მთამსვლელთა და მოგზაურთა კლუბი ,,თეთნულდი,, დიდთოვლობის შედეგად დაზარალებული ვანის და ბაღდათის მუნიციპალიტეტებში მცხოვრები მოსახლეობისთვის პროდუქტებისა და მედიკამენტების მიწოდებას გეგმავს.

,,გამზადდა ვანი- ბაღდათის მოსახლეობისთვის, 24 ოჯახისთვის პირველადი სურსათი და მედიკამენტები, მათი საჭიროება გასაუბრების დროს გამოიკვეთა.

თანხა შემოვიდა ანგარიშზე სულ 540 ლარი და დღეს დაიხარჯა, სურსათში 365 ლარი, დარჩენილი თანხით შესაძენი იქნება პური, სანთლები საწვავი.

ხვალ კიდე ველოდებით შემდეგი დღისთვის რესურსებს. მადლობა ყველას ნდობისთვის.,,-კლუბი ,,თეთნულდი,,.

28 თებერვალს და 1-2 მარტს ღამის საათებში საქართველოში მოსალოდნელია ჰაერის ტემპერატურის მნიშვნელოვანი დაკლება: დასავლეთ საქართველოს დაბლობში -5, -10 გრადუსამდე, აღმოსავლეთ საქართველოს ბარში -7, -12, ქვეყნის მთიან რაიონებში -13, -18, მაღალმთიან ზონაში -18, -23 გრადუსამდე. 

დასავლეთ საქართველოს გზებზე ნარჩუნდება რთული მეტეოროლოგიური პირობები: ლიპყინული, ელექტროგადამცემ ხაზებზე შემოყინულობა, ხოლო ქვეყნის მაღალმთიან ზონაში-ზვავსაშიშროება. 

საავტომობილო გზების ცალკეულ მონაკვეთებზე არსებული დიდთოვლობის, ხილვადობის გაუარესების, ქარბუქის, ლიპყინულის და ზვავსაშიშროების გამო შესაძლებელია შეიზღუდოს ტრანსპორტის მოძრაობა. კოლხეთის დაბლობზე ღამის საათებში ჰაერის ტემპერატურის -5, -10 გრადუსამდე დაწევამ შესაძლებელია ციტრუსოვანი კულტურების დაზიანება გამოიწვიოს (საფრთხის დონე მაღალი).

დასავლეთ საქართველოში ,,ენერგო-პრო ჯორჯიას“ ტექნიკური ბრიგადები საგაბგებო რეჟიმში მუშაობას განაგრძობენ. აბონენტების ნაწილს ელექტროენერგიის მიწოდება აღუდგა. სტიქიის პიკზე, გურიის მაშტაბით ენერგომომარაგება შეზღუდული ჰქონდა აბონენტების 28-30 %-ს, ამ დროისთვის ელექტროენერგიის გარეშეა აბონენტების 18-20 %. მუშაობისთვის ყველა საჭირო მასალა შეტანილია სტიქიის ზონაში. ადგილობრივ ელექტრიკოსებთან ერთად მუშაობას განაგრძობენ აღმოსავლეთ საქართველოდან ჩასული დამატებითი ბრიგადები.

აღდგენითი სამუშაობი ასევე მიმდინარეობს იმერეთში, სადაც ელექტროენერგია შეზღუდვით მიეწოდება ვანის, ხარაგაულის, ბაღდათის და ზესტაფონის სოფლების ნაწილს. ქალაქ ხონს სრულად მიეწოდება ძაბვა  .

ძაბვა მიეწოდება ასევე სამეგრელოს აბონენტების უმრავლესობას. ამ დროისთვის ელექტროენერგით შეზღუდვით მარაგდება მხოლოდ ზუგდიდის და აბაშის სოფლების მცირე ნაწილი. საგანგებო ვითარებაში მუშაობა აქაც გრძელდება.

