ხშირად ხდება მანიპულირების საგანი, რომ საქართველო ენერგეტიკულად რუსეთზეა დამოკიდებული - რუსეთზე ენერგოდამოკიდებული არ ვართ,- ამის შესახებ საქართველოს ენერგეტიკისა და წყალმომარაგების მარეგულირებელი ეროვნული კომისიის თავმჯდომარე დავით ნარმანიამ განაცხადა.
მისი თქმით, საქართველოს ელექტროენერგიის როგორც აზერბაიჯანიდან, ისე თურქეთიდან შემოტანის შესაძლებლობა აქვს, ბუნებრივ გაზის 90%-ზე მეტი კი აზერბაიჯანიდან შემოდის და მხოლოდ ძალიან მცირე მოცულობის იმპორტი ხდება რუსეთიდან.
„ხაზს ვუსვამ, რომ ის, თუ საიდან შემოაქვს ქვეყანას ელექტროენერგია კონკრეტული თვის განმავლობაში, დამოკიდებულია იმაზე, რომელი ქვეყანა უფრო იაფ ფასს შესთავაზებს. როგორც წესი, რუსეთიდან, აზერბაიჯანიდან და თურქეთიდან ხდება ელექტროენერგიის იმპორტი საქართველოში, გააჩნია რომელ პერიოდში რომელ ქვეყანას რა ფასის შეთავაზება შეუძლია. ამდენად, ჩვენ რუსეთზე ენერგოდამოკიდებული არ ვართ, სრული პასუხისმგებლობით ვაცხადებ ამას როგორც ელექტროენერგიის, ისე ბუნებრივი გაზის ნაწილში. ელექტროენერგიის ნაწილში გვაქვს შესაძლებლობა როგორც აზერბაიჯანიდან, ისე თურქეთიდან შემოვიტანოთ, რაც შეეხება ბუნებრივ გაზს, 90%-ზე მეტი შემოდის აზერბაიჯანიდან, ძალიან მცირე მოცულობა შემოდის რუსეთიდან, რომელიც ამ გაზსადენის წნევების რეგულირებისთვის საჭირო ტექნიკური ინსტრუმენტია ერთი მხრივ, მეორე მხრივ კი, საქართველო სომხეთში გატარებული ბუნებრივი გაზიდან გარკვეულ სარგებელს იღებს. ამდენად, რუსეთზე დამოკიდებულება, როგორც ელექტროენერგიის, ასევე ბუნებრივი გაზის ნაწილში არ გვაქვს“, - განაცხადა დავით ნარმანიამ მედიაცენტრ „მთავარში“ გამართულ პრესკონფერენციაზე.
საქართველოს რეგიონული განვითარებისა და ინფრასტრუქტურის მინისტრი ირაკლი ქარსელაძე და იმერეთში სახელმწიფო რწმუნებული ზვიად შალამბერიძე, ადგილობრივი ხელისუფლების წარმომადგენლებთან ერთად, საჩხერეში მიმდინარე პროექტებს ადგილზე გაეცნენ.
,,საჩხერეში ჯამში 13 000 000 მილიონ ლარზე მეტი ღირებულების ინფრასტრუქტურული პროექტები ხორციელდება. აქედან, ძალიან გამორჩეული პროექტია მაჭავარიანის ქუჩის რეაბილიტაცია, რომელიც აკაკი წერეთლის სახლ-მუზეუმამდე მიდის. აღნიშნულ ქუჩაზე მთლიანად იცვლება არსებული ინფრასტრუქტურა. ასევე, ევროკავშირის საპილოტე რეგიონების ინტეგრირებული განვითარების პროექტის შესაბამისად, ,,მოდინახეს ციხის“ მიმდებარე ტერიტორიაზე სკვერისა და გასართობი სივრცის მოწყობის სამუშაოები მიმდინარეობს. აღნიშნული რეკრეაციული სივრცისა და ,,მოდინახეს ციხის“ სამუშაოების დასრულების შედეგად, ქალაქი კიდევ ერთ საინტერესო ტურისტულ ლოკაციას მიიღებს“ - ზვიად შალამბერიძე.
განახლებული რეგიონების პროგრამის ფარგლებში საჩხერის მუნიციპალიტეტში თავისუფლებისა და მუხრან მაჭავარიანის ქუჩების ტროტუარების, ღობეებისა და ჭიშკრების მოწყობის სამუშაოები მიმდინარეობს. პროექტი 3 377 700 ლარით არის დაფინანსებული და 2023 წლის სექტემბერში დასრულდება.
ასევე, საპილოტე რეგიონების ინტეგრირებული განვითარების პროგრამის ფარგლებში საჩხერის მუნიციპალიტეტში მიმდინარეობს დოსითეოს წერეთლის ქუჩის გასწვრივ საქალაქო პარკის მოწყობის სამუშაოები და კულტურული მემკვიდრეობის ძეგლის ,,მოდინახის ციხის" მიმდებარედ, სკვერისა და ტერიტორიის კეთილმოწყობა. აღნიშნული პროექტები ევროკავშირის ფინანსური მხარდაჭერით ხორციელდება და ღირებულება 3 685 484 ლარს შეადგენს.
საჩხერის მუნიციპალიტეტში მიმდინარე წელს 141 პროექტი ხორციელდება. ძირითადი მიმართულება არის საგზაო ინფრასტრუქტურა, სასმელი წყლის სისტემების რეაბილიტაცია, სკვერების მოწყობა/რეაბილიტაცია და სხვა.
