ქუთაისში დღის განმავლობაში ქარი კიდევ უფრო გაძლიერდა. მოიმატა დაზიანებების რაოდენობამაც. მობილიზებულია ყველა შესაბამისი სამსახური, რომელთა თანამშრომელები მთელი დღის მანძილზე უწყვეტ რეჟიმში მუშაობენ, გადიან შემთხვევების ადგილზე და ეხმარებიან მოსახლეობას.
ქუთაისის მერი იოსებ ხახალეიშვილი და ვიცე-მერი დავით ერემეიშვილი უშუალოდ არიან ჩართული მიმდინარე პროცესებში, ადგილებზე ეცნობიან სიტუაციას და კოორდინაციას უწევენ სხვადახვა სამსახურების მუშაობას.
"დღეს კიდევ უფრო მოიმატა ქარის სიმძლავრემ. 15 საათის მონაცემებით 70-მდე ობიექტია დაზიანებული, ძირითადად შენობების სახურავები.
24 საათიან რეჟიმში მუშაობენ როგორც საგანგებო სამსახურები, ასევე მერიის შესაბამისი სამსახურებიც.
მიმდინარეობს ზარალის დათვლა. დღის ბოლოს უფრო დაზუსტებული მონაცემები გვექნება , თუ რა ზიანი მიადგა ქალაქს.
მაქსიმალურად ვცდილობთ, რომ დროულად აღდგეს ელექტროენერგიისა და წყლის მიწოდება და მოსახლეობას შეუვუმსუბუქოთ შექმნილი მდგომარეობა."- განაცხადა იოსებ ხახალეიშვილმა.
მესამე დღეა იმერეთი სტიქიას ებრძვის. რეგიონის 12-ვე მუნიციპალიტეტში ძლიერმა ქარმა რიგი პრობლემები შექმნა. ამ დროის მონაცემებით 300-მდე შენობის სახურავი არის დაზიანებული, 125 სოფელს არ მიეწოდება ელექტროენერგია, ასევე შეზღუდულია ბუნებრივი აირის მიწოდება. გარდა ამისა მუნიციპალიტეტებში წაიქცა მრავალწლოვანი ხეები.
იმერეთში სახელმწიფო რწმუნებული არსებულ მდგომარეობას ადგილზე ეცნობა და შესაბამის ღონისძიებებს მერებთან ერთად ატარებს.
,,გრძელდება იმერეთში სტიქიით მიყენებული ზიანის სალიკვიდაციო სამუშაოები. ამ დრომდე ძალიან, ძლიერი ქარი გვაქვს. სამწუხაროდ მოიმატა დაზიანებული შენობების რაოდენობამ და ამჟამინდელი მდგომარეობით დაახლოებით, 300 საცხოვრებელი სახლი ისევე, როგორც კორპუსი, ადმინისტრაციული და სხვა შენობა არის დაზიანებული. რეგიონში, ამ წუთში 125 სოფელს არ მიეწოდება ელექტროენერგია. მთელი იმერეთის მასშტაბით მიმდინარეობს სამუშაოები და ჩვენ, შევეცდებით მაქსიმალურად მოკლე დროში აღმოვფხვრათ ყველა ის ზარალი რაც მიაყენა სტიქიამ მუნიციპალიტეტებს” - ზვიად შალამბერიძე.
იმერეთის 12-ვე მუნიციპალიტეტში ამოქმედებულია ცხელი ხაზი, ასევე შექმნილია სპეციალური ჯგუფები, რომლებიც აწარმოებენ ზარალის დათვლას.
იმერეთში სახელმწიფო რწმუნებულის ადმინისტრაცია და რეგიონის ყველა მუნიციპალიტეტი საგანგებო რეჟიმში მუშაობს.
