18-19 მაისს საქართველოში იქროლებს დასავლეთის მიმართულების ძლიერი ქარი. 18 მაისის დღის ბოლოდან 19 მაისის დილამდე ქვეყნის ტერიტორიის უმეტეს ნაწილზე მოსალოდნელია წვიმა, ზოგან ძლიერი, ელჭექით, აღმოსავლეთ საქართველოში შესაძლებელია სეტყვა. 

მოსალოდნელმა წვიმებმა შესაძლებელია საქართველოს მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა - გააქტიურება გამოიწვიოს (საფრთხის დონე საშუალო).

საქართველოს პროკურატურამ განსაკუთრებით დიდი ოდენობით ნარკოტიკული საშუალების უკანონო შეძენა, შენახვის და გასაღების მცდელობის ფაქტზე უცხო ქვეყნის მოქალაქეს ბრალდება წარუდგინა.

შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა უკანონოდ შეიძინა და ინახავდა ნარკოტიკულ საშუალება „ჰეროინს“, რომლის ნაწილიც გასაღების მიზნით სამტრედიის მუნიციპალიტეტში სხვადასხვა ლოკაციაზე განათავსა. გატარებული ღონისძიებების შედეგად ამოღებულია განსაკუთრებით დიდი ოდენობით ნარკოტიკული საშუალება „ჰეროინი“.

1988 წელს დაბადებული ირანის რესპუბლიკის მოქალაქე ა.ს. ბრალის დამტკიცების შემთხვევაში 20 წლამდე ან უვადო თავისუფლების აღკვეთა მიესჯება.

გამოძიება საქართველოს სისხლის სამართლის კოდექსის 260-ე მუხლის მე-3 და 19-260-ე ტერცია მუხლის მე-6 ნაწილებით მიმდინარეობს.

დღეს ჭიათურელი მაღაროელები მიხაილ სოცკს შეხვდებიან. შეხვედრა საღამოს 18:00 საათზეა ჩანიშნული. 

რუსეთის მოქალაქე სოცკი ხელმძღვანელობს მაღაროებში რეორგანიზაციის პროცესს.

ასევე , დღეს მღვიმევის მაღაროში სამუშაო პროცესი უნდა აღდგეს. გაფიცული მშრომელები ყველას მოუწოდებენ, არ გამოცხადდნენ სამსახურში.

,,დღეს მღვიმევის მაღაროზე ვიყავით. გავესაუბრეთ დასაქმებულებს, ავუხსენით არსებული მდგომარეობა. თუმცა სიმართლე რომ ვთქვათ, ამას ბევრი ახსნა არც სჭირდებოდა — ყველამ ძალიან კარგად იცის, რა ხდება.

განსაკუთრებული ყურადღება გავამახვილეთ დღევანდელი შეხვედრის მნიშვნელობაზე და ყველას ვთხოვეთ, დაელოდონ მის შედეგებს. შეგახსენებთ, რომ დღეს ვხვდებით კომპანიის ადმინისტრაციას, რა თქმა უნდა, ჩვენს იურისტთან ერთად.

მნიშვნელოვანია აღვნიშნოთ, რომ დასაქმებულთა დიდი ნაწილმა სოლიდარობა გამოუცხადა ჩვენს უსამართლოდ დაკავებულ ოთხ თანამებრძოლს და თავი შეიკავა სამუშაო პროცესში ჩართვისგან.

სამწუხაროდ, იყვნენ ისეთებიც, ვინც უგულებელყო ეს მდგომარეობა და ამ გაურკვეველი ვითარების ფონზე მაინც გადაწყვიტა მაღაროში შესვლა. თავჩაღუნულები, უხმოდ მიიჩქაროდნენ შესასვლელისკენ.

აღსანიშნავია , რომ ვინც გადაწყვიტა მუშა პროცესში ჩართვა საპენსიო ასაკს მიღწეულები არიან. 

ჭიათურელებო, არ გვეკადრება ასეთი საქციელი! არ უნდა ვიაროთ ამ ქალაქში თავდახრილებმა — ერთმანეთისთვის თვალის გასწორების არ უნდა გვცხვენოდეს. შემირცხვენია ყველა ის ჭიათურელი, ვინც პირადი კეთილდღეობის მოლოდინს , ფულს და სიხარბეს კაცობაზე, ადამიანობაზე და მორალზე წინ აყენებს.,,-მაღაროელების საინიციატივო ჯგუფი. 

ჭიათურაში გაფიცული მაღაროელები პროფკავშირების გაერთიანებისა და მიხაილ სოცკის შეხვედრას ეხმაურებიან.