აჭარის აბონენტების უმრასებაც სტაბილურად მარაგდება ელექტროენერგიით. ქობულეთის და ზემო აჭარის მცირე ნაწილია მხოლოდ დენის გარეშე. ხულოს მუნიციპალიტეტს სრულად მიეწოდება ელექტროენერგია.

,,შესაძლოა იყოს გადაადგილების პრობლემა, თუმცა, ჩვენ ვცდილობთ ყველგან მივიდეთ და ვაწარმოოთ აღდგენითი სამუშაოები. აღსაქმელად რომ ადვილი იყოს, შესაძლოა ზოგიერთ სოფელში გადატეხილი იყოს ელექტროგადამცემი ხაზის საყრდენი, რომელიც იწონის 400 კგ-ს. აქ საჭიროა, სპეცტექნიკა, რომელთაც უნდა მოხდეს ახალი ბოძების შეატანა. ასეთ შემთხვევაში სამუშოებს უფრო მეტი დრო დასჭირდება“- აცხადებენ ,,ენერგო-პრო ჯორჯიაში“.

იმერეთში მე-4 დღეა ინტენსიურად თოვს. 12-ვე მუნიციპალიტეტში  მთელი ღამის განმავლობაში 75 ერთეული ტექნიკით მიმდინარეობდა წმენდითი სამუშაოები, დილიდან კი პროცესში 158 ერთეული ჩაერთო.

წუხელ გვიან ღამით სტიქიის სალიკვიდაციო სამუშაოებში ასევე ჩაერთო თავდაცვის ძალების ტექნიკაც.

იმერეთის სამხარეო ადმინისტრაციის ინფორმაციით,  ჩაკეტილია 103 სოფელი. 

ამ დროის მონაცემებით,  ყველაზე რთული მდგომარეობა  ხარაგაულშია .  მაღალმთიან ზონაში თოვლის საფარი 2 მეტრზე მეტია. 

ელექტრო ენერგია  20 ათასამდე აბონენტს არ მიეწოდება, ბუნებრივი აირი კი 1 603 აბონენტს. 

სასწავლო პროცესი ისევ შეჩერებულია მუნიციპალიტეტების ზოგიერთ სკოლებსა და ბაღებში.

იმერეთის 12-ვე მუნიციპალიტეტეში მოქმედებს ცხელი ხაზი.

საჩხერის მუნიციპალიტეტში დიდთოვლობის გამო ჩაკეტილი 12 სოფლიდან 9 სოფლამდე მისასვლელ გზაზე მოძრაობა აღდგა. ამ დრომდე პრობლემურია სოფლების ნიგვზარა, შომახეთი, ღოდორას მიმართულებით მოძრაობა. 

ელექტროენერგია სრულად აღდგენილია და მიეწოდება ყველა აბონენტს. შეუფერხებლად ხდება ბუნებრივი აირით მოსახლეობის მომარაგებაც.

ამ დროისთვის გზა იწმინდება 10 მიმართულებით. იყრება ტექნიკური მარილიც. მობილიზებულია 12 ერთეული სპეც. ტექნიკა. 

მუნიციპალიტეტის მერიის ინფორმაციით, სასწავლო პროცესი განახლდა მუნიციპალიტეტის ყველა საბავშვო ბაღში. დღეის მდგომარეობით ყველა საჯარო სკოლაში, გარდა სოფელ ნიგვზარის, ლიჩისა და ცხომარეთის საჯარო სკოლებისა, მიმდინარეობს საგაკვეთილო პროცესი.

 ქუთაისის საერთაშორისო აეროპორტის ინფორმაციით, აეროპორტიდან „შატლ ბასების“ მოძრაობა ქუთაისის ცენტრამდე და პირიქით, 13:00 საათიდან განახლდება.

შეგახსენებთ,ინტენსიური თოვის, ყინვისა და გზებზე გართულებული მოძრაობის გამო, ქუთაისის საერთაშორისო აეროპორტიდან „შატლ ბასების“ მოძრაობა ქუთაისის ცენტრამდე და პირიქით, დროებით შეჩერებული იყო.