ერთ-ერთი მიმზიდველი რეგიონია. ამის ნათელი მაგალითია ქუთაისის საერთაშორისო აეროპორტში მგზავრთა გაზრდილი ნაკადი. კონკრეტულად 2023 წლის იანვარში აეროპორტი 151 939 მგზავრსა და 486 რეისს მოემსახურა. ამ მიმართულებით სამუშაოები გრძელდება და იგეგმება აეროპორტის გაფართოება, რომლის მთლიანი საინვესტიციო ბიუჯეტი 47 მილიონი ლარია. პროექტი ითვალისწინებს ახალი ასაფრენ/დასაფრენი ზოლის მოწყობას, რომელიც გათვლილი იქნება სატვირთო ხომალდებზე”-ზვიად შალამბერიძე.
მხარეებმა შეხვედრაზე მომავალში ურთიერთთანამშრომლობის სურვილი გამოთქვეს და განიხილეს ერთობლივი პროექტების განხორციელების შესაძლებლობები.
პრემიერ-მინისტრმა, ირაკლი კობახიძემ მთავრობის დღევანდელ სხდომაზე ოკუპაციაზე ისაუბრა და აღნიშნა, რომ უკრაინაში ომი შეგვახსენებს, თუ რამდენად დიდია მშვიდობის ფასი.
„გავიხსენეთ საბჭოთა ოკუპაციის წინააღმდეგ გმირულად მებრძოლი და დაღუპული იუნკრები, ახალგაზრდა ბიჭები და გოგოები, რომლებმაც დაგვიტოვეს პატრიოტიზმი, სამშობლოს სიყვარულისა და სამშობლოს თავგანწირვის განსაკუთრებული მაგალითი. პატივს მივაგებ მათ ხსოვნას.
24 თებერვალს 2 წელი გავიდა უკრაინაში ომის დაწყებიდან. კიდევ ერთხელ ვუცხადებ სოლიდარობას ჩვენს მეგობარ უკრაინელ ხალხს, რომელიც რუსეთის სამხედრო აგრესიისა და უდიდესი უსამართლობის მსხვერპლად იქცა, დაიღუპა ძალიან ბევრი უკრაინელი სამხედრო და სამოქალაქო პირი, მათ შორის ასობით ბავშვი, დევნილად და ლტოლვილად იქცა 10 მილიონზე მეტი უკრაინელი, რომელთა უდიდესი უმრავლესობა ქალები და ბავშვები არიან. განადგურდა უკრაინის ეკონომიკა, ინფრასტრუქტურა, დღეს ოკუპაციის ქვეშაა 2.5-ჯერ მეტი ტერიტორია, ვიდრე რუსეთს ომის დაწყებამდე ჰქონდა ოკუპირებული.
ეს ყველაფერი შეგვახსენებს, თუ რამდენად დიდია მშვიდობის ფასი. ამ 2 წლის მანძილზე ჩვენც გადავიტანეთ ერთგვარი ომი, ეს ომი იყო რადიკალური ოპოზიციის და მისი მეგობრების წინააღმდეგ ქვეყანაში მშვიდობის შენარჩუნებისთვის. მადლობა ღმერთს, ამ ურთულეს ომში გაიმარჯვა სახელმწიფომ, გაიმარჯვა მშვიდობამ და ჩვენს ქვეყანას დღეს აქვს მშვიდობა, რომელიც ქმნის საფუძველს ჩვენი ქვეყნის შემდგომი წინსვლისთვის და განვითარებისთვის. ჩვენს მეგობარ უკრაინას კიდევ ერთხელ ვუსურვებ მშვიდობას, სუვერენიტეტს და ტერიტორიულ მთლიანობას“,-განაცხადა კობახიძემ.
პრემიერ-მინისტრის თქმით, საბჭოთა ოკუპაციის დღე კიდევ ე ერთხელ შეგვახსენებს, თუ რამდენად დიდია ქვეყნის დამოუკიდებლობის ფასი.
„25 თებერვალს აღინიშნა საბჭოთა ოკუპაციის დღე. ეს დღე კიდევ ერთხელ შეგვახსენებს, თუ რამდენად დიდია ქვეყნის დამოუკიდებლობის ფასი და რამდენად დიდი ბედნიერება ის, რომ საქართველო დღეს არის დამოუკიდებელი და სუვერენული სახელმწიფო, რომელიც დღეს მყარად იცავს საკუთარ ეროვნულ ინტერესებს. საუკუნის წინ რუსულ არმიას საქართველოში შემოუძღვნენ ეთნიკურად ქართველი, მაგრამ უსამშობლო ადამიანები, ბოლშევიკები, რომელთათვისაც უცხო იყო სამშობლოს ცნება. ეს ყველაფერი შეგვახსენებს იმას, თუ რამდენად დიდი სიფრთხილე გვმართებს ასეთი ადამიანების მიმართ, რომელთათვისაც ეროვნული თუ სხვაგვარი იდენტობის გარეშე ცხოვრება ცხოვრების უმთავრეს პრინციპად არის ქცეული. საქართველოს დამოუკიდებლობის დაცვა არის თითოეული ჩვენგანის პასუხისმგებლობა“,-განაცხადა კობახიძემ.
