გარემოსდაცვითი ზედამხედველობის დეპარტამენტი საქართველოს 4 დიდ ქალაქში - თბილისში, რუსთავში, ქუთაისსა და ბათუმში, 2023 წლის 4 სექტემბრიდან, მოძრავი ავტოსატრანსპორტო საშუალებების გამონაბოლქვის კონტროლს ახორციელებს. 

კანონის ამოქმედებიდან 2024 წლის 4 აგვისტოს ჩათვლით, გარემოსდაცვითი ზედამხედველობის დეპარტამენტის ეკიპაჟების მიერ, მოძრავი ავტოსატრანსპორტო საშუალებების გამონაბოლქვის დადგენილ ნორმასთან შეუსაბამობისთვის, ჯამში, 6683 იურიდიული და ფიზიკური პირი დაჯარიმდა. 

ყველაზე მეტი - 3177 დარღვევა დაფიქსირდა თბილისში, 1330 - ქუთაისში, 1145 - ბათუმში, 1031 - ქალაქ რუსთავში. 

გარემოსდაცვითი ზედამხედველობის დეპარტამენტის თანამშრომლების მიერ დაჯარიმებული 6683 სამართალდამრღვევიდან, 5832 ფიზიკური პირია, ხოლო 851 - იურიდიული პირი.

4142 საჯარიმო ქვითარი მსუბუქი ავტომობილების მძღოლების მიმართ არის შედგენილი, 2256 - მიკროავტობუსის, 277 - სატვირთო ავტომობილის, 8 - ავტობუსის.

ავტოსატრანსპორტო საშუალებების გამონაბოლქვის კანონმდებლობით დადგენილ ნორმასთან შეუსაბამობისთვის, ფიზიკური პირის შემთხვევაში, ჯარიმის ოდენობა პირველ ჯერზე 100 ლარია, მეორე ჯერზე - 300 ლარი, მესამე ჯერზე - 600 ლარი. იურიდიული პირის შემთხვევაში კი, ჯარიმა, შესაბამისად, 500, 1500 და 3000 ლარია. ჯარიმის 10 დღის ვადაში გადახდის შემთხვევაში, სამართალდამრღვევს ჯარიმის ოდენობა 20%-ით შეუმცირდება. 

12 აგვისტოს ჩათვლით, საქართველოში მოსალოდნელია დროგამოშვებით წვიმიანი ამინდი. 

თბილისში შესაძლოა ხანმოკლე წვიმა აღინიშნოს. ტემპერატურა დღისით +29, +31 გრადუსი დაფიქსირდება. 

სანაპირო რაიონებში (ბათუმი, ქობულეთი, ანაკლია, ფოთი) 9 აგვისტოს უნალექო ამინდი იქნება, ხოლო 10-12 აგვისტოს დროგამოშვებით იწვიმებს. ჰაერის ტემპერატურა დღისით +28, +30 გრადუსი იქნება. 

დასავლეთ საქართველოს დაბლობ რაიონებში (ზესტაფონი, ქუთაისი, სამტრედია, ზუგდიდი, მარტვილი, ოზურგეთი) 9 აგვისტოს უნალექო ამინდი იქნება, ხოლო 10-12 აგვისტოს დროგამოშვებით იწვიმებს. ჰაერის ტემპერატურა დღისით +30, +32 გრადუსი დაფიქსირდება. 

დასავლეთ საქართველოს მთიან რეგიონებში (ამბროლაური, ონი, ცაგერი, შოვი, ჭიათურა, საჩხერე, ხულო, რიკოთის უღელტეხილი) 10-12 აგვისტოს მოსალოდნელია დროგამოშვებით წვიმიანი ამინდი. ჰაერის ტემპერატურა დღისით +26, +28 გრადუსი იქნება. 

დასავლეთ საქართველოს მაღალმთიან რეგიონებში (მესტია, ბახმარო) 10-12 აგვისტოს მოსალოდნელია დროგამოშვებით წვიმიანი ამინდი. ჰაერის ტემპერატურა დღისით +23, + 25 გრადუსი დაფიქსირდება. 

ქართლში (რუსთავი, ბოლნისი, მარნეული, გარდაბანი, გორი, ცხინვალი) ზოგან მოსალოდნელია ხანმოკლე წვიმა, შესაძლებელია ელჭექი, სეტყვა და ქარის გაძლიერება. ჰაერის ტემპერატურა დღისით +29, +31 გრადუსი იქნება. 

კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო) ზოგან მოსალოდნელია ხანმოკლე წვიმა, შესაძლებელია ელჭექი, სეტყვა და ქარის გაძლიერება. ჰაერის ტემპერატურა დღისით +29, +31 გრადუსი იქნება. 

 აღმოსავლეთ საქართველოს მთიან რეგიონებში (ახალციხე, ბორჯომი, დუშეთი, თიანეთი, ფასანაური) ზოგან მოსალოდნელია ხანმოკლე წვიმა, შესაძლებელია ელჭექი, სეტყვა და ქარის გაძლიერება. ჰაერის ტემპერატურა დღისით +26, +28 გრადუსი იქნება. 

აღმოსავლეთ საქართველოს მაღალმთიან რეგიონებში (ახალქალაქი, წალკა, ბაკურიანი, გუდაური, ომალო): ზოგან მოსალოდნელია ხანმოკლე წვიმა, შესაძლებელია ელჭექი, სეტყვა და ქარის გაძლიერება. ჰაერის ტემპერატურა დღისით +20, +22 გრადუსი დაფიქსირდება.

ბაღდათის მუნიციპალიტეტში 2008 წლის აგვისტოს ომის გმირებს პატივი მიაგეს.

ბაღდათის მუნიციპალიტეტის მერმა კახა ენუქიძემ, საკრებულოს თავმჯდომარე ნოდარ გიორგიძესთან და ადგილობრივი თვითმმართველობის წარმომადგენლებთან ერთად, 2008 წლის აგვისტოს ომში, შინდისში გმირულად დაღუპული ფელიქს კაკაურიძის და ზვიად კაცაძის ხსოვნას პატივი მიაგეს და მათი საფლავები ყვავივლებით შეამკეს. სასულიერო პირებმა კი პანაშვიდი გადაიხადეს.

დღესვე ყვავილებით შეამკეს, ქალაქ ბაღდათში ტერიტორიული მთლიანობისთვის დაღუპულ გმირთა მემორიალი და სოფელ დიმში გმირთა დედის ბიუსტი.

2008 წლის აგვისტოს ომიდან 16 წელი შესრულდა. ეს პერიოდი საქართველოს უახლეს ისტორიაში ერთ- ერთი ტრაგიკული თარიღია.

 ” 2008 წელს ჩვენი სახელმწიფოს მიმართ აგრესორი ქვეყნის, რუსეთის მიერ ჩადენილი იქნა უმძიმესი დანაშაული, რასაც მოჰყვა ადამიანთა მსხვერპლი, მათ შორის მშვიდობიანი მოსახლეობის. დღემდე ოკუპირებულია საქართველოს კუთვნილი ტერიტორიები. ტრაგიკული დღეები იყო ჩვენი ქვეყნის უახლოეს ისტორიაში. 

 დღეს პატივი მივაგეთ აგვისტოს ომის გმირების ხსოვნას. მათი ოჯახების წევრებთან ერთად გვირგვინით შევამკეთ გმირთა მემორიალი, რომელსაც სულ მალე განახლებული იერ-სახით წარვუდგენთ საზოგადოებას.

 ჩვენი გმირების ხსოვნის პატივგების უპირველესი ნიშანი იქნება ის, რომ საქართველო უნდა იყოს ერთიანი, ძლიერი, მშვიდობიანი და დამოუკიდებელი ქვეყანა!“- განაცხადა დავით ერემეიშვილმა.

 ქუთაისის მუნიციპალიტეტიდან 2008 წლის ომში 9 ადამიანი დაიღუპა. ქალაქის მერიამ ცხრავე ოჯახს, რომლებმაც ომში ოჯახის წევრები დაკარგეს, 1500 ლარი ჩაურიცხა.

იმერეთში სახელმწიფო რწმუნებულმა ,ქუთაისის მერის მოვალეობის შემსრულებელმა , მაჟორიტარმა დეპუტატმა პარლამენტში,საკრებულოს თავმჯდომარემ , თვითმმართველობის წარმომადგენლებმა და  ომში დაღუპული გმირების ოჯახის წევრებმა , ქუთაისში, რუსეთ-საქართველოს ომში დაღუპულ გმირთა მემორიალი გვირგვინით შეამკეს და მათ ხსოვნას პატივი მიაგეს. 

