რუსთაველის გამზირის და ლაღიძის ქუჩის კვეთაზე განახლდა არსებული სკვერი. სკვერში დამონტაჟდა საბავშვო ატრაქციონები, დაიდგა ძელსკამები და ფანჩატური, მოეწყო განათების ახალი სისტემა და საფეხმავლო ბილიკები.
ევროკავშირის დაფინანსებით განხორციელდა დავით აღმაშენებლის მოედანზე არსებული შადრევანის განახლება. პროექტის ფარგლებში შადრევნის დაზიანებული მოზაიკური ნაწილი მოპირკეთება, შეიცვალა განათების და წყლის მიწოდების სისტემა, შადრევნის მონუმენტურ ნაწილს- ქანდაკებებს ჩაუტარდა რეაბილიტაცია. სამუშაოების ღირებულებამ 526 991 ლარი შეადგინა.
ევროკავშირის ფინანსური მხარდაჭერით ამ ეტაპზე, ქუთაისში 12 მილიონ ლარზე მეტი ღირებულების ინფრასტრუქტურული სამუშაოები მიმდინარეობს. მათ შორის არის: საგზაო ინფრასტრუქტურის მოწესრიგება, დასასვენებელი სივრცეების მოწყობა,100 საფეხურიანი კიბის რეაბილიტაცია და სხვა.
საპილოტე რეგიონების ინტეგრირებული განვითარების პროგრამის ეგიდით, იმერეთში 2021-2022 წლებში განსახორციელებელი ინფრასტრუქტურული პროექტებისთვის 69 656 927 ლარია გამოყოფილი.
პროგრამა საქართველოს მთავრობამ 2019 წლის 20 დეკემბერს დაამტკიცა და მისი წინასწარი ჯამური ბიუჯეტი 200 მილიონი ლარია. ამასთან, საპილოტე რეგიონებში განსახორციელებელი პროექტები თანადაფინანსდება მუნიციპალიტეტების საკუთარი ბიუჯეტიდან.
ქუთაისში მიმდინარე და დასრულებული სამუშაოები იმერეთში სახელმწიფო რწმუნებულმა ზვიად შალამბერიძემ, საქართველოს რეგიონული განვითარების და ინფრასტრუქტურის მინისტრის მოადგილემ მზია გიორგობიანმა, გუბერნატორის პირველმა მოადგილემ ლევან სანიკიძემ, ქუთაისის მერმა იოსებ ხახალეიშვილმა და მაჟორიტარმა დეპუტატმა პარლამენტში ზაზა ლომინაძემ დაათვალიერეს.
