ქუთაისის მერი იოსებ ხახალეიშვილი და მერის მოადგილე იუზა უგულავა საქართველოს მუნიციპალური განვითარების ფონდის მიერ ქალაქში განსახორციელებლი პროექტების კონტრაქტორი კომპანიების წარმომადგენლებს შეხვდნენ.
2022 წელს, ქუთაისში, მგფ-ის მიერ დაფინანსებული ორი მნიშვნელოვანი პროექტი განხორციელდება: აშენდება ახალი საბავშვო ბაღი ზურაბ ჭავჭავაძის ქუჩის#16-ის მიმდებარედ და დაიწყება დავით კაკაბაძის სახელობის სამხატვრო გალერეის რეკონსტრუქცია - რეაბილიტაციის პროექტზე მუშაობა.
როგორც კომპანია „ აი ჯი ეიჩ“-ის წარმომადგენლები აცხადებენ, დასრულებულია გალერეის რეკონსტრუქციასთან დაკავშირებული პირველი ეტაპის- საკვლევაძიებო სამუშაოები, მალე დაიწყება მეორე ეტაპიც, რომელიც მოიცავს უშუალოდ პროექტის კონცეფციაზე მუშაობას, გათვალისწინებულია საჯარო განხილვებიც.
დაწყებულია საბავშვო ბაღის მშენებლობის მოსამზადებელი სამუშაოებიც. ავტოქარხნის ადმინისტრაციულ ერთეულში, 180 ბავშვზე გათვლილი ახალი ბაღი აშენდება, შესაბამისი ინფრასტრუქტურით. კომპანია „სათავე პლუსის“ ხელმძღვანელის განცხადებით, ბაღი თანამედროვე სტანდარტების შესაბამისად შენდება და 2022 წლის ბოლომდე დასრულდება.
„ საინტერესო შეხვედრები გვქონდა მგფ-ის მიერ დაფინანსებულ პროექტებთან დაკავშირებით. კონტრაქტორ კომპანიებთან ვისაუბრეთ კაკაბაძის სახელობის სამხატვრო გალერეის რეაბილიტაციის და ზურაბ ჭავჭავაძის ქუჩაზე საბავშვო ბაღის მშენებლობის საკითხებზე. განვიხილეთ ამ ეტაპისთვის მნიშვნელოვანი დეტალები, რომლებიც ორმხრივად უნდა იქნეს გათვალისწინებული, რათა საბოლოოდ ორივე პროექტი იყოს წარმატებული.
ქუთაისისთვის სამხატვრო გალერეის რეკონსტრუქცია-რეაბილიტაციის კონცეფცია არის უმნიშვნელოვანესი , ჩვენ ამ საკითხზე გვექნება საჯარო განხილვებიც, რათა საბოლოოდ მივიღოთ გალერეა იმ იერ-სახით, როგორიც ეკადრება ქუთაისს.
საბავშვო ბაღს ვაშენებთ იმ უბანში, სადაც აქამდე ბაღი არ გვქონდა და ესეც კარგი საჩუქარი იქნება ამ უბნის მაცხოვრებლებისთვის.“- განაცხადა იოსებ ხახალეიშვილმა.