მესამე დღეა იმერეთი სტიქიას ებრძვის. რეგიონის 12-ვე მუნიციპალიტეტში ძლიერმა ქარმა რიგი პრობლემები შექმნა. ამ დროის მონაცემებით 300-მდე შენობის სახურავი არის დაზიანებული, 125 სოფელს არ მიეწოდება ელექტროენერგია, ასევე შეზღუდულია ბუნებრივი აირის მიწოდება. გარდა ამისა მუნიციპალიტეტებში წაიქცა მრავალწლოვანი ხეები.
იმერეთში სახელმწიფო რწმუნებული არსებულ მდგომარეობას ადგილზე ეცნობა და შესაბამის ღონისძიებებს მერებთან ერთად ატარებს.
,,გრძელდება იმერეთში სტიქიით მიყენებული ზიანის სალიკვიდაციო სამუშაოები. ამ დრომდე ძალიან, ძლიერი ქარი გვაქვს. სამწუხაროდ მოიმატა დაზიანებული შენობების რაოდენობამ და ამჟამინდელი მდგომარეობით დაახლოებით, 300 საცხოვრებელი სახლი ისევე, როგორც კორპუსი, ადმინისტრაციული და სხვა შენობა არის დაზიანებული. რეგიონში, ამ წუთში 125 სოფელს არ მიეწოდება ელექტროენერგია. მთელი იმერეთის მასშტაბით მიმდინარეობს სამუშაოები და ჩვენ, შევეცდებით მაქსიმალურად მოკლე დროში აღმოვფხვრათ ყველა ის ზარალი რაც მიაყენა სტიქიამ მუნიციპალიტეტებს” - ზვიად შალამბერიძე.
იმერეთის 12-ვე მუნიციპალიტეტში ამოქმედებულია ცხელი ხაზი, ასევე შექმნილია სპეციალური ჯგუფები, რომლებიც აწარმოებენ ზარალის დათვლას.
იმერეთში სახელმწიფო რწმუნებულის ადმინისტრაცია და რეგიონის ყველა მუნიციპალიტეტი საგანგებო რეჟიმში მუშაობს.
ხუნდაძის 63 ნომერში ძლიერი ქარის გამო პრობლემები შეიქმნა. ქარმა საცხოვრებელ კორპუსს სახურავი გადახადა.წყაროს მიერ მოწოდებული ინფორმაციით, დაზიანებულია სამი ავტომობილი.
შენობიდან სახურავის ნაწილების გადმოყრის საფრთხე ისევ არსებობს.
ანალოგიური ვითარებაა ჯავახიშვილის I შესახვევში ,სადაც დილიდან კორპუსის სხვადასხვა ფლიგელიდან სახურავის ფრაგმენტები ცვივა.ძლიერმა ქარმა სახურავის ნაწილები სამანქანო გზაზე გადმოყარა.