,,აი, რას გეგმავენ ჭიათურაში: ჭიათურაში მაღაროსთან დაკავშირებულია 10 კომპანია. აქედან 5 კომპანიაში გეგმავენ ყველა საშტატო ერთეულის გაუქმებას. ეს ნიშნავს უკლებლივ ყველა თანამშრომლის გაშვებას. 3 კომპანიაში გეგმავენ შემცირებებს - რომლებში და რა ოდენობით არ ვიცით. 2 კომპანიაში (ახალი გამამდიდრებელი ქარხანა და ჯმ-ემს) დასაქმებულთა რაოდენობა საერთოდ არ მცირდება.

ეს ის 2 კომპანიაა, რომელზეც დღეს პეტრიაშვილის გაყიდულმა პროფკავშირმა გვითხრა, რომ თურმე კონკურსი არ იქნება და ამის მიღწევად გასაღებას ცდილობს.

პეტრიაშვილის პროფკავშირმა იცის, მაგრამ მალავს ინფორმაციას, რომელი 5 კომპანიის ფაქტობრივი ლიკვიდაცია იგეგმება და რომელ 3 კომპანიაში აპირებენ შემცირებას და რა ოდენობით.

მაღაროელებო, მხოლოდ ერთიანობით შეიძლება ბოროტების ამ მანქანასთან დაპირისპირება.,,-მაღაროელთა საინიციატივო ჯგუფი.

პროფკავშირების გაერთიანების ხელმძღვანელი ირაკლი პეტრიაშვილი მიხაილ სოცკი ერთმანეთს გუშინ შეხვდნენ.სწორედ სოცკი ხელმძღვანელობს ჭიათურაში მაღაროებში რეორგანიზაციის პროცესს. პროფკავშირების მიერ გავრცელებული ინფორმაციის მიხედვით,მათ შორის გარკვეულ საკითხებზე  შეთანხმება შედგა. 

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, უკანონო ტყითსარგებლობასთან ბრძოლის ფარგლებში, 7 არარეგისტრირებული სახერხი საამქრო გამოავლინეს. 

უკანონო სახერხი საამქროები დალუქულია კახეთში, შიდა ქართლში, იმერეთსა და სამცხე-ჯავახეთში.  

მოქალაქეებს ლენტური და ცირკული ტიპის სახერხი დანადგარები, საკარმიდამო ეზოებში მოწყობილი ჰქონდათ ლაგოდეხის მუნიციპალიტეტის სოფელ კაბალში, ახმეტის მუნიციპალიტეტის სოფელ საბეროში, ქარელის მუნიციპალიტეტის სოფელ სანებელში, ტყიბულის მუნიციპალიტეტის სოფელ ჯონიაში, ხონის მუნიციპალიტეტის სოფელ პატარა გუბში, ბორჯომის მუნიციპალიტეტის სოფლებში - მზეთამზესა და ჭობისხევში. 

ახმეტაში, ბორჯომსა და ქარელში დალუქული უკანონო სახერხი საამქროების მიმდებარე ტერიტორიებიდან ამოღებულია სხვადასხვა სახეობის უკანონოდ მოპოვებული ხე-ტყე - ჯამში 46 ერთეული მრგვალი ხე-ტყე (მორი) და 3 კუბურ მეტრზე მეტი მოცულობის პირველადი გადამუშავების პროდუქტი (ფიცარი). 

ვინაიდან შვიდივე ფაქტი შეიცავს სისხლის სამართლის დანაშაულის ნიშნებს, მასალები, შემდგომი რეაგირების მიზნით შესაბამის უწყებებში გადაიგზავნა.

ქუთაისის დავით აღმაშენებლის სახელობის საერთაშორისო აეროპორტის ახალი, 3,5 კმ-იანი ასაფრენ-დასაფრენი ზოლისა და სააეროდრომო ინფრასტრუქტურის მშენებლობა აქტიურ ფაზაშია. დასრულდა ტერიტორიის გაწმენდითი სამუშაოები, მიმდინარეობს მიწის საექსკავაციო პროცესი. 

 ასაფრენ-დასაფრენი ზოლის მოწყობის სამუშაოები 3000 მეტრის ტერიტორიაზეა გაშლილი, სადაც ამ ეტაპზე, ფუნდამენტის მოწყობა და ინერტული მასალების შეტანა მიმდინარეობს. 

პარალელურ რეჟიმში 35000 კვმ-ზე მიმდინარეობს თვითმფრინავების სადგომი ბაქნის მშენებლობის სამუშაოები, რომლის სრული კვადრატულობა 55 000 კვმ-ს შეადგენს, ასევე მიმდინარეობს დაახლოებით, 17 კმ საერთო ფართზე ახალი საინჟინრო-საირიგაციო ნაგებობების მოწყობა.

პროექტს სამშენებლო კომპანია ,,ანაგი" ახორციელებს. რისი დასრულების შემდეგაც, ქუთაისის საერთაშორისო აეროპორტს ექნება F კოდური აღნიშვნის პირველი აეროდრომი საქართველოში, რომელიც დიდი ზომის (F კატეგორიის) საჰაერო ხომალდების მიღებას შეზღუდვების გარეშე შეძლებს.