9 იანვრიდან 10 იანვრის დილამდე დასავლეთ საქართველოში მოსალოდნელია წვიმა, ზოგან ძლიერი ელჭექთან ერთად, შესაძლებელია ქარის გაძლიერება და ზღვაზე 3-4 ბალიანი შტორმული ღელვა. 

ქვეყნის მაღალმთიან რაიონებში მოსალოდნელია თოვა, ზოგან ძლიერი, ნისლი, ქარბუქი და ზვავსაშიშროება. დიდთოვლობის, ქარბუქის, ხილვადობის გაუარესების, ლიპყინულის და ზვავსაშიშრიების გამო საავტომობილო გზების ცალკეულ მონაკვეთებზე შესაძლებელია შეიზღუდოს ტრანსპორტის მოძრაობა.  

მოსალოდნელმა ნალექებმა შესაძლებელია დასავლეთ საქართველოს მდინარეებზე წყლის დონეების მნიშვნელოვანი მატება, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს (საფრთხის დონე საშუალო).

ინფორმაციას გარემოს ეროვნული სააგენტო აქვეყნებს.

დაცული ტერიტორიების სააგენტოს ინფორმაციით,საქართველოს 7 რეგიონში : რაჭაში, ლეჩხუმში, სვანეთში, გურიაში, სამეგრელოში, იმერეთსა და კახეთში დაცული ტერიტორიები შეიქმნება.

პროექტის თანახმად, იმერეთში, კერძოდ სამტრედიის მუნიციპალიტეტში რიონის აღკვეთილი დაარსდება.   ფართობი 558 ჰექტარია.  ტერიტორია მდინარე რიონის იმ მონაკვეთს მოიცავს, სადაც ზუთხისებრთა ქვირითობა ხდება.რიონის აღკვეთილის შექმნის მიზანი  ზუთხისებრთა პოპულაციის დაცვა  და აღდგენის შესაძლებლობას გაზრდაა.

იმერეთის გარდა, დაცული ტერიტორიები დაარსდება:

რაჭა – დაგეგმილია რაჭის ეროვნული პარკის გაფართოება 4 759 ჰექტრით; ამბროლაურის მუნიციპალიტეტში ჩამოყალიბდება დაცული ლანდშაფტი.

ლეჩხუმი - დაგეგმილია ეროვნული პარკის, ბუნების ძეგლებისა და აღკვეთილის დაარსება.

გურია – მიმდინარეობდა სამუშაოები დაცული ტერიტორიების გაფართოების შესაძლებლობებთან დაკავშირებით.

სვანეთი – დაგეგმილია სვანეთის დაცული ტერიტორიების დაარსება

სამეგრელო – დაგეგმილია ეგრისის ეროვნული პარკის დაარსება.

კახეთი – გურჯაანის, თელავისა და საგარეჯოს მუნიციპალიტეტებში, დაგეგმილია ეროვნული პარკისა და დაცული ლანდშაფტის დაარსება.

ამჟამად, საქართველოს დაცული ტერიტორიების ფართობი შეადგენს 929 996 ჰექტარს, რაც ქვეყნის ტერიტორიის დაახლოებით 13.34%-ია.

ახალი დაცული ტერიტორიების დაარსებისა და არსებული ტერიტორიების გაფართოების შედეგად, დაცული ტერიტორიების საერთო ფართობი დაახლოებით 220 000 ჰექტრით გაიზრდება და 1 150 000 ჰექტარს მიაღწევს, რაც საქართველოს ტერიტორიის დაახლოებით 16.4%-ს შეადგენს.

 ფოტო პირობითია. 

შინაგან საქმეთა სამინისტროს ცენტრალური კრიმინალური პოლიციის დეპარტამენტისა და ფინანსთა სამინისტროს შემოსავლების სამსახურის საბაჟო დეპარტამენტის თანამშრომლებმა, ნარკოტიკული საშუალებების უკანონო შეძენა-შენახვის და საქართველოში შემოტანის ბრალდებით - 1964 წელს დაბადებული ნ.დ. დააკავეს.

სამართალდამცველებმა ქუთაისის საერთაშორისო აეროპორტში, ბრალდებულის ხელბარგის შემოწმებისას, 420 აბი ნარკოტიკული საშუალება ნივთმტკიცებად ამოიღეს.

