ფესტივალის 14-ე სეზონის გახსნის ცერემონია ქუთაისის, ლადო მესხიშვილის სახელობის პროფესიულ დრამატულ თეატრში გაიმართა.
თეატრში შეკრებილ საზოგადოებას იმერეთში სახელმწიფო რწმუნებულმა ზვიად შალამბერიძემ მიმართა და ფესტივალს წარმატებული სეზონი უსურვა.
ფესტივალის ფარგლებში წარმოდგენილი იყო რეჟისორი ნინო მაღლაკელიძის სპექტაკლი ,,ტესტოსტერონი“.
საერთაშორისო ფესტივალის ეგიდით მოქმედი პროფესიული თუ სახალხო თეატრების მიერ წარმოდგენილი იქნება 15 სპექტაკლი, მათ შორის ქართველ მაყურებელს საკუთარ შემოქმედებას გააცნობენ იტალიის, ქალაქ ნაპოლის ექსპერიმენტული და აზერბაიჯანის სახელმწიფო თეატრები.
,,თეატრალური იმერეთი“ ყოველწლიურად უფრო მასშტაბურია და რეგიონის თეატრების გარდა სხვა დასებიც მონაწილეობენ. წელს ფესტივალზე რეგიონის თეატრალური დასების მიერ წარმოდგენილი განსხვავებული ჟანრისა და შინაარსის სპექტაკლებს შეაფასებს პროფესიული ჟიური და ,,თეატრალური იმერეთი 2023“ -ის დასკვნით ღონისძიებაზე სხვადასხვა ნომინაციაში გამარჯვებულები გამოვლინდებიან.
მაყურებელს საშუალება ეძლევა 13 ივნისიდან 30 ივნისის ჩათვლით მისთვის სასურველ წარმოდგენას დაესწროს, ფესტივალის დახურვის ღონისძიება კი ქუთაისის, ლადო მესხიშვილის სახელობის პროფესიულ თეატრში 1 ივლისს გაიმართება.
პროექტს უკვე 14-ე წელია იმერეთში სახელმწიფო რწმუნებულის ადმინისტრაცია და იმერეთის თეატრალური საზოგადოება ერთობლივად ახორციელებს. ასევე, ფესტივალის მხარდაჭერია რეგიონის 12-ვე მინიციპალიტეტი და საქართველოს კულტურის, სპორტისა და ახალგაზრდობის სამინისტრო.
ფესტივალზე დასწრება თავისუფალია.
ქუთაისის სახელმწიფო ისტორიული მუზეუმი ფსიქიკური ჯანმრთელობის ეროვნული ცენტრის ბენეფიციარების ნამუშევრების გამოფენას "ხელოვნება და სული", უმასპინძლებს. გამოფენა 13 ივნისს, 18:00საათზე გაიხსნება.
ფსიქიკური ჯანმრთელობის ეროვნულ ცენტრში წლების მანძილზე წარმატებით ხორციელდება სარეაბილიტაციო ინტერვენციები და დღის აქტივობები. მათ შორის ერთ-ერთი მნიშვნელოვანია სახვითი ხელოვნების თერაპია.
ყველა ის ნახატი, რომელსაც დამთვალიერებელი ამ უნიკალურ გამოფენაზე ნახავს, კლინიკის ბენეფიციარების/პაციენტების მიერ სწორედ არტთერაპიის პროცესშია შექმნილი.
ამ ექსპოზიციის მიზანია,მენტალური დარღვევის მქონე ადამიანების მხარდაჭერა, ფსიქოგანათლების პოპულარიზაცია და ფსიქიკური ჯანმრთელობის სტიგმის დაძლევა .
