იმერეთში საქართველოში ევროკავშირის ელჩი, პაველ ჰერჩინსკი იმყოფება.მას იმერეთში სახელმწიფო რწმუნებული და ქუთაისის მერი შეხვდნენ.
იმერეთში ევროკავშირის დაფინანსებით, საპილოტე რეგიონების ინტეგრირებული განვითარების პროგრამის ფარგლებში, 69 656 927 ლარის ღირებულების ინფრასტრუქტურული პროექტებია დაფინანსებული. გარდა ამისა, სხვადასხვა პროგრამით არაერთი ინფრასტრუქტურული პროექტია განხორციელებული.
შეხვედრაზე იმერეთის ტურისტულ პოტენციალზე, ეკონომიკურ მდგომარეობაზე, საინვესტიციო გარემოზე, სოფლის მეურნეობის, კონკრეტულად მევენახეობა-მეღვინეობის განვითარებისთვის საჭირო პროექტებზე ისაუბრეს.
სახელმწიფო რწმუნებულმა დავით აღმაშენებლის სახელობის აეროპორტის გაფართოებაზე ისაუბრა. დაგეგმილია მასშტაბური სარეაბილიტაციო სამუშაოების განხორციელება, რომლის მთლიანი საინვესტიციო ბიუჯეტი 47 მილიონი ლარი იქნება. პროექტის ფარგლებში დასრულდება 3,5 კმ-იანი ახალი ასაფრენ-დასაფრენი ზოლის პროექტირება, განხორციელდება სამიმოსვლო ბილიკებისა და ბაქნის გეგმიური რეაბილიტაცია, აშენდება დამატებით 400 ავტომობილზე გათვლილი ახალი ავტოსადგომი, განახლდება და დამონტაჟდება საერთაშორისო სტანდარტების შესაბამისი შუქსასიგნალო სისტემები. აღნიშნული პროექტი გარდა ვიზიტორების სიმრავლისა დამატებით ხელს შეუწყობს სავაჭრო ურთიერთობების გაღრმავებას სხვადასხვა ქვეყანასთან.
ზვიად შალამბერიძემ ასევე წყალტუბოს განვითარების შესახებ ისაუბრა.
შეხვედრის დასრულების შემდეგ იმერეთის გუბერნატორმა, ქუთაისის მერმა და ევროკავშირის ელჩმა საქართველოში, ქუთაისის ცენტრში მდებარე კოლხური შადრევანი დაათვალიერეს, რომლის რეაბილიტაციაც ევროკავშირის დაფინანსებით განხორციელდა.
ვიზიტის ფარგლებში ხელისუფლების წარმომადგენლები და ელჩი ქუთაისში მდებარე მწვანე ნარჩენების კომპოსტირების პირველ ცენტრს ესტუმრნენ, რომელიც ევროკავშირის დაფინანსებით შეიქმნა. ცენტრი პირველი ობიექტია დასავლეთ საქართველოში, სადაც ბიოდეგრადირებადი ნარჩენების კომპოსტირება ხდება და გარემოს დაცვის მიმართულებით მნიშვნელოვანი წვლილი შეაქვს.
ევროკავშირის ელჩი საქართველოში, პაველ ჰერჩინსკი, პირველად სტუმრობს იმერეთის რეგიონს. ვიზიტი სამი დღე გაგრძელდება.
ქუთაისის მერია არასამთავრობო ორგანიზაცია „ფლანგვის დეტექტორის მიერ გუშინ გამოქვეყნებულ ინფორმაციას ეხამაურება და განცხადებას ავრცელებს.
,,სტატია ცალსახად დეზინფორმაციულია და ემსახურება ცრუ ინფორმაციის გავრცელებით ქუთაისის მერის დისკრედიტაციას.
ავტომობილი „შკოდა“ ქუთაისის მერიამ ტენდერის საშუალებით შეიძინა 118, 121 ლარად. გაფორმდა ხელშეკრულება. სატენდერო პირობის თანახმად, ავტომანქანაზე გარანტია უნდა ვრცელდებოდეს 5 წელი ძირითად აგრეგატებზე (ძრავი, ხიდი, გადაცემათა კოლოფი), 3 წელი ან 150000 კილომეტრი (რომელიც ადრე შესრულდება) სრულ ავტომანქანაზე, გარდა სწრაფცვეთადი ნაწილებისა და მასალებისა.
თანმდევი საგარანტიო პირობების ფარგლებში, გეგმიური ფასიანი მომსახურების განხორციელება უნდა მოხდეს დანართი #2-ით (მიმწოდებლის მიერ განფასებული დანართი #2 ატვირთულია სისტემაში სატენდერო მოთხოვნის შესაბამისად) მიმწოდებლის მიერ წარმოდგენილ ცხრილში დაფიქსირებული პერიოდების და ფასების შესაბამისად.
აღნიშნულის გათვალისწინებით, საქართველოს კანონის „სახელმწიფო შესყიდვების შესახებ“, საქართველოს მთავრობის 2011 წლის 21 იანვრის №26 დადგენილების და სახელმწიფო შესყიდვების სააგენტოს თავმჯდომარის 2015 წლის 17 აგვისტოს №13 ბრძანების მე-3 მუხლის „თ“ ქვეპუნქტის საფუძველზე ტექნიკური მომსახურებისა და ავტოსათადარიგო ნაწილებით უზრუნველყოფის მიზნით, გაფორმდა ხელშეკრულება შ.პ.ს. „ავტო ცენტრი თბილისი“-სთან 12947 ლარზე და მომსახურების პერიოდია ხელშეკრულების დადებიდან (2023 წლის 9 მარტი) 2026 წლის 26 იანვრამდე.
შესაბამისად, „ფლანგვის დეტექტორის“ მიერ გავრცელებული ინფორმაცია, რომ 13 000 ლარი ტენდერის გვერდის ავლით დაიხარჯა, ტყუილია!
ტყუილია ისიც, რომ დაზიანდა ავტომობილის ბამპერი და შესაბამისად, მისი გამოცვლის საჭიროება არც ყოფილა.
იმ შემთხვევაში, თუ „ფლანგვის დეტექტორი“ არ შეცვლის მის მიერ გავრცელებულ მცდარ ინფორმაციას და სწორ ინფორმაციას არ განათავსებს საკუთარ გვერდზე, ქუთაისის მერია მიმართავს საკითხის გადაწყვეტის სამართლებრივ ფორმას.,,-ქუთაისის მერია.