,,16 წელი გავიდა რუსეთ-საქართველოს აგვისტოს ომიდან. ჩვენ ყოველ წელს ვიხსენებთ იმ ჯარისკაცებს, რომლებმაც რთულ დღეებში საკუთარი სიცოცხლე შესწირეს ქვეყნის კეთილდღეობას, ასევე ვიხსენებთ იმ მშვიდობიან მოქალაქეებს, რომლებიც შეეწირნენ სამშობლოს დაცვას. ათასობით მოქალაქემ დაკარგა საცხოვრებელი სახლი, იქცა თავის ქვეყანაში დევნილად და შედეგად დღეს, ჩვენ გვაქვს ქვეყნის 20% დროებით ოკუპირებული რუსეთის მიერ.

რა თქმა უნდა ჩვენი მთავრობის პრიორიტეტი ყოველთვის იყო და იქნება ქვეყნის გამთლიანება, სანამ დროებით ოკუპირებული ტერიტორია არ შემოუერთდება ჩვენი ქვეყნის იურისდიქციას. ჩვენ, ამას აუცილებლად გავაკეთებთ და გავაკეთებთ მხოლოდ მშვიდობით” - ზვიად შალამბერიძე.

სასულიერო პირებმა რუსეთ-საქართველოს ომში დაღუპულ გმირთა სულის მოსახსენიებელი პარაკლისი გადაიხადეს.

რუსეთ-საქართველოს ომში დაღუპულ გმირთა მემორიალის მიმდებარედ 2008 წლის ომში დაღუპული ჯარისკაცებისა და საომარი მოქმედებების შედეგად განადგურებული ტერიტორიების ამსახველი ფოტოები გამოიფინა. ასევე, წარმოდგენილი იყო პროექტის რენდერები, რომლის მიხედვით რეაბილიტაცია ჩაუტარდება არსებულ გმირთა მემორიალს.

რუსეთ-საქართველოს ომში დაღუპულ გმირებს იმერეთის 12-ვე მუნიციპალიტეტში მიაგეს პატივი. 

დაღუპულთა ხსოვნის პატივსაცემად, სახელმწიფო დროშები დაშვებულია ქვეყნის მთელ ტერიტორიაზე არსებულ ადმინისტრაციულ შენობებზე.

2008 წლის აგვისტოს ომმა 400-ზე მეტი ადამიანის სიცოცხლე იმსხვერპლა. ომში დაიჭრა და დაშავდა 2 232 პირი, მათგან 1 045 – სამხედრო მოსამსახურე.

ჩვენი პოლიტიკური ოპონენტები ამ თარიღს აღნიშნავდნენ წლების განმავლობაში 8 აგვისტოს და რამდენიმე წლის შემდეგ გადაწყვიტეს, რომ თურმე 7 აგვისტოს დაწყებულა ომი. ეს სპეკულაციებია, რომელსაც არ აქვს საფუძველი, - ამის შესახებ საქართველოს პრემიერ-მინისტრმა, ირაკლი კობახიძემ მუხათგვერდის ძმათა სასაფლაოზე განაცხადა, სადაც 2008 წლის აგვისტოს ომის დროს დაღუპულთა ხსოვნას პატივი მიაგო.

მთავრობის მეთაურის თქმით, რადიკალური ოპოზიციის მიზანია, რომ არაფერი აერთიანებდეს ქართულ საზოგადოებას, მათ შორის, ომის დაწყების თარიღიც კი.

„არ მგონია, რომ თარიღთან დაკავშირებით ეს სპეკულაციები იყოს სერიოზული. გახსოვთ, რომ ჩვენი პოლიტიკური ოპონენტები ამ თარიღს აღნიშნავდნენ წლების განმავლობაში 8 აგვისტოს და რამდენიმე წლის შემდეგ გადაწყვიტეს, რომ თურმე 7 აგვისტოს დაწყებულა ომი. ეს სპეკულაციებია, რომელსაც არ აქვს საფუძველი, ერთადერთი მიზანი არის ის, რომ რაღაცნაირად გახლიჩონ ამ ყველაფერშიც საზოგადოება. არაფერი უნდა აერთიანებდეს ქართულ საზოგადოებას, ეს არის ჩვენი რადიკალური ოპოზიციის მიდგომა, მათ შორის, ომის დაწყების თარიღიც კი, რაც ჩვენთვის მიუღებელია. წლების განმავლობაში, აღინიშნებოდა 8 აგვისტოს ომის დაწყების თარიღი და ამ თარიღის აღნიშვნა გრძელდება ახლაც ასე. რაც შეეხება ოპოზიციას, კიდევ ერთხელ ვიტყვი, რომ არის სპეკულაციები და არასერიოზული, ძალიან სამწუხაროა ეს ყველაფერი“,- განაცხადა პრემიერმა.