გამოძიება სისხლის სამართლის კოდექსის 260-ე და 262-ე მუხლებით მიმდინარეობს, რაც 9 წლამდე ვადით თავისუფლების აღკვეთას ითვალისწინებს.

ქუთაისში ტრადიციული საშობაო მსვლელობა გაიმართა. 

შობის მახარობელ ბავშვებს და სასულიერო პირებს ადგილობრივი ხელისუფლების წარმომადგენლებმა საშობაო ნობათები  გადასცეს.

ალილოს მსვლელობა ქუთათელ-გაენათელი მიტროპოლიტი მეუფე იოანე ხელმძღვანელობით და საბავშვო ანსამბლ " ნაი ნაის" წევრების მონაწილეობით გაიმართა.

შეგროვებულ ნობათს საქველმოქმედო მიზნით ასოციაცია "მოწყალება" გაანაწილებს.

ბაღდათის მუნიციპალიტეტის მერმა ნოდარ გიორგიძემ, საკრებულოს თავმჯდომარემ გურამ კიკნაველიძემ, მერის მოადგილეებთან ერთად, საგანგებო რეჟიმში მომუშავე სამსახურებს შობა- ახალი წელი მიულოცა.

 მერმა და საკრებულოს თავმჯდომარემ, სასწრაფო სამედიცინო დახმარების ცენტრის, შპს ჯეო ჰოსპიტალსის ბაღდათის მრავალპროფილური სამედიცინო ცენტრის, პოლიციის და სახანძრო-სამაშველო სამსახურის თანამშრომლებს, შობა-ახალი წელი სამუშაო ადგილებზე მიულოცეს, საჩუქრები გადასცეს და მადლობა გადაუხადეს ქვეყნისა და მოქალაქეების ჯანმრთელობის, სიმშვიდის და უსაფრთხოებსითვის გაწეული შრომისთვის.

ჭიათურაში მაღაროელთა უწყვეტი პროტესტი 312 დღე  გრძელდება.

მაღაროელები ნორმალურ სამუშაო პირობებთან ერთად 4 დაკავებული თანამებრძოლის ,გიორგი ნეფარიძის, მერაბ სარალიძის, არჩილ ჭუმბურიძისა და თენგიზ გველესიანის გათავისუფლებას ითხოვენ.ისინი  252 დღეა, ციხეში სხედან.როგორც მაღაროელები ამბობენ, უკანონოდ შეკერილი ბრალდებებითა და არარეალური მუხლით.

,,12 და 14 იანვარს ჩანიშნულია მათი სასამართლო პროცესები. ფორმალურად საქმე დასასრულს უახლოვდება, თუმცა რეალურად საიმედო არაფერია.

პროკურატურა სრულად იზიარებს საქმეში დაზარალებულად ცნობილი თენგიზ კობერიძის მოთხოვნას და ითხოვს ბრალდებულებისთვის კანონით გათვალისწინებულ პატიმრობას 6-დან 9 წლამდე.

მიუხედავად ადვოკატების ძალისხმევის, დაცვის მხარის მიერ წარმოდგენილი მტკიცებულებებისა და ეფექტური ჩვენებებისა, მოსამართლე თამარ მაზანაშვილი ამ დრომდე სრულად ეთანხმება პროკურატურისა და დაზარალებულის პოზიციას.

ამის შედეგად, უკვე 252 დღეა ოთხი ადამიანი უსამართლოდ არის თავისუფლებააღკვეთილი.

ჩვენ კი, ვინც გარეთ ვართ, უწყვეტად და უტეხად ვაგრძელებთ სამართლიან პროტესტს, ყველა მიმართულებით და კანონის ფარგლებში.

თუმცა ამ უსამართლობის შესაჩერებლად საჭიროა საერთო სოლიდარობა, გაერთიანება და ერთმანეთის გვერდით დგომა — განსაკუთრებით მაღაროელებისგან და ჭიათურელი ხალხისგან.

ეს ბიჭები მიტოვებას არ იმსახურებენ,,-მაღაროელთა საინიციატივო ჯგუფი.